ರಾಜ್ಯ

ಇಳಿಮುಖದತ್ತ ಮಸ್ಕಿ ಕೆರೆ ನೀರಿನಮಟ್ಟ

ಮಸ್ಕಿಯ ಜನತೆಗೆ ಕುಡಿವ ನೀರಿನ ಕೆರೆಯಲ್ಲಿ ನೀರಿನಮಟ್ಟ ಕುಸಿದಿರುವುದು.
ಮಸ್ಕಿಯ ಜನತೆಗೆ ಕುಡಿವ ನೀರಿನ ಕೆರೆಯಲ್ಲಿ ನೀರಿನಮಟ್ಟ ಕುಸಿದಿರುವುದು.
JAGADEESH KUMBAR
Published on: 

ಪ್ರಮುಖ ಮುಖ್ಯಾಂಶಗಳು

  • ಜೀವಜಲಕ್ಕಾಗಿ ಜನರ ಪರದಾಟ
  • ಹತ್ತು ದಿನಗಳಿಗೆ ಆಗುವಷ್ಟು ಸಂಗ್ರಹ
ಮಸ್ಕಿ: ಕುಡಿವ ನೀರಿನ ಕೆರೆಯಲ್ಲಿ ಬರೀ ಮೂರು ಅಡಿ ಕೇವಲ 10 ದಿನಗಳಿಗೆ ಆಗುವಷ್ಟು ಜಲವಿದೆ. ಇದರಿಂದ ಪಟ್ಟಣದ ಜನತೆಗೆ ಹಾಹಾಕಾರ ಉಂಟಾಗುವ ಸಾಧ್ಯತೆ ದಟ್ಟವಾಗಿದೆ. 
ಇಪ್ಪತ್ಮೂರು ವಾರ್ಡ್‌ಗಳ ನಿವಾಸಿಗಳಿಗೆ ಕುಡಿವ ನೀರು ಪೂರೈಸುವ ಶಾಶ್ವತ ಕುಡಿವ ನೀರಿನ ಎರಡೂ ಕೆರೆಗಳಲ್ಲಿ ಜಲ ಪ್ರಮಾಣ ಇಳಿಮುಖವಾಗಿ ಜನರು ಪರದಾಡುವ ಪರಿಸ್ಥಿತಿ ಬಂದೊದಗಿದೆ. ಕುಡಿವ ನೀರಿಗಾಗಿ 28 ಅಡಿ ಸಾಮರ್ಥ್ಯದ ಒಂದು ಕೆರೆ, 10 ಅಡಿ ಸಾಮರ್ಥ್ಯದ ಮತ್ತೊಂದು ಕೆರೆ ನಿರ್ಮಿಸಲಾಗಿದೆ. ಎರಡು ಕೆರೆಗಳಿದ್ದರೂ ಸಮಸ್ಯೆ ಮಾತ್ರ ತಪ್ಪಿಲ್ಲ. ಈ ನಡುವೆ ಬೋರ್‌ವೆಲ್‌ಗಳು ಬಹುತೇಕ ಬತ್ತಿದ್ದು, ಇನ್ನಷ್ಟು ಸಂಕಷ್ಟಕ್ಕೀಡುಮಾಡಿದೆ.
ಕಳೆದೊಂದು ತಿಂಗಳಿಂದ ಎಂಟು ದಿನಕ್ಕೊಮ್ಮೆ ಕುಡಿವ ನೀರು ಸರಬರಾಜು ಆಗುತ್ತಿದೆ. ಈಗ ಕೆರೆಯಲ್ಲಿ ಕೇವಲ ಮೂರು ಅಡಿ ನೀರು ಉಳಿದಿದ್ದು, ಕೆಲ ದಿನ ಮಾತ್ರ ನೀರು ಪೂರೈಕೆ ಮಾಡಲು ಸಾಧ್ಯವಾಗುತ್ತದೆ. ಮುಂದೇನು ಎಂಬ ಚಿಂತೆ ಜನರನ್ನು ಕಾಡಲು ಶುರುಮಾಡಿದೆ. 
ಮಸ್ಕಿ ತಾಲೂಕು ಕೇಂದ್ರವಾಗಿದ್ದು, ಪುರಸಭೆ ವ್ಯಾಪ್ತಿಯಲ್ಲಿ 30 ಸಾವಿರಕ್ಕೂ ಅಧಿಕ ಜನ ವಾಸಿಸುತ್ತಿದ್ದಾರೆ. ಪುರಸಭೆಯಿಂದ ನೀರು ಪೂರೈಕೆ ಮಾಡಲು ಪ್ರಯತ್ನ ಮುಂದುವರಿದಿದೆ. ಜುಲೈ ಆರಂಭದಲ್ಲಿ ತುಂಗಭದ್ರಾ ಜಲಾಶಯದಿಂದ ಎಡದಂಡೆ ಮುಖ್ಯ ಕಾಲುವೆಗೆ ನೀರು ಬಿಟ್ಟರೆ ಮಾತ್ರ ಜಲಕ್ಷಾಮದಿಂದ ಪುರಸಭೆ ಹೊರಬರಬಹುದು. ಒಂದು ವೇಳೆ ನೀರು ಬಿಡದಿದ್ದರೆ ಸಮಸ್ಯೆ ಬಿಗಡಾಯಿಸಲಿದೆ. 
"

ಕುಡಿವ ನೀರಿನ ಸಮಸ್ಯೆ ಬಗ್ಗೆ ಸಹಾಯಕ ಆಯುಕ್ತರಿಗೆ ಮಾಹಿತಿ ನೀಡಲಾಗಿದೆ. ಜು. 1ರ ನಂತರ ತುಂಗಭದ್ರಾ ಎಡದಂಡೆ ನಾಲೆಯಿಂದ ನೀರು ಬಿಡುವ ಸಾಧ್ಯತೆ ಇದೆ. ಕುಡಿವ ನೀರಿನ ತೀವ್ರ ಸಮಸ್ಯೆ ಇರುವ ಕಡೆ ಬೋರ್‌ವೆಲ್ ಹಾಕಿಸಲಾಗುತ್ತದೆ.

— ಸುರೇಶ ಹರಸೂರು ಅಧ್ಯಕ್ಷ, ಪುರಸಭೆ ಮಸ್ಕಿ
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net