ಕೋಲಾರ ನಗರ ಸುಂದರ ನಗರ ಮತ್ತು ಸ್ವಚ್ಛ ನಗರವನ್ನಾಗಿ ರೂಪಿsi

ವಿಜಯವಾಣಿ ಸುದ್ದಿಜಾಲ ಕೋಲಾರ

ಕೋಲಾರ ನಗರವನ್ನು ಸುಂದರ ನಗರವನ್ನಾಗಿ ಮತ್ತು ಸ್ವಚ್ಛ ನಗರವನ್ನಾಗಿ ರೂಪಿಸಲು ಜಿಲ್ಲಾಡಳಿತ ಮತ್ತು ನಗರಸಭೆ ಮುಂದಾಗಿದ್ದು, ಖಾಸಗಿ ವ್ಯಕ್ತಿಗಳು ಸಂಘ ಸಂಸ್ಥೆಗಳು ಹಾಗೂ ನಾಗರೀಕರು ಕೈಜೋಡಿಸಬೇಕೆಂದು ಜಿಲ್ಲಾಧಿಕಾರಿ ಎಂ.ಆರ್. ರವಿ ಮನವಿ ಮಾಡಿದರು.

ಜಿಲ್ಲಾಧಿಕಾರಿಗಳ ನ್ಯಾಯಾಂಗ ಸಭಾಂಗಣದಲ್ಲಿ ಶುಕ್ರವಾರ ನಗರಸಭೆ ಆಯೋಜಿಸಿದ್ದ ಸಭೆಯಲ್ಲಿ ಮಾತನಾಡಿ, ಕೋಲಾರ ನಗರದ ಪ್ರಮುಖ ವೃತ್ತಗಳು ಹಾಗೂ ಉದ್ಯಾನವನಗಳನ್ನು ಹಂತ ಹಂತವಾಗಿ ಅಭಿವೃದ್ದಿಪಡಿಸಬೇಕಾಗಿದೆ. ನಗರದ ಪ್ರತಿಷ್ಠಿತ ಉದ್ದಿಮೆದಾರರು, ಬೃಹತ್ ವ್ಯಾಪಾರಿಗಳು, ಹಿರಿಯ ಗಣ್ಯರುಗಳ ಸಹಭಾಗಿತ್ವ ಅವಶ್ಯಕತೆ ಇದೆ ಎಂದರು.

ಕೋಲಾರಕ್ಕೆ ಐತಿಹಾಸಿಕ ಹಿನ್ನಲೆ ಇದೆ. ಆದರೆ ಅಭಿವೃದ್ದಿ ಮತ್ತು ಮೂಲಭೂತ ಸೌಲಭ್ಯಗಳಲ್ಲಿ ಹಿಂದುಳಿದೆ. "ಇದು ನನ್ನ ನಗರ" ಎನ್ನುವ ಭಾವನೆ ಪ್ರತಿಯೊಬ್ಬರಲ್ಲಿಯೂ ಬರಬೇಕು. ಅದಕ್ಕಾಗಿ ಎಲ್ಲರೂ ಕೈಜೋಡಿಸಬೇಕು. ನಗರದಲ್ಲಿ ಟ್ರಾಫಿಕ್ ನಿಯಂತ್ರಣ ಸೇರಿದಂತೆ ರಸ್ತೆಗಳು, ಪಾದಚಾರಿ ಮಾರ್ಗ, ಶೌಚಾಲಯಗಳ ಅಭಿವೃದ್ಧಿ ಮತ್ತು ಸ್ಥಾಪನೆ ಹಾಗೂ ವೃತ್ತಗಳಲ್ಲಿ ಸೂಚನಾ ಫಲಕಗಳು ಇಲ್ಲದೇ ಇರುವುದರಿಂದ ನಾಗರೀಕರು ಪ್ರತಿನಿತ್ಯ ತೊಂದರೆ ಅನುಭವಿಸುತ್ತಿದ್ದಾರೆ ಎಂದರು.

ರಾಜ್ಯದಲ್ಲಿ ಬೇರೆ ಬೇರೆ ನಗರಗಳು ವೇಗವಾಗಿ ಬೆಳಯುತ್ತಿವೆ. ಕೋಲಾರ ಬೆಂಗಳೂರಿಗೆ ಹತ್ತಿರವಿದ್ದರೂ ಅಭಿವೃದ್ದಿ ವಿಚಾರದಲ್ಲಿ ಹಿಂದುಳಿದಿದೆ. ಈ ಪರಿಸ್ಥಿತಿಯನ್ನು ಬದಲಿಸಲು ಜಿಲ್ಲಾಡಳಿತ ಮತ್ತು ಸಾರ್ವಜನಿಕರ ಸಂಯುಕ್ತ ಪ್ರಯುತ್ನ ಅಗತ್ಯವಿದೆ ಎಂದರು.

ಮಕ್ಕಳು ಸುರಕ್ಷಿತವಾಗಿ ಓಡಾಡುವಂತೆ ರಸ್ತೆಗಳ ನಿರ್ಮಾಣ ಅಗತ್ಯವಿದೆ. ಹಿರಿಯರು ವಿಶ್ರಾಂತಿ ಪಡೆಯಲು ಪಾರ್ಕ್ಗಳ ಅಭಿವೃದ್ಧಿಯಾಗಬೇಕಾಗಿದೆ. ರಜಾದಿನಗಳಲ್ಲಿ ಕುಟುಂಬಗಳು ಸಾರ್ವಜನಿಕ ಸ್ಥಳಗಳಲ್ಲಿ ಕುಳಿತು ವಿಶ್ರಾಂತಿ ಪಡೆಯುವಂತಹ ಮತ್ತು ಮನರಂಜನೆ ಕಾರ್ಯಕ್ರಮಗಳನ್ನು ನಡೆಸುವಂತ ಸ್ಥಳಗಳನ್ನು ನಿರ್ಮಿಸಿ ಉತ್ತಮ ನಗರವನ್ನಾಗಿ ಮಾಡುವ ಗುರಿ ಹೊಂದಲಾಗಿದೆ ಎಂದರು.

ಮನೆಯಲ್ಲಿ ಇರುವಷ್ಟು ಶಿಸ್ತು ಮತ್ತು ಸ್ವಚ್ಛತೆ ನಗರದಲ್ಲೂ ಇರಬೇಕು. ನಗರ ನಮ್ಮ ಮನೆ ಎಂಬ ಭಾವನೆ ಬೆಳೆಸಿದರೆ ಸಮಸ್ಯೆಗಳ ಬಹುಪಾಲು ಸ್ವಯಂ ನಿವಾರಣೆಯಾಗುತ್ತವೆ. ನಗರದಲ್ಲಿರುವ ೧೨ ವೃತ್ತಗಳಲ್ಲಿ ಒಂದು ವೃತ್ತವೂ ಸಮರ್ಪಕವಾಗಿ ಅಭಿವೃದ್ಧಿಯಾಗಿಲ್ಲ. ಪ್ರಮುಖ ಪಾರ್ಕುಗಳನ್ನು ಮಾದರಿ ಪಾರ್ಕುಗಳನ್ನಾಗಿ ಮಾಡಬೇಕಾಗಿದೆ ಎಂದು ತಿಳಿಸಿದರು.

ಶಾಲೆಗಳ ಎದುರು "ಸ್ಕೂಲ್ ಜೋನ್" ಫಲಕ, ಟ್ರಾಫಿಕ್ ಸಿಗ್ನಲ್, ಮಾರ್ಗಸೂಚನಾ ಫಲಕಗಳನ್ನು ನಗರದಲ್ಲಿ ಅಳವಡಿಸಬೇಕಾಗಿದೆ. ಬ್ಯಾಂಕ್, ಕಂಪನಿ ಮತ್ತು ಸ್ವಯಂಸೇವಾ ಸಂಸ್ಥೆಗಳು ತಮ್ಮ ಮಟ್ಟಿಗೆ ಕೈ ಜೋಡಿಸಿದರೆ ಕೋಲಾರ ನಗರವನ್ನು ಸುಂದರ ನಗರವನ್ನಾಗಿ ಮಾರ್ಪಡಿಸಬಹುದು. ಹಣ ಸರ್ಕಾರಕ್ಕೆ ದೇಣಿಗೆ ರೂಪದಲ್ಲಿ ಕೊಡುವುದಕ್ಕಿಂತ ನೇರವಾಗಿ ಅಭಿವೃದ್ಧಿ ಕಾರ್ಯ ಮಾಡಿ ತಮ್ಮ ಸಂಸ್ಥೆಯ ಹೆಸರನ್ನು ಫಲಕದಲ್ಲಿ ಹಾಕಿಕೊಳ್ಳುವ ಅವಕಾಶವನ್ನು ನಗರಸಭೆ ನೀಡಲು ಸಿದ್ಧವಿದೆ ಎಂದರು.

ವೃತ್ತಗಳ ಅಭಿವೃದ್ಧಿ :

ಅಂಬೇಡ್ಕರ್ ವೃತ್ತ ಮತ್ತು ಎಪಿಎಂಸಿ ವೃತ್ತ ಅಭಿವೃದ್ದಿಗೆ ತಲಾ ೧೭ ಲಕ್ಷ, ರಾಣಿ ಚೆನ್ನಮ್ಮ ವೃತ್ತ ಅಭಿವೃದ್ದಿಗೆ ೧೬ ಲಕ್ಷ, ಕ್ಲಾಕ್‌ಟವರ್ ವೃತ್ತ ಅಭಿವೃದ್ದಿಗೆ ೧೪ ಲಕ್ಷ, ಶ್ರೀನಿವಾಸಪುರ ಮತ್ತು ಅರಹಳ್ಳಿ ವೃತ್ತ ಅಭಿವೃದ್ಧಿಗೆ ೧೩ ಲಕ್ಷ, ಕುವೆಂಪು ಉದ್ಯಾನವನ ಮತ್ತು ಮ್ಯೂಸಿಕ್ ಸಿಸ್ಟಮ್ ಅಭಿವೃದ್ಧಿಗೆ ೬ ಲಕ್ಷ, ಇದಲ್ಲದೆ ಗಂಗಮ್ಮ ದೇವಸ್ಥಾನದ ವೃತ್ತದ ಅಭಿವೃದ್ದಿಗೆ ೮ ಲಕ್ಷ, ಟ್ರಯಾಂಗಲ್ ಸರ್ಕಲ್ ವೃತ್ತಕ್ಕೆ ೮ ಲಕ್ಷ, ಮೇಖ್ರಿ ವೃತ್ತ ಅಭಿವೃದ್ದಿಗೆ ೧೨ ಲಕ್ಷ, ಕೋಲಾರಮ್ಮ ದೇವಸ್ಥಾನದ ವೃತ್ತಕ್ಕೆ ೧೦ ಲಕ್ಷ ಮತ್ತು ಡ್ಯೂಂಲೈಟ್ ವೃತ್ತ ಅಭಿವೃದ್ಧಿಗೆ ೧೨ ಲಕ್ಷ ರೂ.ಗಳ ಅನುದಾನದಲ್ಲಿ ಅಭಿವೃದ್ದಿಪಡಿಸಲು ತೀರ್ಮಾನಿಸಲಾಗಿದೆ ಎಂದರು.

ಅಮೃತ್ ಯೋಜನೆ ಅಡಿಯಲ್ಲಿ ನಗರದ ಸರ್ವಜ್ಞ, ಕುವೆಂಪು ಉದ್ಯಾನವನ ಅಭಿವೃದ್ಧಿಗೆ ತಲಾ ೩೧ ಲಕ್ಷ ರೂಪಾಯಿ ಮತ್ತು ಪಾಲಸಂದ್ರ ಬಡಾವಣೆಯ ಉದ್ಯಾನವನ ಅಭಿವೃದ್ಧಿಗೆ ೧ ಕೋಟಿ ರೂಪಾಯಿ ಅನುದಾನವನ್ನು ನೀಡಲಾಗಿದೆ ಎಂದರು.

ಕೋಲಾರ ನಗರಾಭಿವೃದ್ಧಿ ಅಧ್ಯಕ್ಷರಾದ ಮಹಮ್ಮದ್ ಹನೀಫ್ ಅವರು ಮಾತನಾಡಿ ಕೋಲಾರದಲ್ಲಿನ ಶ್ರೀನಿವಾಸಪುರ ವೃತ್ತ, ಮಾಲೂರು ವೃತ್ತ, ಕ್ಲಾಕ್ ಟವರ್ ವೃತ್ತಗಳು ಸೇರಿದಂತೆ ಉದ್ಯಾನವನಗಳನ್ನು ಅಭಿವೃದ್ಧಿಪಡಿಸುವ ಕುರಿತು ಪ್ರಾಧಿಕಾರದಲ್ಲಿ ನಿರ್ಣಯ ಮಾಡಿರುವುದಾಗಿ ತಿಳಿಸಿ ಕೊಡಿಕಣ್ಣೂರು ಕೆರೆಯ ಸಮಗ್ರ ಅಭಿವೃದ್ಧಿಗೆ ನಾಲ್ಕು ಕೋಟಿ ಅನುದಾನ ಮೀಸಲಿಟ್ಟಿರುವುದಾಗಿ ತಿಳಿಸಿದರು.

ದಾನಿಗಳಿಂದ ವೃತ್ತಗಳ ಅಭಿವೃದ್ದಿ ಘೋಷಣೆ :

ಸಿ.ಬೈರೇಗೌಡ ಶಿಕ್ಷಣ ಸಂಸ್ಥೆಯ ಕಾರ್ಯದರ್ಶಿ ಕೃಷ್ಣಾರೆಡ್ಡಿ ಅವರು ನಗರದ ಬಸ್ ನಿಲ್ದಾಣದ ಬಳಿ ಇರುವ ಪಲ್ಲವಿ ವೃತ್ತದ ಸಮಗ್ರ ಅಭಿವೃದ್ಧಿಯನ್ನು ಮಾಡುವುದಾಗಿ ಭರವಸೆ ನೀಡಿದರು. ಸಮಾಜ ಸೇವಕರಾದ ಸಿ.ಎಂ.ಆರ್.ಶ್ರೀನಾಥ್ ಅವರು ಮೆಕ್ಕೆ ವೃತ್ತವನ್ನು ಅಭಿವೃದ್ಧಿ ಮಾಡುವುದಾಗಿ ತಿಳಿಸಿದರು.

ಕ್ಯಾನ್ ನೆಟ್ವರ್ಕ್ ವತಿಯಿಂದ ಪ್ಲಾಸ್ಟಿಕ್ ಮುಕ್ತ ಕೋಲಾರ ಪರಿಸರ ನಿರ್ಮಾಣ ಮಾಡುತ್ತಿದ್ದೇವೆ ಎಂದರು. ಆರ್.ವಿ.ಶಿಕ್ಷಣ ಸಂಸ್ಥೆ ವತಿಯಿಂದ ಡೂಮ್ ಲೈಟ್ ವೃತ್ತವನ್ನು ಅಭಿವೃದ್ಧಿ ಮಾಡಿ ನಮ್ಮ ಹೆಮ್ಮೆ ನಮ್ಮ ಕೋಲಾರಕ್ಕೆ ನಮ್ಮ ಸಂಪೂರ್ಣ ಸಹಕಾರ ನೀಡುತ್ತೇವೆ ಎಂದರು.

ದೇವರಾಜ ಅರಸು ಶಿಕ್ಷಣ ಸಂಸ್ಥೆ ಯಿಂದ ಕೆ.ಡಿ.ಎ ಉದ್ಯಾನವನ ಅಭಿವೃದ್ಧಿ ಮಾಡಲಾಗುವುದು, ವಿ.ಎಂ.ಡೆವಲಪರ್ಸ್ ವತಿಯಿಂದ ಸರ್ಕಾರದೊಂದಿಗೆ ಸೇರಿ ಅನೇಕ ಅಭಿವೃದ್ಧಿ ಕಾಮಗಾರಿಗಳಿಗೆ ಕೈಜೋಡಿಸುತ್ತಿದ್ದೇವೆ. ಮುಂದಿನ ದಿನಗಳಲ್ಲಿ ನಮಗೆ ಒಪ್ಪಿಸಿದ ಕೆಲಸವನ್ನು ಮಾಡುತ್ತೇವೆ ಎಂದು ಭರವಸೆ ನೀಡಿದರು.

ಒಲಿವಿಯ ರೆಸಾರ್ಟ್ ವತಿಯಿಂದ ಅಂಬೇಡ್ಕರ್ ಉದ್ಯಾನವನ ಅಭಿವೃದ್ಧಿ ಮಾಡುತ್ತೇವೆ ಎಂದರು. ಸಭೆಯಲ್ಲಿ ಭಾಗವಹಿಸಿದ್ದ ಅನೇಕ ಸಂಘ ಸಂಸ್ಥೆಗಳು ಮುಖಂಡರು ಜಿಲ್ಲಾಡಳಿತ ಮತ್ತು ನಗರಸಭೆಯೊಂದಿಗೆ ಅಭಿವೃದ್ಧಿಗೆ ಕೈ ಜೋಡಿಸುತ್ತೇವೆ ಎಂದು ಭರವಸೆ ನೀಡಿದರು.

ಅಪರ ಜಿಲ್ಲಾಧಿಕಾರಿ ಮಂಗಳ, ನಗರಸಭೆ ಆಯುಕ್ತರಾದ ನವೀನ್ ಚಂದ್ರ, ನಗರಾಭಿವೃದ್ಧಿ ಕೋಶ ಯೋಜನಾ ನಿರ್ದೇಶಕಿ ಅಂಬಿಕಾ, ಎಇಇ ಶ್ರೀನಿವಾಸ್, ಲೀಡ್ ಬ್ಯಾಂಕ್ ವ್ಯವಸ್ಥಾಪಕರಾದ ಜೋಶಿ, ಭಾರತೀಯ ಸ್ಕೌಟ್ಸ್ ಮತ್ತು ಗೈಡ್ಸ್ ಸಂಸ್ಥೆಯ ಆಯುಕ್ತರಾದ ಕೆವಿ.ಶಂಕರಪ್ಪ, ನಗರಸಭೆ ಮಾಜಿ ಸದಸ್ಯ ಮಂಜುನಾಥ್, ರೋಟರಿ ರಮೇಶ್, ಹೋಟಲ್ ಮಾಲೀಕರ ಸಂಘದ ಅಧ್ಯಕ್ಷ ನಾಗರಾಜ್, ರೇಡ್ ಕ್ರಾಸ್ ಸಂಸ್ಥೆಯ ಗೋಪಾಲ ಕೃಷ್ಣ, ಸೇರಿದಂತೆ ಸಂಘ ಸಂಸ್ಥೆಗಳ ಮುಖ್ಯಸ್ಥರು, ಉದ್ದಿಮೆದಾರರು, ಕಂಪನಿ ಮಾಲೀಕರು, ಬ್ಯಾಂಕುಗಳ ವ್ಯಾವಸ್ಥಪಕರು, ವ್ಯಾಪರಸ್ಥರು ಸೇರಿದಂತೆ ಮತ್ತಿತರರು ಉಪಸ್ಥಿತರಿದ್ದರು.