6ನೇ ಕ್ಲಾಸಿನ ಕನ್ನಡ ಪುಸ್ತಕಕ್ಕೆ 'ಕೃಷ್ಣ' ಹೆಸರು, ಮಾಂಸಾಹಾರದ ಉಲ್ಲೇಖವೇ ಇಲ್ಲ: NCERT ವಿರುದ್ಧ ಶಿಕ್ಷಣ ತಜ್ಞರು ಕಿಡಿ!

ಬೆಂಗಳೂರು: ಕರ್ನಾಟಕದಲ್ಲಿ ಶಿಕ್ಷಣ ತಜ್ಞರಿಂದ, NCERTಯ 6ನೇ ಕ್ಲಾಸಿನ ಕನ್ನಡ ಪುಸ್ತಕದ ವಿರುದ್ಧ ಆಕ್ರೋಶ ವ್ಯಕ್ತವಾಗಿದೆ. ಪಠ್ಯಪುಸ್ತಕಕ್ಕೆ 'ಕೃಷ್ಣ' ಎಂದು ಹೆಸರಿಸಿರುವುದು ಮತ್ತು ಸಸ್ಯಾಹಾರಿ ಆಹಾರ ಪದ್ಧತಿಯನ್ನು ಮಾತ್ರ ಪ್ರಚಾರ ಮಾಡಿ, ಮಾಂಸಹಾರದ ಬಗ್ಗೆ ಉಲ್ಲೇಖಿಸಿಯೇ ಇಲ್ಲ ಎಂದು ಸಾಹಿತಿಗಳು ಹಾಗೂ ಶಿಕ್ಷಣ ತಜ್ಞರು ಸೇರಿದಂತೆ, ಹೋರಾಟಗಾರರು ಕಿಡಿಕಾರಿದ್ದಾರೆ.

'R3ಎನ್ನುವುದು 6ನೇತರಗತಿಯಿಂದ ಕಡ್ಡಾಯಗೊಳಿಸಿರುವ ಮೂರನೇ ಭಾಷಾ ವಿಷಯವಾಗಿದೆ. ಇದರಲ್ಲಿ ಸಾಂಸ್ಕೃತಿಕೆ ಹೇರಿಕೆಯನ್ನು ಅಸ್ತ್ರವನ್ನಾಗಿ ಬಳಕೆ ಮಾಡಿಕೊಳ್ಳಲಾಗಿದೆ. ಶಾಲಾ ಪಠ್ಯಗಳಿಗೆ ಹಿಂದೂ ದೇವರ ಹೆಸರನ್ನು ಇಟ್ಟಿರುವುದು ಶಿಕ್ಷಣದಲ್ಲಿ ಧಾರ್ಮಿಕ ಮತ್ತು ಪುರಾಣ ಆಧಾರಿತ ಚೌಕಟ್ಟನ್ನು ತರಲು ಮಾಡುತ್ತಿರುವ ವ್ಯವಸ್ಥಿತ ಪ್ರಯತ್ನ' ಎಂದು ಶಿಕ್ಷಣದ ಮೂಲಭೂತ ಹಕ್ಕಿಗಾಗಿ ಸಾರ್ವಜನಿಕ ಒಕ್ಕೂಟ'ದ ಅಡಿಯಲ್ಲಿ ಒಂದಾಗಿರುವ ಶಿಕ್ಷಣ ತಜ್ಞರ ಸಮೂಹವು ಆರೋಪಿಸಿದೆ.

'ರಾಷ್ಟ್ರೀಯ ಶಿಕ್ಷಣ ನೀತಿ ಮತ್ತು ರಾಷ್ಟ್ರೀಯ ಪಠ್ಯಕ್ರಮದ ಚೌಕಟ್ಟು ಅಡಿಯಲ್ಲಿ ತರಲಾದ ಈ ಪಠ್ಯಪುಸ್ತಕಕ್ಕೆ 'ಕೃಷ್ಣ' ಎಂದು ಹೆಸರಿಸಿರುವುದು ಕೇಸರೀಕರಣದ ಭಾಗವಾಗಿದೆ. ಕರ್ನಾಟಕದ ಶೈಕ್ಷಣಿಕ ಗುರುತು ಪಂಪ, ಕುವೆಂಪು, ಶಿವರಾಮ ಕಾರಂತ ಮತ್ತು ಬಸವಣ್ಣನವರಂತಹ ದಾರ್ಶನಿಕರನ್ನು ಬಿಂಬಿಸಬೇಕೇ ಹೊರತು ಇಂತಹ ಧಾರ್ಮಿಕ ಚೌಕಟ್ಟನ್ನಲ್ಲ' ಎಂದು ಶಿಕ್ಷಣ ತಜ್ಞರು ಗುಡುಗಿದರು.

ಕರಾವಳಿ, ಉತ್ತರ ಕರ್ನಾಟಕ, ಮಲೆನಾಡು ಮತ್ತು ಹಳೆ ಮೈಸೂರು ಭಾಗದ ಸಾಹಿತ್ಯ, ಜಾನಪದ ಹಾಗೂ ಸಾಂಸ್ಕೃತಿಕ ಹಿನ್ನೆಲೆಯನ್ನು ಈ ಪಠ್ಯಪುಸ್ತಕದಲ್ಲಿ ಸಂಪೂರ್ಣವಾಗಿ ನಿರ್ಲಕ್ಷಿಸಲಾಗಿದೆ. ಕರ್ನಾಟಕದ ಸಂಸ್ಕೃತಿ, ವೈಭವ ಪಠ್ಯದಲ್ಲಿ ಇಲ್ಲ. ಅಲ್ಲದೆ, ಇದು 6ನೇ ತರಗತಿಯ ಮಕ್ಕಳ ವಯಸ್ಸಿಗೆ ತಕ್ಕ ಕಥೆಗಳು ಅಥವಾ ಚಿತ್ರಗಳು ಇಲ್ಲ ಎಂದು ಕಿಡಿಕಾರಿದರು.

3ನೇ ತರಗತಿ ಪುಸ್ತಕಕ್ಕೆ ಮೃದುಲಾ ಎಂದು ಹೆಸರಿಡಲಾಗಿದೆ. ಇಂದು ಕೇಸರಿಕರಣಗೊಳಿಸುವ ಭಾಗ ಅಲ್ಲವೇ? ಎಂದು ಕಿಡಿಕಾರಿದ್ದಾರೆ.

ಪಠ್ಯಪುಸ್ತಕದಲ್ಲಿರುವ 'ಆರೋಗ್ಯವೇ ಭಾಗ್ಯ' ಎಂಬ ಪಾಠದಲ್ಲಿ ಸಮತೋಲಿತ ಆಹಾರದ ಪಟ್ಟಿಯಲ್ಲಿ ಕೇವಲ ಹಾಲು, ಹಸಿರು ತರಕಾರಿ, ಹಣ್ಣುಗಳು ಮತ್ತು ಒಣಹಣ್ಣುಗಳನ್ನು ಮಾತ್ರ ಉಲ್ಲೇಖಿಸಲಾಗಿದೆ. ಇದರಲ್ಲಿ ಮೊಟ್ಟೆ, ಮೀನು ಮತ್ತು ಮಾಂಸಾಹಾರ, ಶೇಂಗಾದೊಂದಿಗೆ ರೊಟ್ಟಿ ಊಟವನ್ನು ಕೈಬಿಡಲಾಗಿದೆ ಎನ್ನಲಾಗಿದೆ.

ಕರ್ನಾಟಕದ ಡಿಎಸ್‌ಇಆರ್‌ಟಿ ಸಂಸ್ಥೆಯನ್ನು ಬದಿಗೊತ್ತಿ ಈ ಪಠ್ಯವನ್ನು ಸಿದ್ಧಪಡಿಸಲಾಗಿದೆ. ಇದೇ ಪಠ್ಯವನ್ನು 6ನೇ ಮತ್ತು 9ನೇ ತರಗತಿ ಎರಡಕ್ಕೂ ಬಳಸಲು ಸಿಬಿಎಸ್‌ಇ ಮುಂದಾಗಿರುವುದನ್ನು ಹೋರಾಟಗಾರರು ಪ್ರಶ್ನಿಸಿದ್ದಾರೆ. ಎನ್​ಸಿಇಆರ್​ಟಿ ಧರ್ಮ ಹಾಗೂ ದೈವದ ರಾಜಕಾರಣದತ್ತ ಮುಖ ಮಾಡಿದೆ ಎಂದು ಕಿಡಿಕಾರಿದರು.