ರಾಜ್ಯ

ಸೌಕರ್ಯ ವಂಚಿತ ಕೋಥಳಿವಾಡಿ ಗ್ರಾಮ

ಸೌಕರ್ಯ ವಂಚಿತ ಕೋಥಳಿವಾಡಿ ಗ್ರಾಮ
ಸೌಕರ್ಯ ವಂಚಿತ ಕೋಥಳಿವಾಡಿ ಗ್ರಾಮ
ಆನಂದಕುಮಾರ ಭಮ್ಮನ್ನವರ
Published on: 

ಪ್ರಮುಖ ಮುಖ್ಯಾಂಶಗಳು

  • ಸೌಕರ್ಯ ವಂಚಿತ ಕೋಥಳಿವಾಡಿ ಗ್ರಾಮ
  • ರಸ್ತೆ,ನೀರು,ಶಾಲೆ ಇಲ್ಲದೇ ಪರದಾಟ
  • ಅಧಿಕಾರಿಗಳಿಂದ ನಿರ್ಲಕ್ಷ್ಯಕ್ಕೆ ಒಳಗಾದ ಗ್ರಾಮ
ಮೂಲಸೌಕರ್ಯ ವಂಚಿತ ಕೋಥಳಿವಾಡಿ
| ರಸ್ತೆ, ನೀರು, ಶೌಚಗೃಹ ಇಲ್ಲದೇ ಪರದಾಟ | ಶಿಕ್ಷಣದಿಂದ ಮಕ್ಕಳು ವಂಚಿತ
ಆನದ ಭಮ್ಮನ್ನವರ ಚಿಕ್ಕೋಡಿ
ಸ್ವಾತಂತ್ರ ಬಂದು ೭೯ ವರ್ಷ ಕಳೆದರೂ ತಾಲೂಕು ಕೇಂದ್ರದಿಂದ ಕೇವಲ ೧೨ ಕಿ.ಮೀ. ದೂರದಲ್ಲಿರುವ ಈ ಗ್ರಾಮದ ಜನರಿಗೆ ಇನ್ನೂ ಮೂಲ ಸೌಕರ್ಯಗಳೇ ದೊರೆತಿಲ್ಲ. ರಸ್ತೆ, ಸಾರಿಗೆ ಬಸ್, ಶುದ್ಧ ಕುಡಿಯುವ ನೀರು, ಸಿಸಿರಸ್ತೆ, ಶೌಚಗೃಹ ತಾಲೂಕಿನ ಕೋಥಳಿವಾಡಿ ಗ್ರಾಮದ ಜನರಿಗೆ ಮರೀಚಿಕೆಯಾಗಿವೆ.
ಕೋಥಳಿ ಗ್ರಾಪಂ ವ್ಯಾಪ್ತಿಗೆ ಒಳಪಡುವ ಈ ಗ್ರಾಮದ ಹೊರವಲಯದಲ್ಲಿ ೭೫ಕ್ಕೂ ಹೆಚ್ಚು ಕುಟುಂಬಗಳಲ್ಲಿ ೨೫೦ಕ್ಕೂ ಅಧಿಕ ಜನರು ವಾಸಿಸುತ್ತಿದ್ದಾರೆ. ಚಿಕ್ಕೋಡಿ-ನಿಪ್ಪಾಣಿ ರಾಜ್ಯ ಹೆದ್ದಾರಿಯಿಂದ 3 ಕಿ.ಮೀ. ದೂರದ ಗುಡ್ಡಗಾಡು ಪ್ರದೇಶದಲ್ಲಿ ವಾಸಿಸುವ ಈ ಜನರ ಪರಿಸ್ಥಿತಿ ಹೇಳತೀರದು.
ರಸ್ತೆ ಇಲ್ಲದೇ ಕಾಲ್ನಡಿಗೆ:
ಜನರಿಗೆ ಪಟ್ಟಣ ತಲುಪಬೇಕಾದರೆ ೩ ಕಿ.ಮೀ. ಕಚ್ಚಾ ರಸ್ತೆಯಲ್ಲಿ ಕಾಲ್ನಡಿಗೆ ಮೂಲಕ ಸಾಗಿ ಹಳ್ಳ ದಾಟಿ ಕೋಥಳಿ ಅಥವಾ ಹಂದ್ಯಾನವಾಡಿ ಗ್ರಾಮ ತಲುಪಬೇಕು. ಸುಸಜ್ಜಿತ ರಸ್ತೆ ಇಲ್ಲದ್ದರಿಂದ ಗ್ರಾಮಕ್ಕೆ ಸಾರಿಗೆ ಬಸ್ ಅಥವಾ ಖಾಸಗಿ ವಾಹನಗಳು ಬರುವುದಿಲ್ಲ.
ಶಾಲೆ ಬಿಡುತ್ತಿರುವ ಮಕ್ಕಳು:
ಗ್ರಾಮದಲ್ಲಿ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆ ಇದ್ದು, ಇಲ್ಲಿ 1-5 ನೇ ತರಗತಿ ಇದೆ. ನಂತರದ ಹಿರಿಯ ಪ್ರಾಥಮಿಕ ಹಾಗೂ ಚಿಕಿತ್ಸೆಶಾಲೆಗೆ ಹೋಗಬೇಕೆಂದರೆ ೩ ಕಿ.ಮೀ. ಕಾಲ್ನಡಿಗೆ ಮೂಲಕ ಕ್ರಮಿಸಿ ಶಾಲೆ ತಲುಪಬೇಕಿದೆ. ಹೀಗಾಗಿ, ಮಕ್ಕಳು ಕಿರಿಯ ಪ್ರಾಥಮಿಕ ಹಂತದಲ್ಲಿ ಶಾಲೆ ಬಿಡುತ್ತಿದ್ದಾರೆ. ಸಮರ್ಪಕ ರಸ್ತೆ, ಸಾರಿಗೆ ವ್ಯವಸ್ಥೆ ಇಲ್ಲದ ಮಕ್ಕಳು ಉನ್ನತ ಶಿಕ್ಷಣದಿಂದ ವಂಚಿತರಾಗುವವರಾಗಿದ್ದಾರೆ.
ಶೌಚಾಲಯವೇ ಇಲ್ಲದ ಗ್ರಾಮ:
ರಾಜ್ಯ ಹಾಗೂ ಕೇಂದ್ರ ಸರ್ಕಾರ ಬಯಲುಶೌಚಮುಕ್ತ ಗ್ರಾಮಗಳನ್ನು ರೂಪಿಸಲು ಕೋಟ್ಯಂತರ ರೂ. ವ್ಯಯಿಸುತ್ತಿವೆ. ಆದರೆ, ಈ ಗ್ರಾಮದಲ್ಲಿ ಬಯಲುಶೌಚವೇ ಗತಿಯಾಗಿದೆ. ಗ್ರಾಮದ ಮನೆಗಳಲ್ಲಿ ವೈಯಕ್ತಿಕ ಶೌಚಗೃಹಗಳಿಲ್ಲ. ಸಾರ್ವಜನಿಕ ಶೌಚಾಲಯಗಳನ್ನು ನಿರ್ಮಿಸಿಲ್ಲ. ಹೀಗಾಗಿ, ಮಕ್ಕಳು, ವೃದ್ಧರು, ಮಹಿಳೆಯರು ನಿತ್ಯವೂ ಪರದಾಡುವಂತಾಗಿದೆ. ಅದರಲ್ಲೂ ಮಳೆಗಾಲದಲ್ಲಂತೂ ಪಡಬಾರದ ಕಷ್ಟ ಪಡುತ್ತಿರುವುದು ಮುಜುಗರದ ಸಂಗತಿಯಾಗಿದೆ.
ನೀರಿನ ಟ್ಯಾಂಕ್ ಇದೆ, ನೀರಿಲ್ಲ:
ಗ್ರಾಮದ ನೀರಿನ ಟ್ಯಾಂಕ್ ನಿರ್ಮಿಸಲಾಗಿದೆ. ಆದರೆ ಟ್ಯಾಂಕಿಗೆ ನೀರು ತುಂಬಿಸಲು ಜಲಮೂಲವೇ ಇಲ್ಲ. ಪರಿಣಾಮ ಜನರು ಬಾವಿ, ಕೊಳವೆಬಾವಿಗಳನ್ನೇ ನೀರಿಗಾಗಿ ಅವಲಂಬಿಸಿದ್ದಾರೆ. ಗ್ರಾಮದಲ್ಲಿ ಚರಂಡಿ, ಸಿಸಿ ರಸ್ತೆ ನಿರ್ಮಿಸಲಾಗಿದೆ.
----------
ಕೋಟ್...
ಯಾವುದೇ ಮೂಲ ಸೌಕರ್ಯಗಳಿಲ್ಲ. ಸಮರ್ಪಕ ರಸ್ತೆ, ಸಾರಿಗೆ, ಆರೋಗ್ಯ ಕೇಂದ್ರ, ಶಾಲೆ ಮೂಲಸೌಕರ್ಯಗಳು ಇಲ್ಲದೇ ಮಹಿಳೆಯರು, ವೃದ್ಧರು, ಮಕ್ಕಳು ಸಂಕಷ್ಟದಲ್ಲಿದ್ದಾರೆ. ಇನ್ನಾದರೂ ಸಂಬಧಪಟ್ಟ ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳು ಎಚ್ಚೆತ್ತುಕೊಳ್ಳಬೇಕು.
| ಪ್ರವೀಣಾ ಮೇಘಣ್ಣವರ
ಗೃಹಿಣಿ, ಕೋಥಳಿವಾಡಿ
----------
ಕೋಟ್...
ಕೋಥಳಿವಾಡಿಯಲ್ಲಿ ಹೆಚ್ಚಿನ ಜನರು ಹೆಚ್ಚಾಗಿ ತೋಟಪಟ್ಟಿಗಳಲ್ಲಿ ವಾಸವಾಗಿದ್ದಾರೆ. ಗ್ರಾಮಕ್ಕೆ ರಸ್ತೆ ನಿರ್ಮಾಣ ಕುರಿತು ಸರ್ಕಾರಕ್ಕೆ ಪ್ರಸ್ತಾವನೆ ಕಳುಹಿಸಲಾಗಿದೆ. ಖಾಸಗಿ ಜಮೀನು ಸಾರ್ವಜನಿಕ ಶೌಚಗೃಹ ನಿರ್ಮಿಸುವ ಸಮಸ್ಯೆಯಾಗಿದೆ, ವೈಯಕ್ತಿಕ ಶೌಚಗೃಹಗಳನ್ನು ನಿರ್ಮಿಸಲು ತಿಳಿಹೇಳಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net