ಪಿಎಂಎಫ್‌ಎಂಇ ಯೋಜನೆ ಅನುಷ್ಠಾನದಲ್ಲಿ ಕರ್ನಾಟಕ ನಂ.1

ಬೆಂಗಳೂರು: ಪ್ರಧಾನಮಂತ್ರಿಗಳ ಕಿರು ಆಹಾರ ಸಂಸ್ಕರಣ ಉದ್ದಿಮೆ ನಿಯಮಬದ್ಧಗೊಳಿಸುವ ಯೋಜನೆ (ಪಿಎಂಎಫ್ಎಂಇ) ಅನುಷ್ಠಾನದಲ್ಲಿ ಕರ್ನಾಟಕ ಪ್ರಥಮ ಸ್ಥಾನದಲ್ಲಿದೆ. ಸಾಲ ವಿತರಣೆಯಲ್ಲಿ ಕರ್ನಾಟಕದ ಜತೆಗೆ ತಮಿಳುನಾಡು ಕೂಡ ಮೊದಲ ಸ್ಥಾನ ಹಂಚಿಕೊಂಡಿದೆ.

ರಾಜ್ಯದಲ್ಲಿ ಪಿಎಂಎಫ್ಎಂಇ ಯೋಜನೆ ಅನುಷ್ಠಾನದ ಜವಾಬ್ದಾರಿ ಹೊತ್ತಿರುವ ಕರ್ನಾಟಕ ಆಹಾರ ಸಂಸ್ಕರಣೆ ಮತ್ತು ರಫ್ತು ನಿಗಮ (ಕೆಪೆಕ್) ಈ ಸಾಧನೆ ಮಾಡಿದೆ. ಪಿಎಂಎಫ್ಎಂಇ ಯೋಜನೆಯ ನೆರವು ಬಯಸಿ ಬಂದ ಅರ್ಜಿಗಳ ಪೈಕಿ ಸಾಲ ಮಂಜೂರಾದ ಶೇ. 90 ಅರ್ಜಿಗಳಿಗೆ ಕೆಪೆಕ್ ಸಹಾಯಧನ ಸಂಪರ್ಕಿತ ಸಾಲ ವಿತರಣೆ ಆಗುವಂತೆ ನೋಡಿಕೊಂಡಿದೆ. 2021-22ರಲ್ಲಿ ಆರಂಭವಾದ ಈ ಯೋಜನೆಯ ನೆರವು ಬಯಸಿ ಕೆಪೆಕ್‌ಗೆ ಈ ಜನವರಿ ಅಂತ್ಯಕ್ಕೆ 8,734 ಅರ್ಜಿಗಳು ಬಂದಿದ್ದವು. ಈ ಪೈಕಿ 7,872 ಅರ್ಜಿದಾರರಿಗೆ ಸಾಲ ವಿತರಿಸುವ ಮೂಲಕ ಶೇ. 90 ಸಾಧನೆ ಮಾಡಿದೆ.

ಕೆಪೆಕ್ 2025-26ರ ಆರ್ಥಿಕ ವರ್ಷ ಒಂದರಲ್ಲೇ 8,162 ಅರ್ಜಿಗಳನ್ನು ಸ್ವೀಕರಿಸಿ 2,346 ಅರ್ಜಿಗಳಿಗೆ ಸಾಲ ಮಂಜೂರು ಮಾಡಿದೆ. ಈ ಪೈಕಿ 1,764 ಅರ್ಜಿದಾರರಿಗೆ ಸಾಲವನ್ನು ವಿತರಿಸಲಾಗಿದೆ. 2,486 ಅರ್ಜಿಗಳು ಬ್ಯಾಂಕುಗಳಲ್ಲಿ ಪರಿಶೀಲನಾ ಹಂತದಲ್ಲಿದೆ. ಯೋಜನೆ ಪ್ರಾರಂಭವಾದ ಐದು ವರ್ಷಗಳಲ್ಲಿ ಇದು ಗರಿಷ್ಠ ಸಾಧನೆಯಾಗಿದೆ. ಸಾಲ ವಿತರಣೆಯಲ್ಲಿ ಕರ್ನಾಟಕ ರಾಜ್ಯವು ರಾಷ್ಟ್ರದಲ್ಲಿಯೇ ಮೊದಲ ಸ್ಥಾನ ಪಡೆದುಕೊಂಡಿದೆ ಎಂದು ಕೆಪೆಕ್ ವ್ಯವಸ್ಥಾಪಕ ನಿರ್ದೇಶಕ ಸಿ.ಎನ್. ಶಿವಪ್ರಕಾಶ್ ತಿಳಿಸಿದ್ದಾರೆ.

ಬ್ಯಾಂಕುಗಳೊಂದಿಗೆ ಕೆಪೆಕ್ ಸಂಸ್ಥೆಯು ಸತತವಾಗಿ ನಡೆಸಿದ ಸಭೆಗಳು, ಅನುಸರಣಾ ಕ್ರಮಗಳು, ಬ್ಯಾಂಕುಗಳು ಹಾಗೂ ರಾಜ್ಯಮಟ್ಟದ ಬ್ಯಾಂಕರುಗಳ ಸಮಿತಿಯ ಸಹಕಾರದಿಂದ ಈ ಸಾಧನೆ ಸಾಧ್ಯವಾಗಿದೆ. ಇನ್ನು 2,486 ಅರ್ಜಿಗಳು ಬ್ಯಾಂಕುಗಳ ಪರಿಶೀಲನಾ ಹಂತದಲ್ಲಿದ್ದು, ಸದ್ಯದಲ್ಲೇ ಸರ್ಕಾರದ ಪ್ರಧಾನ ಕಾರ್ಯದರ್ಶಿಗಳ ಅಧ್ಯಕ್ಷತೆಯಲ್ಲಿ ಬ್ಯಾಂಕರುಗಳ ಸಭೆ ನಡೆಯಲಿದೆ. ಈ ಆರ್ಥಿಕ ವರ್ಷಾಂತ್ಯಕ್ಕೆ 4 ಸಾವಿರ ಅರ್ಜಿಗಳಿಗೆ ಸಹಾಯಧನ ಸಂಪರ್ಕಿತ ಸಾಲ ಮಂಜೂರಾತಿಯನ್ನು ನಿರೀಕ್ಷಿಸಲಾಗಿದೆ ಎಂದು ಶಿವಪ್ರಕಾಶ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಕರ್ನಾಟಕ 8,734 7,872 ಶೇ.90

ತಮಿಳುನಾಡು 18,167 16,388 ಶೇ.90

ಕೇರಳ 8,316 7,150 ಶೇ.86

ಉತ್ತರಪ್ರದೇಶ 22,861 19,730 ಶೇ.86

ಮಹಾರಾಷ್ಟ್ರ 28,069 23,557 ಶೇ.84

ಅಸ್ಸಾಂ 5,599 4,582 ಶೇ.82

ತೆಲಂಗಾಣ 7,393 5,850 ಶೇ.79

ಮಧ್ಯಪ್ರದೇಶ 13,885 10,966 ಶೇ.79

ಆಂಧ್ರ ಪ್ರದೇಶ 8,879 6,695 ಶೇ.75

ಬಿಹಾರ 29,393 20,087 ಶೇ.68