ನಂ.1 ಇಟಗಿ ಗ್ರಾಮದಲ್ಲಿ 9ನೇ ತರಗತಿ ಆರಂಭಕ್ಕೆ ಕ್ರಮವಹಿಸಲಿ

ನಂ.1 ಇಟಗಿಯ ಸಹಿಪ್ರಾ ಶಾಲೆಯಲ್ಲಿ ಎಲ್‌ಕೆಜಿಯಿಂದ 8ನೇ ತರಗತಿತನಕ 292ವಿದ್ಯಾರ್ಥಿಗಳಿದ್ದು, ಈ ಪೈಕಿ 170 ವಿದ್ಯಾರ್ಥಿನಿಯರಿದ್ದಾರೆ. ಕಳೆದ ಸಾಲಿನ 8ನೇ ತರಗತಿಯಲ್ಲಿ 19 ವಿದ್ಯಾರ್ಥಿಗಳಿದ್ದು, 16 ವಿದ್ಯಾರ್ಥಿಗಳು ಉತ್ತೀರ್ಣಗೊಂಡಿದ್ದಾರೆ. ಪ್ರಸಕ್ತ ಸಾಲಿನಲ್ಲಿ 8ನೇ ತರಗತಿಗೆ 13ವಿದ್ಯಾರ್ಥಿನಿಯರಿದ್ದಾರೆ. ಗ್ರಾಮೀಣ ಭಾಗದ ವಿದ್ಯಾರ್ಥಿನಿಯರ ಹಿತದೃಷ್ಟಿಯಿಂದ 9ನೇ ತರಗತಿ ಆರಂಭಿಸುವಂತೆ ಎಸ್‌ಡಿಎಂಸಿ, ಗ್ರಾಮಸ್ಥರು ಒತ್ತಾಯಿಸುತ್ತಿದ್ದರೂ ಕಡೆಗಣಿಸಲಾಗಿದೆ.

ಎಂಟನೇ ತರಗತಿ ಉತ್ತೀರ್ಣಗೊಂಡ ವಿದ್ಯಾರ್ಥಿಗಳು 9ನೇ ತರಗತಿಗಾಗಿ 12 ಕಿ.ಮೀ.ದೂರದ ಕಂಪ್ಲಿ ಅಥವಾ 8 ಕಿ.ಮೀ ದೂರದ ಸಿರಗುಪ್ಪ ತಾಲೂಕಿನ ಮಣ್ಣೂರಿಗೆ ಹೋಗಬೇಕಿದೆ. ಬಸ್‌ಗಳ ವ್ಯವಸ್ಥೆಯೂ ಸಮರ್ಪಕವಾಗಿಲ್ಲ. ಇದರಿಂದಾಗಿ 9ನೇ ತರಗತಿಗೆ ಹೆಣ್ಣುಮಕ್ಕಳನ್ನು ಕಳಿಸಲು ಪಾಲಕರು ಹಿಂದೇಟು ಹಾಕುತ್ತಿದ್ದಾರೆ. ಮುಖ್ಯಶಿಕ್ಷಕರು, ಎಸ್‌ಡಿಎಂಸಿ ಪದಾಧಿಕಾರಿಗಳು ಪಾಲಕರ ಮನವೊಲಿಸಿ ಒಂಬತ್ತನೇ ತರಗತಿಯನ್ನು ಬೇರೆ ಶಾಲೆಗಳಲ್ಲಿ ಓದಲು ಕಳಿಸುತ್ತಿದ್ದಾರೆ. ನಂ.1 ಇಟಗಿಯಲ್ಲಿ 9ನೇ ತರಗತಿ ಆರಂಭವಾದರೆ ನಂ.2 ಮುದ್ದಾಪುರ ಗ್ರಾಮದ ವಿದ್ಯಾರ್ಥಿಗಳಿಗೆ ಅನುಕೂಲವಾಗಲಿದೆ.

"