ಕಾಗದರಹಿತ ಸ್ಥಿರಾಸ್ತಿ ನೋಂದಣಿ

ಸಬ್‌ರಿಜಿಸ್ಟ್ರಾರ್ ಕಚೇರಿಯಲ್ಲಿ (Sub-Registrar's Office) ಆಸ್ತಿಗಳ ದಸ್ತಾವೇಜು ನೋಂದಣಿ ಕಾಗದರಹಿತ (ಪೇಪರ್‌ಲೆಸ್) ಸೇವೆಯಾಗಿ ಮಾರ್ಪಡಿಸಲು ವೇದಿಕೆ ಸಜ್ಜುಗೊಳಿಸಿದೆ. ಇತ್ತೀಚೆಗೆ ಡಿಜಿಟಲ್ ಇ-ಸ್ಟಾಂಪ್ ಸೇವೆ ಆರಂಭಿಸಿತ್ತು. ಕಾಗದರಹಿತ ರಿಜಿಸ್ಟ್ರೇಷನ್ (Paperless property registration )ಸೇವೆಗೆ ಕಾವೇರಿ 2.0 ತಂತ್ರಾಂಶವನ್ನು ಅಪ್‌ಗ್ರೇಡ್ ಮಾಡುತ್ತಿದ್ದು, ರಿಜಿಸ್ಟ್ರೇಷನ್ ಪ್ರಕ್ರಿಯೆ ಸಂಪೂರ್ಣ ಆನ್‌ಲೈನ್‌ನಲ್ಲೇ ನಡೆಯಲಿದೆ. ನೋಂದಣಿ ಬಳಿಕ ದಾಖಲೆ ಪತ್ರ ಕೈಗೆ ಸಿಗುವುದಿಲ್ಲ. ಬದಲಿಗೆ ಲಾಗಿನ್ ಐಡಿ ಪಾಸ್‌ವರ್ಡ್ ಸಿಗಲಿದ್ದು, ಏನೇ ವ್ಯವಹಾರ ಇದ್ದರೂ ಈ ಮೂಲಕವೇ ನಡೆಸಬೇಕಿದೆ.

ಜಮೀನು, ಸೈಟು, ಮನೆ, ವಾಣಿಜ್ಯ ಕಟ್ಟಡ ಇನ್ನಿತರ ಸ್ಥಿರಾಸ್ತಿಗಳ ಕ್ರಯ, ವಿಲ್, ದಾನಪತ್ರ, ಕರಾರು ಸೇರಿದಂತೆ ವಿವಿಧ ರೀತಿಯ ದಸ್ತಾವೇಜುಗಳ ನೋಂದಣಿಗೆ ಕಾಗದದ ಮೇಲೆ ಪಕ್ಷಕಾರರ ನಡುವಿನ ವ್ಯವಹಾರವನ್ನು ಮುದ್ರಿಸಲಾಗುತ್ತದೆ. ಆನಂತರ ಕಾವೇರಿ 2.0ನಲ್ಲಿ ಸಿಟಿಜನ್ ಲಾಗಿನ್‌ನಲ್ಲಿ ದಸ್ತಾವೇಜು ಮತ್ತು ಆಸ್ತಿಯ ವಿವರವನ್ನು ಸರ್ಕಾರದ ದತ್ತಾಂಶದಿಂದ ಸ್ವೀಕರಿಸಿ ಅಪ್‌ಲೋಡ್ ಮಾಡಲಾಗುತ್ತದೆ. ಸಬ್‌ರಿಜಿಸ್ಟ್ರಾರ್‌ಗಳು ಪರಿಶೀಲನೆ ನಡೆಸಿ ಸರಿ ಇದ್ದರೆ ನೋಂದಣಿ ಮತ್ತು ಮುದ್ರಾಂಕ ಶುಲ್ಕ ಪಾವತಿಗೆ ವಾಪಸ್ ಸಿಟಿಜನ್ ಲಾಗಿನ್‌ಗೆ ಕಳುಹಿಸುತ್ತಾರೆ. ಒಂದು ವೇಳೆ ದೋಷ ಇದ್ದರೂ ಹಿಂತಿರುಗಿಸುತ್ತಾರೆ. ಇದಾದ ಮೇಲೆ ಪಕ್ಷಕಾರರು, ಆನ್‌ಲೈನ್ ಪೇಮೆಂಟ್ ಗೇಟ್‌ವೇನಲ್ಲಿ ನೋಂದಣಿ ಮತ್ತು ಮುದ್ರಾಂಕ ಶುಲ್ಕವನ್ನು ಪಾವತಿ ಮಾಡಬೇಕಾಗಿದೆ. ಇದೇ ವೇಳೆ ಎರಡು ಕಡೆಯ ಪಕ್ಷಕಾರರು ಆಧಾರ್ ಆಧಾರಿತ ಇ-ಸೈನ್ ಅಥವಾ ಡಿಜಿಟಲ್ ಸಿಗ್ನೇಚರ್ ಪ್ರಮಾಣಪತ್ರ (ಡಿಎಸ್‌ಸಿ) ಮೂಲಕ ರುಜು ಮಾಡಬೇಕು. ಡಿಜಿಟಲ್ ಸಹಿ ಮಾಡಿ ನೋಂದಣಿಗಾಗಿ ಸಬ್ ರಿಜಿಸ್ಟ್ರಾರ್‌ಗಳ ಲಾಗಿನ್‌ಗೆ ಕಳುಹಿಸಬೇಕು.

ಭೌತಿಕ ದಾಖಲೆ ಅಥವಾ ಕಾಗದವನ್ನು ಅಧಿಕಾರಿ ಮುಂದೆ ತೆಗೆದುಕೊಂಡು ಹೋಗುವ ಅಗತ್ಯ ಇರುವುದಿಲ್ಲ. ಲಾಗಿನ್‌ನಲ್ಲಿ ಬಂದ ಕಾಗದರಹಿತ ದಾಖಲೆಯನ್ನು ನೋಂದಣಿ ಕಾಯ್ದೆ ಮತ್ತು ನಿಯಮಗಳ ಅನ್ವಯ ಪರಿಶೀಲನೆ ನಡೆಸಿ ಸಬ್ ರಿಜಿಸ್ಟ್ರಾರ್, ಪಕ್ಷಕಾರರು, ಸಾಕ್ಷಿಗಳ ಛಾಯಚಿತ್ರ ಮತ್ತು ಬೆರಳಚ್ಚು ಗುರುತನ್ನು ಡಿಜಿಟಲ್ ಯಂತ್ರದ ಮೂಲಕವೇ ಸೆರೆಹಿಡಿದುಕೊಳ್ಳಲಿದ್ದಾರೆ. ಅಂತಿಮವಾಗಿ ಸಬ್‌ರಿಜಿಸ್ಟ್ರಾರ್, ಡಿಜಿಟಲ್ ಸಹಿ ಮಾಡಿ ದಸ್ತಾವೇಜು ರಿಜಿಸ್ಟ್ರೇಷನ್ ಪ್ರಕ್ರಿಯೆ ಪೂರ್ಣ ಮಾಡಲಿದ್ದಾರೆ. ಬಳಿಕ ಶುಲ್ಕ ಪಾವತಿ ರಸೀದಿ ಮತ್ತು ದಾಖಲೆಯನ್ನು ಸಂಗ್ರಹಿಸಿ ಪಕ್ಷಕಾರರಿಗೆ (ಸಂಬಂಧಪಟ್ಟ ವ್ಯಕ್ತಿಗೆ) ಲಾಗಿನ್‌ನಲ್ಲಿ ಲಭ್ಯವಾಗುವಂತೆ ಮಾಡುತ್ತಾರೆ.

"

ನೋಂದಾಯಿತ ದಸ್ತಾವೇಜು ದಾಖಲೆ ಸ್ವಯಂಚಾಲಿತವಾಗಿ ಕಂದಾಯ ಇಲಾಖೆ ಸ್ಥಾಪಿಸಿರುವ ಕರ್ನಾಟಕ ನೋಂದಾಯಿತ ದಾಖಲೆ ಸಂಗ್ರಹಾಲಯ ಮತ್ತು ಡಿಜಿ ಲಾಕರ್‌ನಲ್ಲಿ ಸೇವ್ ಆಗಲಿದೆ. ಈ ದಾಖಲೆಯನ್ನು ಡೌನ್‌ಲೋಡ್ ಮಾಡಲು ಅಥವಾ ಮುದ್ರಿಸಲು ವಿಶಿಷ್ಟ ದಾಖಲೆ ಸಂಖ್ಯೆಯನ್ನು ವಿತರಿಸಲಾಗುತ್ತದೆ. ಡಿಜಿಟಲ್ ದಾಖಲೆಯು ಅಧಿಕೃತ ಮತ್ತು ಕಾನೂನುಬದ್ಧವಾಗಿ ಮಾನ್ಯವಾದ ನೋಂದಾಯಿತ ದಾಖಲೆಯಾಗಲಿದೆ. ಡಿಜಿಟಲ್ ಸಹಿ ಇರುವುದರಿಂದ ಪ್ರಮಾಣೀಕೃತ ಪ್ರತಿಯಾಗಿ ಬಳಸಿಕೊಳ್ಳಲು ಅನುಕೂಲವಾಗಲಿದೆ.

ರಾಜ್ಯದ ಎಲ್ಲೆಡೆ ಕಾಗದರಹಿತ ರಿಜಿಸ್ಟ್ರೇಷನ್ ಸೇವೆ ಸಂಬಂಧ ಜನವರಿ 27 ರಿಂದ 31ರವರೆಗೆ ತರಬೇತಿ ಶಿಬಿರವನ್ನು ನೋಂದಣಿ ಮತ್ತು ಮುದ್ರಾಂಕ ಇಲಾಖೆ ಆಯೋಜನೆ ಮಾಡಿದೆ. ಎಂಟು ಜಿಲ್ಲಾ ನೋಂದಣಾಧಿಕಾರಿಗಳಿಗೆ ಈ ಜವಾಬ್ದಾರಿ ವಹಿಸಲಾಗಿದೆ. ದಸ್ತಾವೇಜು ಬರಹಗಾರರು, ವಕೀಲರು, ಕರ್ನಾಟಕ ಒನ್, ಬೆಂಗಳೂರು ಒನ್, ಗ್ರಾಮ ಒನ್, ಬಾವೂಜಿ ಸೇವಾ ಕೇಂದ್ರದ ಸಿಬ್ಬಂದಿ ಮತ್ತು ಸಾರ್ವಜನಿಕರಿಗೆ ಪೇಪರ್‌ಲೆಸ್ ಸೇವೆ ಕುರಿತು ಕಾರ್ಯಾಗಾರ ಏರ್ಪಡಿಸಲಾಗಿದೆ.

ಸಬ್ ರಿಜಿಸ್ಟ್ರಾರ್ ಕಚೇರಿಯಲ್ಲಿ ದಸ್ತಾವೇಜು ರಿಜಿಸ್ಟ್ರೇಷನ್ ಮುಗಿದ ಮೇಲೆ ಭೌತಿಕ ಅಥವಾ ದಾಖಲೆ ಪತ್ರದ ಬದಲಿಗೆ ವಿಶಿಷ್ಟ ಸಂಖ್ಯೆ ನೀಡಲಿದ್ದಾರೆ. ಅದನ್ನು ಬಳಸಿಕೊಂಡು ಡಿಜಿಲಾಕರ್ ಅಥವಾ ಕಾವೇರಿ 2.0 ತಂತ್ರಾಂಶದಲ್ಲಿ ದೃಢೀಕರಿಸಿದ ದಾಖಲೆಯನ್ನು ಡೌನ್‌ಲೋಡ್ ಮಾಡಿಕೊಳ್ಳಬೇಕು. ಈ ಮೊದಲು ಸಿಗುತ್ತಿದ್ದ ಗ್ರೀನ್ ಶೀಟ್ ಮೇಲೆ ಸಹಿ ಅಥವಾ ಬೆರಳಚ್ಚು ಒತ್ತುತ್ತಿದ್ದ ದಾಖಲೆ ಪತ್ರ ಸಿಗುವುದಿಲ್ಲ.

* ದಸ್ತಾವೇಜಿಗೆ ವಿಶಿಷ್ಟ ಸಂಖ್ಯೆ ಸಿಗಲಿದ್ದು, ಕಳ್ಳತನದ ಭಯವಿಲ್ಲ

* ದಾಖಲೆ ತಿರುಚಿ ಬೇರೆಯವರಿಗೆ ಮಾರಾಟ ಮಾಡುವ ಭೂಗಳ್ಳರಿಗೆ ಕಡಿವಾಣ

* ಭೌತಿಕ ದಾಖಲೆ ಇಲ್ಲದೆ ಇರುವುದರಿಂದ ಕಾಗದ ಸಂಗ್ರಹಿಸುವ ತಂಟೆ ಇಲ್ಲ

* ಸುಲಭ ಸಾಗಾಟ, ಎಲ್ಲಿ ಬೇಕಾದರೂ ಡೌನ್‌ಲೋಡ್ ಮಾಡಿಕೊಳ್ಳಬಹುದು

* ಸಬ್ ರಿಜಿಸ್ಟ್ರಾರ್ ಕಚೇರಿ, ಬ್ಯಾಂಕ್ ವ್ಯವಹಾರಕ್ಕೆ ವಿಶಿಷ್ಟ ಸಂಖ್ಯೆ ಕೊಟ್ಟರೆ ಸಾಕು

* ಅನಕ್ಷರಸ್ಥರು ಪೇಪರ್‌ಲೆಸ್ ಸೇವೆ ಬಳಕೆಗೆ ಬೇರೆಯವರ ಅವಲಂಬನೆ

* ಡಿಜಿಟಲ್ ದಾಖಲೆ ಆಗಿರುವ ಕಾರಣ ತಂತ್ರಜ್ಞಾನದ ಜ್ಞಾನ ಅಗತ್ಯ

* ವಿಶಿಷ್ಟ ಸಂಖ್ಯೆ ಮರೆತರೆ ಅಥವಾ ಕೇಂದ್ರ ದತ್ತಾಂಶ ನಾಶವಾದರೆ ರಿಕವರಿ ಕಷ್ಟ

* ಮೂಲ ದಾಖಲೆ ಬದಲು ದೃಢೀಕರಿಸಿದ ದಾಖಲೆಯಷ್ಟೇ ಕೈಗೆ ಸಿಗಲಿದೆ

* ಡಿಜಿಟಲ್ ಇ-ಸಹಿ, ಛಾಯಾಚಿತ್ರ, ಬೆರಳಚ್ಚು ಮಾಡಲು ತಾಂತ್ರಿಕ ದೋಷ ಅಡ್ಡಿ ಸಾಧ್ಯತೆ