ದೋಷಗಳ ನಿವಾರಕ ಶನಿ ದೇವ

ತಾಲೂಕಿನ ಮಗ್ಗುಲ ಗ್ರಾಮದಲ್ಲಿರುವ ಶ್ರೀ ಶನೈಶ್ಚರ ಮತ್ತು ನವಗ್ರಹ ದೇವಾಲಯಕ್ಕೆ ಸುಮಾರು 70 ವರ್ಷ ಇತಿಹಾಸವಿದೆ.

ಶನೈಶ್ಚರ ದೇವಾಲಯದಲ್ಲಿ ನಿತ್ಯ ಬೆಳಗ್ಗೆ ದೇವರಿಗೆ ದೈನಂದಿನ ಪೂಜೆ ಸಲ್ಲಿಸಲಾಗುತ್ತದೆ. ಪ್ರತಿ ಶನಿವಾರ ವಿಶೇಷವಾಗಿ ಬೆಳಗ್ಗೆ 6 ರಿಂದ ಮಧ್ಯಾಹ್ನದವರೆಗೆ ಶನಿ ಜಪ, ಶನಿಶಾಂತಿ ಪೂಜೆ ಹಾಗೂ ಮಧ್ಯಾಹ್ನ ವಿಶೇಷ ಪೂಜೆ ನೆರವೇರಿಸಲಾಗುತ್ತದೆ. ಶನಿಗೆ ಮುಖ್ಯವಾಗಿ ಶ್ರಾವಣ ಶನಿವಾರದಂದು ವಿಜೃಂಭಣೆಯಿಂದ ಪೂಜೆ ನೆರವೇರಿಸಲಾಗುತ್ತದೆ. ಶ್ರಾವಣ ಶನಿವಾರದಂದು ಬೆಳಗ್ಗೆ 5 ರಿಂದ ಪೂಜಾ ಕಾರ್ಯಗಳು ನಡೆಯುತ್ತದೆ. ಮಧ್ಯಾಹ್ನದಿಂದ ರಾತ್ರಿ 8 ಗಂಟೆವರೆಗೆ ನಿರಂತರ ಅನ್ನಸಂತರ್ಪಣೆ ನಡೆಯುತ್ತದೆ. ಶಿವರಾತ್ರಿಯಂದು ಮಹಾಪೂಜೆ, ಶನೈಶ್ಚರ ಜಯಂತಿ ವಿಶೇಷ ಪೂಜೆ, ನವರಾತ್ರಿ ದುರ್ಗಾಷ್ಟಮಿ ದಿನದಂದು ಆವರಣದಲ್ಲಿನ ದುರ್ಗಾ ದೇವಿಗೆ ವಿಶೇಷ ಪೂಜೆ ನೆರವೇರುತ್ತದೆ. ನಾಗರ ಪಂಚಮಿ ಹಾಗೂ ಸುಬ್ರಹ್ಮಣ್ಯ ಷಷ್ಠಿ ದಿನದಂದು ನಾಗನಿಗೆ ವಿಶೆಷ ಪೂಜೆ ನೆರವೇರುತ್ತದೆ.

ಭಕ್ತರ ಇಷ್ಟಾರ್ಥ ಈಡೇರುತ್ತಿರುವುದರಿಂದ ಭಕ್ತರಿಂದಲೇ ಈ ದೇವಾಲಯ ಪ್ರಸಿದ್ಧಿಯನ್ನು ಪಡೆಯುತ್ತಿದೆ. ದೇವಾಲಯದಲ್ಲಿ ಶ್ರಾವಣ ಮಾಸದಲ್ಲಿ ವಿಶೇಷ ಪೂಜೆ ಸಲ್ಲಿಸಲಾಗುತ್ತದೆ. ಜತೆಗೆ ಅನ್ನಸಂತರ್ಪಣೆಯನ್ನೂ ಮಾಡಲಾಗುತ್ತದೆ. ಭಕ್ತರು ಭಕ್ತಿಯಿಂದ ಏನನ್ನೇ ಬೇಡಿದರೂ ದೈವವು ಅದನ್ನು ನೆರವೇರಿಸುತ್ತದೆ.