ಕೋಲಾರ ಕಸ ವಿಲೇವಾರಿ ಅಭಿಯಾನ

ವಿಜಯವಾಣಿ ಸುದ್ದಿಜಾಲ ಕೋಲಾರ

ಕೋಲಾರ ನಗರದಲ್ಲಿ ದಶಕಗಳಿಂದ ಕಾಡುತ್ತಿದ್ದ ಕಸದ ಕುರೂಪ ಭಾನುವಾರ ಹಿಮದಂತೆ ಕರಗಿ ಒಂದೇ ದಿನ ಸುಮಾರು ೧೯೩ ಟಿಪ್ಪರ್‌ಗಳ ಕಸ ವಿಲೇವಾರಿಯಾಗುವ ಮೂಲಕ ಕೋಲಾರಕ್ಕೆ ಸದ್ಯಕ್ಕೆ ಶೃಂಗಾರ ಸ್ವರೂಪ ಕಾಣುವಂತಾಗಿದೆ.

ಭಾನುವಾರ ಜಿಲ್ಲಾಡಳಿತ, ನಗರಸಭೆ, ಜಿಲ್ಲಾಪಂಚಾಯ್ತಿಯ ನೇತೃತ್ವದಲ್ಲಿ ಕಸ ವಿಲೇವಾರಿ ಅಭಿಯಾನ ಕೈಗೊಳ್ಳಲಾಗಿತ್ತು. ಬೆಳ್ಳಿಗ್ಗೆ ೬ ಗಂಟೆಗೆ ೨೮ ಜೆಸಿಬಿಗಳು, ೪೮ ಟಿಪ್ಪರ್‌ಗಳು ರಸ್ತೆಗೆ ಇಳಿದು ಸಂಜೆ ೫ ಗಂಟೆಯ ತನಕ ಸುಮಾರು ೪೮೨೫ ಟನ್ ಕಸವನ್ನು ವಿಲೇವಾರಿ ಮಾಡುವ ಮೂಲಕ ಕೋಲಾರ ನಗರವನ್ನು ಸುಂದರ ನಗರವನ್ನಾಗಿ ಮಾಡಲು ಒಂದು ಹಂತದಲ್ಲಿ ಯಶಸ್ವಿ ಕಂಡಿದ್ದಾರೆ. ಇದೇ ರೀತಿ ೨ ರಿಂದ ೩ ಬಾರಿ ಕೈಗೊಳ್ಳುವ ಮೂಲಕ ನಗರದಲ್ಲಿ ಇರುವ ಇದ್ದಬದ್ದ ಕಸವನ್ನು ವಿಲೇವಾರಿ ಮಾಡಿದರೆ ಆಗ ಕೋಲಾರ ನಗರಕ್ಕೆ ಸಿಗಲಿದೆ ಶೃಂಗಾರದ ಸ್ವರೂಪ.

ಭಾನುವಾರ ಬೆಳ್ಳಿಗ್ಗೆ ೫ ತಂಡಗಳಾಗಿ ಅಧಿಕಾರಿಗಳು ಜೆಸಿಬಿ ಮತ್ತು ಟಿಪ್ಪರ್‌ಗಳ ಮೂಲಕ ಕಸವನ್ನು ವಿಲೇವಾರಿ ಮಾಡಲು ಮುಂದಾದಾಗ ನೋಡನೋಡುತ್ತಿದ್ದಂತೆ ಆಳೆತ್ತರಕ್ಕೆ ನಿಂತಿದ್ದ ಕಸದ ರಾಶಿಗಳು ಮಂಜಿನAತೆಯೇ ಕರಗಿಬಿಟ್ಟವು. ಜೆಸಿಬಿ ಮತ್ತು ಟಿಪ್ಪರ್ ಗಳ ಜೊತೆಗೆ ಸುಮಾರು ೨೫೦ ಪೌರಕಾರ್ಮಿಕರು ಸಹಕರಿಸಿದ ಕಾರಣ ದಶಕಗಳಿಂದ ಇದ್ದ ಕಟ್ಟಡಗಳ ಅವಶೇಷಗಳ ತ್ಯಾಜ್ಯ, ಪ್ಲಾಸ್ಟಿ,ಕ್ ಸೇರಿದಂತೆ ಇತರೆ ತ್ಯಾಜ್ಯವನ್ನು ಟಿಪ್ಪರ್‌ಗಳ ಮೂಲಕ ವಿಲೇವಾರಿ ಮಾಡಲಾಯಿತು.

ಒಂದೇ ದಿನದಲ್ಲಿ ಕೋಟಿ ರೂ.ಗಳ ಕೆಲಸ ಸಾಧನೆ :

೪೮ ಟಿಪ್ಪರ್‌ಗಳ ಮೂಲಕ ೪೮೨೫ ಟನ್ ಕಸವನ್ನು ವಿಲೇವಾರಿ ಮಾಡಲು ಸುಮಾರು ಒಂದು ಕೋಟಿ ರೂ.ಗಳಷ್ಟು ಖರ್ಚು ಬರುತ್ತದೆ. ಜಿಲ್ಲಾಧಿಕಾರಿಗಳ ಆದೇಶ ಹಾಗೂ ನಗರಸಭೆ ಮತ್ತು ಜಿಲ್ಲಾಪಂಚಾಯ್ತಿ ಸಹಯೋಗದೊಂದಿಗೆ ಗುತ್ತಿಗೆದಾರರ ಸಹಾಯಪಡೆದು ಇಡೀ ದಿನ ಕೋಲಾರ ನಗರದಲ್ಲಿರುವ ಕಸವನ್ನು ವಿಲೇವಾರಿ ಮಾಡಲಾಗಿದೆ. ಇದು ದೊಡ್ಡ ಸಾಧನೆ. ಈ ಕಾರ್ಯ ಸಾಮಾನ್ಯವಾಗಿ ೩ ತಿಂಗಳು ಹಿಡಿಯುವ ಕೆಲಸವಾಗಿದ್ದು, ೨೫೦ ಮಂದಿ ಸಿಬ್ಬಂದಿ ಸಂಬಳ, ಯಂತ್ರಗಳ ನಿರ್ವಹಣೆ, ಟಿಪ್ಪರ್‌ಗಳ ಬಾಡಿಗೆ ಎಲ್ಲವೂ ಲೆಕ್ಕ ಹಾಕಿದರೆ ಒಂದು ಕೋಟಿಗಿಂತಲೂ ಹೆಚ್ಚು ಕೆಲಸವನ್ನು ಪೂರ್ಣಗೊಳಿಸಿದಂತೆ ಆಗಿದೆ ಎಂದು ಪೌರಾಯುಕ್ತ ನವೀನ್‌ಚಂದ್ರ ತಿಳಿಸಿದ್ದಾರೆ.

ಸಾಥ್ ನೀಡಿದ ಅಧಿಕಾರಿಗಳು :

ಲೋಕೋಪಯೋಗಿ, ಗ್ರಾಮೀಣಾಭಿವೃದ್ದಿ, ನಗರ ಸ್ಥಳೀಯ ಸಂಸ್ಥೆಗಳು, ನೂರಾರು ಸಿಬ್ಬಂದಿ, ಇಂಜಿನೀಯರ್‌ಗಳು, ಗುತ್ತಿಗೆದಾರರು ಜೊತೆಗೆ ಜಿಲ್ಲಾಧಿಕಾರಿ ಡಾ.ಎಂ.ಆರ್.ರವಿ, ಸಿಇಓ ಪ್ರವೀಣ್ ಪಿ.ಬಾಗೇವಾಡಿ ಸೇರಿದಂತೆ ಜಿಲ್ಲಾಮಟ್ಟದ ಅಧಿಕಾರಿಗಳು, ಭಾಗವಹಿಸಿದ್ದರು. ನಗರಸಭೆ ಪೌರಾಯುಕ್ತ ನವೀನ್‌ಚಂದ್ರ, ಜಿಲ್ಲಾ ನಗರಾಭಿವೃದ್ಧಿ ಯೋಜನಾ ನಿರ್ದೇಶಕಿ ಅಂಬಿಕಾ ರವರ ಉಸ್ತುವಾರಿಯಲ್ಲಿ ೫ ತಂಡಗಳು ಕಸ ವಿಲೇವಾರಿಯ ನೇತೃತ್ವ ವಹಿಸಿದ್ದರು.

ಕಟ್ಟಡ ತ್ಯಾಜ್ಯ :

ಕಟ್ಟಡ ತ್ಯಾಜ್ಯ ಮತ್ತು ಘನತ್ಯಾಜ್ಯ ಸುರಿಯಲು ಕೋಲಾರ ಬೆಂಗಳೂರು ರಸ್ತೆಯಲ್ಲಿ ೨ ಮುಚ್ಚಲ್ಪಟ್ಟ ಕಲ್ಲು ಕ್ವಾರೆಗಳನ್ನು ಗುರ್ತಿಸಲಾಗಿದೆ. ನಿರ್ದಿಷ್ಟಪಡಿಸಿದ ಸ್ಥಳದಲ್ಲಿಯೇ ಅದನ್ನು ಸುರಿಯಬೇಕು ಎಂದು ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.

ಬಾಕ್ಸ್

ಜಿಲ್ಲಾಧಿಕಾರಿ ಎಂ.ಆರ್.ರವಿ ಕೋಲಾರಕ್ಕೆ ಬಂದಾಗಿನಿAದಲೂ ಸ್ವಚ್ಛತೆ ಮತ್ತು ಸುಂದರ ಕೋಲಾರ ಕನಸು ಕಂಡಿದ್ದರು. ತಮ್ಮ ಮೊದಲ ಗುರಿಯಾಗಿ ನಗರ ದೇವತೆ ಕೋಲಾರಮ್ಮ ದೇವಾಲಯದ ಮತ್ತು ರಥಬೀದಿಯ ಆಧುನೀಕರಣದ ಮೂಲಕ ಕೋಲಾರಕ್ಕೆ ಹೊಸ ರೂಪ ಕೊಡುವ ಹೆಚ್ಚೆ ಇರಿಸಿದರು. ನಂತರ ಮುಜರಾಯಿ ದೇವಸ್ಥಾನಗಳಲ್ಲಿ ಪ್ರಸಾದಕ್ಕಾಗಿ ಲಡ್ಡು ವ್ಯವಸ್ಥೆಯನ್ನು ಮಾಡಿಸಿದರು. ಕೋಲಾರ ನಗರವನ್ನು ಸ್ವಚ್ಛವಾಗಿ ಇರಿಸುವ ಸಲುವಾಗಿ ಕೋಲಾರಮ್ಮ ಸ್ವಚ್ಛತಾ ಅಭಿಯಾನ ತಂಡವನ್ನು ರಚನೆ ಮಾಡಿದರು. ಪ್ರಥಮ ಹಂತವಾಗಿ ಭಾನುವಾರ ಕಸ ವಿಲೇವಾರಿಗೆ ಚಾಲನೆ ನೀಡಿದ್ದಾರೆ. ಇದು ಮುಂದೆ ತಾಲ್ಲೂಕುಗಳಿಗೂ ವಿಸ್ತರಿಸುವುದಾಗಿ ತಿಳಿಸಿದ್ದಾರೆ. ಸಾಂಸ್ಕೃತಿಕ ನಗರದ ಮೈಸೂರು ಜಿಲ್ಲೆಯವರಾದ ಜಿಲ್ಲಾಧಿಕಾರಿಗಳು ಕೋಲಾರ ನಗರವನ್ನು ಸುಂದರ ನಗರವನ್ನಾಗಿಸುವ ಆಲೋಚನೆಯನ್ನು ಹೊಂದಿದ್ದಾರೆ.

ಕೋಟ್

ಕೋಲಾರಮ್ಮ ಸ್ವಚ್ಛತಾ ಮಿಷನ್ ರಾಜ್ಯಕ್ಕೆ ಮಾದರಿಯಾಗುವ ರೀತಿಯಲ್ಲಿ ಕೆಲಸ ಮಾಡುತ್ತಿದೆ. ಜನರು ಸಹಕರಿಸಬೇಕು. ಇದೇ ರೀತಿಯ ಸ್ವಚ್ಛತಾ ಅಭಿಯಾನವನ್ನು ಮುಂದಿನ ದಿನಗಳಲ್ಲಿ ಎಲ್ಲಾ ತಾಲ್ಲೂಕುಗಳಿಗೂ ವಿಸ್ತರಿಸಲಾಗುವುದು. ಇದು ನನ್ನ ಕನಸಾಗಿದೆ.

-ಡಾ.ಎಂ.ಆರ್.ರವಿ, ಕೋಲಾರ ಜಿಲ್ಲಾಧಿಕಾರಿ.

ಕೋಟ್

ಕೋಲಾರ ನಗರಸಭೆಯಲ್ಲಿ ಕೈಗೊಂಡಿರುವ ಸ್ವಚ್ಛತಾ ಕಾರ್ಯವನ್ನು ಜಿಲ್ಲೆಯ ಎಲ್ಲಾ ಗ್ರಾಮಪಂಚಾಯ್ತಿಗಳಿಗೂ ವಿಸ್ತರಿಸಿ ಹಳ್ಳಿಗಳನ್ನು ಸ್ವಚ್ಛವಾಗಿಡುವ ಕಾರ್ಯಕ್ಕೆ ಆದ್ಯತೆ ನೀಡಲಾಗುವುದು.

-ಪ್ರವೀಣ್ ಪಿ.ಬಾಗೇವಾಡಿ, ಸಿಇಓ, ಜಿಲ್ಲಾಪಂಚಾಯ್, ಕೋಲಾರ.

ಕೋಟ್

ಕೋಲಾರ ನಗರದಲ್ಲಿ ಇನ್ನೂ ಉಳಿದಿರುವ ಕಸವನ್ನು ಇದೇ ರೀತಿ ೨ ರಿಂದ ೩ ಬಾರಿ ಸ್ವಚ್ಛತಾ ಅಭಿಯಾನವನ್ನು ಕೈಗೊಂಡರೆ ಇರುವ ಪಾರಂಪರಿಕ ಕಸ ಸೇರಿದಂತೆ ಹಳೆಯ ಕಸದ ಗುಡ್ಡೆಗಳು ಮಾಯವಾಗುತ್ತವೆ. ಅದಕ್ಕೆ ಕೋಲಾರದಲ್ಲಿ ಇರುವ ಗುತ್ತಿಗೆದಾರರು ಇನ್ನೂ ೨ ಬಾರಿ ಜೆಸಿಬಿ ಯಂತ್ರಗಳನ್ನು ಮತ್ತು ಟಿಪ್ಪರ್‌ಗಳನ್ನು ನೀಡಿ ಸಹಕರಿಸಬೇಕು. ಇದರ ಜೊತೆಗೆ ಸಾರ್ವಜನಿಕರ ಸಹಕಾರವೂ ಮುಖ್ಯವಾಗಿದೆ.

-ನವೀನ್‌ಚಂದ್ರ, ಆಯುಕ್ತರು, ನಗರಸಭೆ, ಕೋಲಾರ.