ತುತ್ತು ಅನ್ನ ನೀಡಿದ ಅಜ್ಜಿಯ ಸಾವಿಗೆ ಕಣ್ಣೀರು ಸುರಿಸಿದ ವಾನರ.. ಚನ್ನಪಟ್ಟಣದಲ್ಲಿ ಮನಕಲಕುವ ಘಟನೆಯ ವಿಡಿಯೋ ವೈರಲ್​! Monkey Mourns

ರಾಯರದೊಡ್ಡಿ ಗ್ರಾಮದ 85 ವರ್ಷದ ವೃದ್ಧೆ ಪಾರ್ವತಮ್ಮ ವಯೋಸಹಜ ಕಾಯಿಲೆಯಿಂದ ಸೋಮವಾರ (ಮಾ. 30) ನಿಧನರಾಗಿದ್ದರು. ಈ ವೇಳೆ ಕೋತಿಯೊಂದು ಆಕೆಯ ಮನೆಗೆ ಬಂದು ಪಾರ್ಥೀವ ಶರೀರದ ಮೇಲೆ ಅಳುತ್ತಾ ಕುಳಿತಿರುವುದನ್ನು ನೋಡಿ ಅಲ್ಲಿದ್ದವರ ಕಣ್ಣಾಲಿಗಳು ತೇವಗೊಂಡವು.

ಪಾರ್ವತಮ್ಮ ಪ್ರಾಣಿಪ್ರಿಯರಾಗಿದ್ದು, ತಮ್ಮ ಮನೆಯ ಬಳಿಗೆ ಬರುತ್ತಿದ್ದ ಪ್ರಾಣಿಗಳಿಗೆ ಆಹಾರವನ್ನು ನೀಡುತ್ತಿದ್ದರು. ಅನೇಕರು ಈ ಕೋತಿಗಳನ್ನು ತೊಂದರೆ ಎಂದು ಭಾವಿಸಿದರೆ, ಆ ಅಜ್ಜಿ ಮಾತ್ರ ಪ್ರೀತಿಯಿಂದ ನೋಡಿಕೊಳ್ಳುತ್ತಿದ್ದರು. ಕಾಲಾನಂತರದಲ್ಲಿ ಪ್ರಾಣಿಗಳ ಜೊತೆ ಅವರ ಬಾಂಧವ್ಯ ಬಲಗೊಳ್ಳುತ್ತಾ ಹೋಯಿತು.

ಪ್ರಾಣಿಗಳು ಅಳುವುದಿಲ್ಲ ಎನ್ನುವುದು ಜನರ ನಂಬಿಕೆ, ಆದರೆ ಈ ವಿಡಿಯೋದಲ್ಲಿ ಕೋತಿಯು ತನ್ನ ಎರಡೂ ಕೈಗಳಿಂದ ಪಾರ್ವತಮ್ಮರನ್ನು ಅಪ್ಪಿ, ಅವರ ಮುಖವನ್ನು ನೇವರಿಸುತ್ತಾ ಕಣ್ಣೀರು ಹಾಕುತ್ತಿರುವುದನ್ನು ಕಾಣಬಹುದು.

ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿದ್ದಂತೆಯೇ ಅನೇಕ ಬಳಕೆದಾರರು ಪ್ರತಿಕ್ರಿಯಿಸಿದ್ದು, ಪ್ರಾಣಿಗಳು ಯಾರಾದರೂ ತಮಗೆ ದಯೆ ತೋರಿಸಿದಾಗ ಅವುಗಳನ್ನು ಎಂದಿಗೂ ಮರೆಯುವುದಿಲ್ಲ ಎಂದು ಕಾಮೆಂಟ್​ ಮಾಡಿದ್ದಾರೆ. ಆ ಕೋತಿ ಮಹಿಳೆಯನ್ನು ತಬ್ಬಿಕೊಂಡ ರೀತಿ ಬಹಳ ದುಃಖವನ್ನು ತರಿಸುತ್ತದೆ ಎಂದು ಇನ್ನೊಬ್ಬರು ಬರೆದಿದ್ದಾರೆ (ಏಜೆನ್ಸೀಸ್​).