ಬೆಂಗಳೂರು: ಬುಧವಾರ (ಸೆ.23) ಬೆಂಗಳೂರಿನ ಶ್ರೀ ಶ್ರೀ ಆಯುರ್ವೇದ ವಿಜ್ಞಾನ ಮತ್ತು ಸಂಶೋಧನಾ ಮಹಾವಿದ್ಯಾಲಯ (SSCASR) ದ ನಾಗಾರ್ಜುನ ಸಭಾಂಗಣದಲ್ಲಿ 11ನೇ ಆಯುರ್ವೇದ ದಿನಾಚರಣೆ (Ayurveda Day) ಯನ್ನು ಆಚರಿಸಲಾಯಿತು. ಮಹಾವಿದ್ಯಾಲಯದ ಎನ್ಎಸ್ಎಸ್ (NSS) ವಿಭಾಗದ ಸಹಯೋಗದಲ್ಲಿ ಈ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು.
ಮುಖ್ಯ ಅತಿಥಿಯಾಗಿ ಆಗಮಿಸಿದ್ದ, ಕರ್ನಾಟಕ ಆಯುರ್ವೇದ ಮತ್ತು ಯುನಾನಿ ವೈದ್ಯರ ಮಂಡಳಿಯ ರಿಜಿಸ್ಟ್ರಾರ್ ಡಾ. ಮೊಹಮ್ಮದ್ ರಫಿ ಎಚ್. ಹಕೀಮ್,“ಆಯುರ್ವೇದವು ತಲೆತಲಾಂತರಗಳಿಂದ ವೈದ್ಯರು ಮತ್ತು ಪಂಡಿತರಿಂದ ಮುಂದುವರಿದು ಬಂದ ಜ್ಞಾನವನ್ನು ಆಧರಿಸಿದೆ,” ಎಂದು ಅವರು ಹೇಳಿದರು. “ಇಲ್ಲಿರುವ ಪ್ರತಿಯೊಬ್ಬ ವಿದ್ಯಾರ್ಥಿಯೂ ಇದನ್ನು ತಮ್ಮ ದೈನಂದಿನ ಜೀವನದಲ್ಲಿ ಅಳವಡಿಸಿಕೊಳ್ಳುವಂತೆ ನಾನು ಪ್ರೋತ್ಸಾಹಿಸುತ್ತೇನೆ,” ಎಂದು ಅವರು ಹೇಳಿದರು.
ಗೌರವ ಅತಿಥಿಯಾಗಿ ಉಪಸ್ಥಿತರಿದ್ದ, ಕರ್ನಾಟಕ ರಾಜ್ಯ ಔಷಧೀಯ ಸಸ್ಯಗಳ ಪ್ರಾಧಿಕಾರದ ಹಿರಿಯ ಔಷಧೀಯ ಸಸ್ಯಗಳ ಸಲಹೆಗಾರ ಡಾ. ಎಂ. ಜೆ. ಪ್ರಭು, ಭಾರತದ ಸಸ್ಯಸಂಪತ್ತಿನ ಕುರಿತು ಮಾತನಾಡುತ್ತಾ, “ಭಾರತದ ಔಷಧೀಯ ಸಸ್ಯಗಳು ನಮ್ಮ ಶ್ರೀಮಂತ ಪರಂಪರೆಯಾಗಿದೆ. ಅವುಗಳನ್ನು ಸಂರಕ್ಷಿಸುವುದು, ಬೆಳೆಸುವುದು ಮತ್ತು ವಿವೇಕಯುತವಾಗಿ ಬಳಸುವುದು ನಮ್ಮ ಜವಾಬ್ದಾರಿಯಾಗಿದೆ,” ಎಂದು ತಿಳಿಸಿದರು.
ಕಾರ್ಯಕ್ರಮದ ನಂತರ ನಡೆದ ಪ್ರದರ್ಶನದಲ್ಲಿ ಗುರುದೇವ ಶ್ರೀ ಶ್ರೀ ರವಿ ಶಂಕರ್ ಅವರ ಆಯುರ್ವೇದದ ಕುರಿತ ದೃಷ್ಟಿಕೋನವನ್ನು ಪ್ರಸ್ತುತಪಡಿಸಲಾಯಿತು. “ಆಯುರ್ವೇದವು ಜೀವನದ ವಿಜ್ಞಾನ. ಇದು ಕೇವಲ ನಿರ್ದಿಷ್ಟ ಕಾಯಿಲೆ ಅಥವಾ ಅದರ ಲಕ್ಷಣಗಳನ್ನು ಗುಣಪಡಿಸುವುದಕ್ಕಷ್ಟೇ ಸೀಮಿತವಾದುದಲ್ಲ” ಎಂದು ವಿವರಿಸಿದರು. ಆಯುರ್ವೇದವನ್ನು “ಕಾಲಪರೀಕ್ಷಿತ” ಪದ್ಧತಿ ಎಂದು ಬಣ್ಣಿಸಿದ ಅವರು, ಅದರ ಪ್ರಯೋಜನಗಳು ಎಲ್ಲ ಜನರಿಗೂ ತಲುಪುವಂತೆ ಮಾಡುವ ಅಗತ್ಯವಿದೆ ಎಂದರು.
ಶ್ರೀ ಶ್ರೀ ತತ್ತ್ವದ ವ್ಯವಸ್ಥಾಪಕ ನಿರ್ದೇಶಕ ಶ್ರೀ ಅರವಿಂದ್ ವರ್ಚಸ್ವಿ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು. SSRVM ಟ್ರಸ್ಟಿ ಶ್ರೀ ಭರತ್ ವಿಗ್, SSRVM ಟ್ರಸ್ಟ್ನ ಅಧ್ಯಕ್ಷರು ಹಾಗೂ ನಿರ್ದೇಶಕರಾದ ಕಮೋಡೋರ್ ಎಚ್. ಜಿ. ಹರ್ಷ ಮತ್ತು SSCASR ಪ್ರಾಂಶುಪಾಲರಾದ ಡಾ. ಸಜಿತಾ ಕೆ. ಉಪಸ್ಥಿತರಿದ್ದರು.
