ಐತಿಹಾಸಿಕ ಅಮೃತ ಮಹೋತ್ಸವದಲ್ಲಿ ಪಾಲ್ಗೊಳ್ಳಿ

ಕಮಲನಗರ: ಭಾಲ್ಕಿಯಲ್ಲಿ ಏ.22ರಂದು ಶ್ರೀ ಡಾ.ಬಸವಲಿಂಗ ಪಟ್ಟದ್ದೇವರ ಅಮೃತ ಮಹೋತ್ಸವ ಅದ್ದೂರಿಯಾಗಿ ಆಯೋಜಿಸಲಾಗುತ್ತಿದ್ದು, ಈ ಐತಿಹಾಸಿಕ ಕಾರ್ಯಕ್ರಮದಲ್ಲಿ ಬಸವ ಭಕ್ತರು, ಸಾರ್ವಜನಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳಬೇಕೆಂದು ಮುಖಂಡ ಪ್ರಕಾಶ ಟೊಣ್ಣೆ ಕರೆ ನೀಡಿದರು.

ಅಮೃತ ಮಹೋತ್ಸವ ನಿಮಿತ್ತ ಪಟ್ಟಣದ ಬಸವೇಶ್ವರ ವೃತ್ತದಲ್ಲಿ ಭಾನುವಾರ ಸಂಜೆ ಬಸವಜ್ಯೋತಿ ಯಾತ್ರೆ ಪ್ರಚಾರ ರಥಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ಅನಾಥ ಮಕ್ಕಳ ಪಾಲಿನ ಆರಾಧ್ಯ ದೇವರಾದ ಶ್ರೀ ಡಾ.ಬಸವಲಿಂಗ ಪಟ್ಟದ್ದೇವರು, ಶೈಕ್ಷಣಿಕವಾಗಿ ಹಿಂದುಳಿದ ಈ ನಮ್ಮ ಪ್ರದೇಶದಲ್ಲಿ ಹತ್ತಾರು ಗುಣಾತ್ಮಕ ಶಾಲೆಗಳನ್ನು ಸ್ಥಾಪಿಸಿ ಶೈಕ್ಷಣಿಕ ಕ್ರಾಂತಿಯ ರೂವಾರಿಯಾಗಿದ್ದಾರೆ. ಅಮೃತ ಮಹೋತ್ಸವದಲ್ಲಿ ಕರ್ನಾಟಕ ಅಲ್ಲದೇ ನೆರೆಯ ತೆಲಂಗಾಣ, ಮಹಾರಾಷ್ಟ್ರ, ಆಂಧ್ರಪ್ರದೇಶ ರಾಜ್ಯ ಸೇರಿ ಮುಂತಾದ ಕಡೆಗಳಿಂದ ಲಾಂತರ ಭಕ್ತರ ಸಮಾಗಮ ಆಗಲಿದೆ ಎಂದರು.

ನಿವೃತ್ತ ಪ್ರಾಚಾರ್ಯ ಪೊ.ಎಸ್​.ಎನ್​.ಶಿವಣಕರ ಮಾತನಾಡಿ, ವಿಶ್ವಗುರು ಬಸವಣ್ಣನವರ ತತ್ವಾದರ್ಶ ಹಾಗೂ ಡಾ.ಚನ್ನಬಸವ ಪಟ್ಟದ್ದೇವರು ಹಾಕಿದ ಮಾರ್ಗದಲ್ಲಿ ಸಾಗುತ್ತಿರುವ ಪಟ್ಟದ್ದೇವರು ಧರ್ಮ ಪ್ರಚಾರದ ಜತೆ ಶೈಕ್ಷಣಿಕ ಕ್ರಾಂತಿಗೂ ಚಾಲನೆ ನೀಡಿದ್ದಾರೆ. ಅವರ ಅಮೃತ ಮಹೋತ್ಸವದಲ್ಲಿ ಪಾಲ್ಗೊಳ್ಳುವುದೇ ಭಾಗ್ಯವಿದ್ದಂತೆ ಎಂದರು.

ಮುಖಂಡ ಪ್ರವಿಣ ಪಾಟೀಲ್​, ಗುರುಶಾಂತ ಶಿವಣಕರ, ಶಿವಕುಮಾರ ಝುಲ್ಪೆ, ಸಂತೋಷ ಬಿರಾದಾರ, ಚಂದ್ರಕಾಂತ ಸಂಗಮೆ, ಪ್ರಕಾಶ ಮಾನಕರಿ, ಯಶವಂತ ಬಿರಾದಾರ, ಸುರೇಶ ಸೊಲ್ಲಾಪುರೆ, ಗುಂಡಪ್ಪ ದಾನಾ, ಶಿವಕುಮಾರ ಪಾಟೀಲ್​, ಸುಭಾಷ ಶಿವಣಕರ, ಪ್ರಕಾಶ ಸೊಲ್ಲಾಪುರೆ, ಸಂಗಮೇಶ ಟೊಣ್ಣೆ, ರಂಜನಾ ಶಿವಣಕರ, ಮಡಿವಾಳಪ್ಪ ಮಹಾಜನ ಇತರರಿದ್ದರು.

ಅವಿನಾಶ ಶಿವಣಕರ ಸ್ವಾಗತಿಸಿದರು. ಡಾ.ಸಂಜೀವಕುಮಾರ ಜುಮ್ಮಾ ನಿರೂಪಣೆ ಮಾಡಿದರು.