ನನ್ನನ್ನು ಕೆಟ್ಟದಾಗಿ ಬಿಂಬಿಸುವ ಬಿಜೆಪಿ ಅನೈತಿಕ ಕಾರ್ಯ ಹೀಗೆ ಮುಂದುವರೆಸಲಿ : ಪ್ರಿಯಾಂಕ್ ಖರ್ಗೆ ತೀಕ್ಷಣ ಪ್ರತಿಕ್ರಿಯೆ

ಕಲಬುರಗಿ: ಫೇಕ್ ಪೋಸ್ಟ್ ಮೂಲಕ ತಮ್ಮನ್ನು ಕೆಟ್ಟದಾಗಿ ಬಿಂಬಿಸುವ ಕೆಲಸ ಮಾಡುತ್ತಿರುವ ಬಿಜೆಪಿ ಹಾಗೂ ಬಿಜೆಪಿಯ ಐಟಿ ಸೆಲ್ ವಿರುದ್ಧ ಸಚಿವ ಪ್ರಿಯಾಂಕ್ ಖರ್ಗೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿದ್ದು, " ನನ್ನನ್ನು ಕೆಟ್ಟದಾಗಿ ಬಿಂಬಿಸಲು ಎಲ್ಲಾ ಅನೈತಿಕ ದಾರಿಗಳನ್ನು ಬಳಸುತ್ತಿರುವ ಬಿಜೆಪಿಯ ಪ್ರಯತ್ನ ಹೀಗೆಯೇ ಮುಂದುವರೆಯಲಿ" ಎಂದು ತಿರುಗೇಟು ನೀಡಿದ್ದಾರೆ.

ಎಸ್ ಎಸ್ ಎಲ್ ಸಿ ಫಲಿತಾಂಶದ ವಿಚಾರದಲ್ಲಿ ಸೋಷಿಯಲ್ ಮೀಡಿಯಾದಲ್ಲಿ ಫೇಕ್ ಪೋಸ್ಟೊಂದು ಹರಿದಾಡುತ್ತಿದ್ದು, ಅದರಲ್ಲಿ ಸಚಿವರೇ ಹೇಳಿಕೆ ನೀಡಿರುವಂತೆ ಬಿಂಬಿಸಲಾಗಿದೆ.

ಪದೇ ಪದೇ ಉಡುಪಿ ಹಾಗೈ ದಕ್ಷಿಣ ಕನ್ನಡ ಜಿಲ್ಲೆಗಳು ಪಿಯುಸಿ ಹಾಗೂ ಎಸ್ ಎಸ್ ಎಲ್ ಸಿ ಪರೀಕ್ಷೆಗಳಲ್ಲಿ ಅಗ್ರಸ್ಥಾನ ಪಡೆಯುತ್ತಿರುವುದು ಆತಂಕದ ವಿಷಯ. ಮೌಲ್ಯಮಾಪನದಲ್ಲಿ ಆರ್ ಎಸ್ ಎಸ್ ಏಜೆಂಟ್ ಗಳು ಇರುವುದು ಮೇಲ್ನೋಟಕ್ಕೆ ಸಾಬೀತು ಆಗಿದೆ. ಎಲ್ಲಾ ಮೌಲ್ಯ ಮಾಪಕರ ಹಿನ್ನೆಲೆ ಪತ್ತೆ ಮಾಡಲು ಶಿಕ್ಷಣ ಸಚಿವರು ಮತ್ತು ಮುಖ್ಯಮಂತ್ರಿಗೆ ಮನವಿ ಪತ್ರ ಬರೆಯುತ್ತಿದ್ದೇನೆ " ಎನ್ನುವ ಬರಹದೊಂದಿಗೆ ಸಚಿವರ ಫೋಟೋ ಶೇರ್ ಮಾಡಲಾಗಿದೆ.

ಈ ಬರಹವನ್ನು ತಮ್ಮ ಎಕ್ಸ್ ಖಾತೆಯಲ್ಲಿ ಹಂಚಿಕೊಂಡು ಸಚಿವ ಪ್ರಿಯಾಂಕ್ ಖರ್ಗೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿ, ಕಡಿಮೆ ವೇತನದಿಂದ ಕಂಗೆಟ್ಟಿರುವ ಬಿಜೆಪಿ ಐಟಿ ಸೆಲ್ ಹಾಗೂ ಅದರ ಟ್ರೋಲ್ ಆರ್ಮಿ ಬಗ್ಗೆ ನನಗೆ ಕನಿಕರವಿದೆ. ಬಿಜೆಪಿಯ ಟ್ರೋಲ್ ಆರ್ಮಿ ಇಂತಹ ನಕಲಿ ಮತ್ತು ಅನೈತಿಕ ಕೆಲಸಗಳಿಂದ ನಮ್ಮನ್ನು ಕುಗ್ಗಿಸಬಹುದು ಎಂದು ತಿಳಿದಿದ್ದರೆ ಅದು ಅವರ ಭ್ರಮೆಯಷ್ಟೇ ಎಂದು ಫೇಕ್ ಪೋಸ್ಟ್ ಗೆ ತಿರುಗೇಟು ನೀಡಿದ್ದಾರೆ.

ಮುಂದುವರೆದು, "ನನ್ನನ್ನು ಕೆಟ್ಟದಾಗಿ ಬಿಂಬಿಸಲು ಎಲ್ಲಾ ಅನೈತಿಕ ದಾರಿಗಳನ್ನು ಬಳಸುತ್ತಿರುವ ಬಿಜೆಪಿಯ ಪ್ರಯತ್ನ ಹೀಗೆಯೇ ಮುಂದುವರೆಯಲಿ " ಎಂದು ವ್ಯಂಗ್ಯವಾಡಿದ್ದಾರೆ.