ಅರಳಿದ ಹೃದಯಕಮಲದಲ್ಲಿ ಲಕ್ಷ್ಮೀ ನಿವಾಸ

ಪರಿವರ್ತನಾಶೀಲವಾಗಿದ್ದರೆ ಮಾತ್ರ ವ್ಯಾಪಾರವು ಮುನ್ನಡೆ ಯುತ್ತಿರುತ್ತದೆ ಎಂದು ಲಕ್ಷ್ಮೀಯು ಸೂಚಿಸುತ್ತಿದ್ದಾಳೆ. ಜಡತೆಯಲ್ಲಿ ಹೊರಟು ಹೋದರೆ ವ್ಯಾಪಾರವು ಸ್ಥಗಿತವಾಗಿಬಿಡುತ್ತದೆ. ಜಡತೆ ಯಿಂದ ದೂರವಿರಲೇಬೇಕು. ಸಾಧನೆ, ಸೇವೆ, ಸತ್ಸಂಗಗಳಲ್ಲಿ ಮಗ್ನರಾಗಿರಬೇಕು. ಪ್ರಸನ್ನರಾಗಿರಬೇಕು, ಅರಳಬೇಕು. ಬಹಳ ಗಂಭೀರವಾಗಿರುವ ಅವಶ್ಯಕತೆಯಿಲ್ಲ. ಧ್ಯಾನ ಮಾಡುವವರ ಮುಖದಲ್ಲಿ ಮುಗುಳ್ನಗೆ ಇರಬೇಕು. ಆಂತರ್ಯದಲ್ಲೂ, ಮುಖದಲ್ಲೂ ಮುಗುಳ್ನಗೆ ಇರಬೇಕು. ನಮ್ಮ ಎಲ್ಲಾ ದುಃಖವನ್ನೂ, ನೋವನ್ನೂ, ಕಷ್ಟಗಳನ್ನೂ ದೈವಕ್ಕೆ ಆಹುತಿ ನೀಡಬೇಕು. ಈ ಶರೀರವು ಭಸ್ಮವಾಗುವ ಮೊದಲು ನಮ್ಮ ಎಲ್ಲಾ ಸಂಕಷ್ಟ ಗಳೂ ಸುಟ್ಟುಹೋಗಬೇಕು. ಇದನ್ನೇ ಮುಕ್ತಿ ಎನ್ನುವುದು. ಬದುಕಿದ್ದಾಗಲೇ ಪ್ರಸನ್ನರಾಗಬೇಕು.

ಧ್ಯಾನಕ್ಕಾಗಿ ನೀವು ಸಮಯ ಮಾಡಿಕೊಳ್ಳಲೇಬೇಕು. ನೀವು ಮಾಡುವ ಕೆಲಸಕ್ಕಿಂತಲೂ ನಿಮ್ಮ ಸಾಮರ್ಥ್ಯ ಬಹಳ ಹೆಚ್ಚು ಎಂದು ತಿಳಿಯಿರಿ. ಸಮಯ ಕಡಿಮೆ ಇದ್ದಷ್ಟೂ ನಿಮಗೆ ಆಳವಾದ ವಿಶ್ರಾಂತಿ ಅತೀ ಅವಶ್ಯಕ. ಆದ್ದರಿಂದ, ಧ್ಯಾನವು ಇನ್ನೂ ಅವಶ್ಯಕ. ಮಾಡಲು ಕೆಲಸವಿಲ್ಲದವರು ಮಾತ್ರ ಧ್ಯಾನ ಮಾಡುವುದು ಎಂದು ಕೆಲವರು ಭಾವಿಸಿದ್ದಾರೆ. ಎಷ್ಟೊಂದು ಹಣವಿಟ್ಟುಕೊಂಡು ಅದನ್ನು ವಿನಿಯೋಗಿಸದೆ ಇರುವಂತೆ ಅದು. ಅಷ್ಟು ಹಣ ಏತಕ್ಕಾಗಿ? ಮಾಡಲು ಅಷ್ಟೊಂದು ಕೆಲಸವಿದ್ದಾಗ, ನಿಮಗೆ ಶಕ್ತಿಯೂ ಬಹಳ ಬೇಕು. ಬೆಳಗಿನ ಹೊತ್ತು ಇಪ್ಪತ್ತು ನಿಮಿಷಗಳನ್ನು ಮೀಸಲಿಡಿ. ಎಷ್ಟೇ ಕೆಲಸವಿದ್ದರೂ ಪ್ರತಿನಿತ್ಯ ಖಂಡಿತವಾಗಿಯೂ ಹಲ್ಲುಜ್ಜಿ, ಸ್ನಾನ ಮಾಡುತ್ತೀರಲ್ಲವೆ? ಅದರೊಡನೆ ಧ್ಯಾನವನ್ನೂ ಸೇರಿಸಿಬಿಡಿ.

ಧ್ಯಾನ ಮಾಡಿದಾಗ ಆಂತರ್ಯದ ಶಕ್ತಿ ಹೆಚ್ಚುವುದರೊಂದಿಗೆ ನಿಮ್ಮ ಮನಸ್ಸನ್ನೂ ರಕ್ಷಿಸಿಕೊಳ್ಳುತ್ತೀರಿ. ಆಗ ಮನಸ್ಸು ಸ್ಪಷ್ಟವಾಗಿ ಆಲೋಚಿಸುತ್ತದೆ, ನಿಮ್ಮ ಕಾರ್ಯಗಳಲ್ಲಿ ಪ್ರಾಮಾಣಿಕತೆ ಇರುತ್ತದೆ, ಹೃದಯವೂ ಶುದ್ಧವಾಗುತ್ತದೆ. ಸರಿಯಾದ ವ್ಯಾಪಾರದ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಅಂತಃಸ್ಪುರಣೆ ತಾನಾಗಿಯೇ ಬರುತ್ತದೆ. ಧ್ಯಾನದಿಂದ ದೇಹವು ಆರೋಗ್ಯವಾಗಿರುತ್ತದೆ, ಮನಸ್ಸಿನ ಏಕಾಗ್ರತೆ ಹೆಚ್ಚುತ್ತದೆ, ಬುದ್ಧಿಯು ತೀಕ್ಷ್ಣವಾಗುತ್ತದೆ, ಭಾವನಾತ್ಮಕವಾಗಿ ಹಗುರವಾಗುತ್ತೀರಿ, ನಿಮ್ಮೊಡನೆ ವ್ಯವಹರಿಸಲು ಬರುವವರಿಗೆ ಸಕಾರಾತ್ಮಕ ತರಂಗಗಳನ್ನು ಹೊರಸೂಸುತ್ತೀರಿ, ನಿಮ್ಮ ವರ್ತನೆ ಸೌಮ್ಯವಾಗಿರುತ್ತದೆ. ಗ್ರಾಹಕರು ಹೇಗೇ ವರ್ತಿಸಲಿ, ಓರ್ವ ಉದ್ಯಮಿ; ವ್ಯಾಪಾರಿ ತನ್ನ ಗ್ರಾಹಕರ ಮೇಲೆ ತಾಳ್ಮೆಯನ್ನು ಕಳೆದುಕೊಂಡು ಕೂಗಾಡಲು ಸಾಧ್ಯವಿಲ್ಲ. ಧ್ಯಾನವನ್ನು ಉದ್ಯಮಿಗಳು, ವ್ಯಾಪಾರಿಗಳು ಪ್ರತಿನಿತ್ಯ ಮಾಡುವುದರಿಂದ ಆ ತಾಳ್ಮೆ ಸಹಜವಾಗಿಯೇ ಅವರಿಗೆ ಬರುತ್ತದೆ. ಯಾರಿಗೆ ಇವೆಲ್ಲವೂ ಬೇಕೋ, ಅವರೆಲ್ಲರೂ ಧ್ಯಾನ ಮಾಡಲೇಬೇಕು!

(ಪ್ರತಿಕ್ರಿಯಿಸಿ: )