ಅಧಿಕಾರಿಗಳ ಜೊತೆ ವಾಗ್ವಾದ!
ಕಾರ್ಯಕ್ರಮಕ್ಕೆ ಸಚಿವರು ಬರುವುದು ತಡವಾದಾಗ, ಅಧಿಕಾರಿಗಳನ್ನು ಕರೆದು ಕಾರ್ಯಕ್ರಮವನ್ನು ತಕ್ಷಣ ಆರಂಭಿಸುವಂತೆ ಶಾಸಕ ತನ್ವೀರ್ ಸೇಠ್ ಸೂಚಿಸಿದರು. ಆದರೆ, ಸಚಿವರು ಆಗಮಿಸದೆ ಆರಂಭಿಸಲು ಸಾಧ್ಯವಿಲ್ಲ ಎಂದು ಅಧಿಕಾರಿಗಳು ತಿಳಿಸಿದರು. ಇದರಿಂದ ಮತ್ತಷ್ಟು ಬೇಸರಗೊಂಡ ಶಾಸಕರು ಕಾರ್ಯಕ್ರಮದ ಸ್ಥಳದಿಂದ ಹೊರನಡೆಯಲು ಮುಂದಾದರು.
ಈ ವೇಳೆ ಸ್ಥಳದಲ್ಲಿದ್ದ ಎಂಎಲ್ಸಿ ಡಾ. ತಿಮ್ಮಯ್ಯ ಅವರು ಶಾಸಕರನ್ನು ಸಮಾಧಾನಪಡಿಸಲು ಪ್ರಯತ್ನಿಸಿದರು. ಬಳಿಕ ಶಾಸಕರು ಕಾರು ಹತ್ತುವ ಸಂದರ್ಭದಲ್ಲಿ ಮೈಸೂರು ಜಿಲ್ಲಾಧಿಕಾರಿ ಲಕ್ಷ್ಮೀಕಾಂತ ರೆಡ್ಡಿ ಅವರು ಕೂಡ ದೂರವಾಣಿ ಮೂಲಕ ಮಾತನಾಡಿ ಸಮಾಧಾನಪಡಿಸಲು ಯತ್ನಿಸಿದರು. ಆದರೆ, ಶಾಸಕ ತನ್ವೀರ್ ಸೇಠ್ ತಮ್ಮ ಅಸಮಾಧಾನವನ್ನು ದೂರವಾಣಿಯಲ್ಲೂ ತೀವ್ರವಾಗಿಯೇ ವ್ಯಕ್ತಪಡಿಸಿದರು.
ಮಾವುತರ ಕಾರ್ಯಕ್ರಮಕ್ಕಾಗಿ ಇಷ್ಟು ಹೊತ್ತು ಕಾಯಿಸುವುದು ಸರಿಯಲ್ಲ. ಪ್ರತಿಯೊಂದಕ್ಕೂ ಸಮಯ ನಿಗದಿಯಾಗಿರುತ್ತದೆ, ಎಲ್ಲರಿಗೂ ಸಮಯ ಪ್ರಜ್ಞೆ ಇರಬೇಕು. ಸಮಯ ಪ್ರಜ್ಞೆ ಇಲ್ಲದಿದ್ದರೆ ಏನು ಮಾಡವುದು..? ನಾನು ಇಲ್ಲಿರುವುದಿಲ್ಲ, ಬೇರೆಯವರು ಏನು ಬೇಕಾದರೂ ಮಾಡಲಿ. ಮಾವುತರನ್ನು ಹೀಗೆ ಕಾಯಿಸುವುದು ಸರಿಯಲ್ಲ, ನಾನು ಇಲ್ಲಿಂದ ಹೊರಡುತ್ತೇನೆ ಎಂದು ಆಕ್ರೋಶ ಹೊರಹಾಕಿ ಕಾರಿನ ಬಾಗಿಲನ್ನು ಜೋರಾಗಿ ಹಾಕಿ ತೆರಳಿದರು.
ಒಂದೂಕಾಲು ಗಂಟೆ ತಡವಾಗಿ ಬಂದ ಸಚಿವರು!
ಬೆಳಿಗ್ಗೆ 9 ಗಂಟೆಗೆ ನಿಗದಿಯಾಗಿದ್ದ ಕಾರ್ಯಕ್ರಮಕ್ಕೆ ಜಿಲ್ಲಾ ಉಸ್ತುವಾರಿ ಸಚಿವ ಡಾ. ಯತೀಂದ್ರ ಸಿದ್ದರಾಮಯ್ಯ ಅವರು ಬೆಳಿಗ್ಗೆ 10.12ಕ್ಕೆ (ಒಂದೂಕಾಲು ಗಂಟೆ ತಡವಾಗಿ) ಆಗಮಿಸಿದರು. ಬಳಿಕ 10.15ಕ್ಕೆ ಮಾವುತರು, ಕಾವಾಡಿಗಳು ಹಾಗೂ ಅವರ ಕುಟುಂಬ ಸದಸ್ಯರಿಗೆ ಉಪಾಹಾರ ಬಡಿಸಲಾಯಿತು. ಕಾರ್ಯಕ್ರಮ ತಡವಾದ ಹಿನ್ನೆಲೆಯಲ್ಲಿ ಮಾವುತರ ಕುಟುಂಬ ಸದಸ್ಯರು ಸಾಕಷ್ಟು ಸಮಯ ಉಪಾಹಾರಕ್ಕಾಗಿ ಕಾಯುವಂತಾಯಿತು.
