ಪ್ರೊಫೆಸರ್​ ಜತೆ ಸಂಬಂಧ ಕಲ್ಪಿಸಿದ ಕ್ಲಾಸ್​ಮೇಟ್ಸ್​​: ಮನನೊಂದು ಸಾವಿಗೆ ಶರಣಾದ ವೈದ್ಯಕೀಯ ವಿದ್ಯಾರ್ಥಿನಿ! Medical Student

ಬೆಂಗಳೂರು: ಪ್ರೊಫೆಸರ್​ ಜತೆ ಅನೈತಿಕ ಸಂಬಂಧದ ಕತೆ ಕಟ್ಟಿ ಸಹಪಾಠಿಗಳು ಅಪಪ್ರಚಾರ ಮಾಡಿದ್ದರಿಂದ ಮನನೊಂದ 22 ವರ್ಷ ವೈದ್ಯಕೀಯ ವಿದ್ಯಾರ್ಥಿನಿಯೊಬ್ಬಳು ( Medical Student ) ಸಾವಿಗೆ ಶರಣಾಗಿರುವ ಕರುಣಾಜನಕ ಘಟನೆ ಚಿತ್ರದುರ್ಗದಲ್ಲಿ ನಡೆದಿದೆ.

ಮೃತ ವಿದ್ಯಾರ್ಥಿನಿಯನ್ನು ನಿಖಿತಾ ಎಂ.ಯು ಎಂದು ಗುರುತಿಸಲಾಗಿದೆ. ಈಕೆ ಚಿತ್ರದುರ್ಗದ ಮಲ್ಲಾಡಿಹಳ್ಳಿಯಲ್ಲಿರುವ ರಾಘವೇಂದ್ರ ಆಯುರ್ವೇದಿಕ್​ ಕಾಲೇಜಿನಲ್ಲಿ ಆಯುರ್ವೇದ ಔಷಧ ಮತ್ತು ಶಸ್ತ್ರಚಿಕಿತ್ಸೆಯಲ್ಲಿ ಪದವಿ ಪಡೆಯುತ್ತಿದ್ದಳು.

ನಿಖಿತಾ ತಂದೆ ಉಮಾಶಂಕರ್​ ಜಿ.ಎನ್​. ಅವರು ನೀಡಿರುವ ದೂರಿನ ಪ್ರಕಾರ, ಡಾ. ರಾಜು ಹೆಸರಿನ ಲೆಕ್ಚರರ್​ ಜೊತೆ ತಮ್ಮ ಮಗಳು ಒಳ್ಳೆಯ ಸಂಬಂಧ ಹೊಂದಿದ್ದಳು. ಆದರೆ, ಆಕೆಯ ಸಹಪಾಠಿಗಳು ಒಳ್ಳೆಯ ಬಾಂದವ್ಯಕ್ಕೆ ಅನೈತಿಕ ಸಂಬಂಧದ ಕಟ್ಟು ಕತೆಯನ್ನು ಕಟ್ಟಿ ಕಾಲೇಜಿನ ತುಂಬೆಲ್ಲಾ ಅಪಪ್ರಚಾರ ಮಾಡಿದರು ಎಂದು ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.

ಸಹಪಾಠಿಗಳು ಪದೇಪದೆ ತನ್ನ ಮಗಳನ್ನು ಅಣಕಿಸುತ್ತಿದ್ದರು. ಅಲ್ಲದೆ, ಆಕೆಯ ಬಗ್ಗೆ ಕ್ಯಾಂಪಸ್​ ಪೂರ್ತಿ ಕೆಟ್ಟದಾಗಿ ಮಾತನಾಡಿಕೊಳ್ಳುತ್ತಿದ್ದರು. ಭಾರಿ ಅವಮಾನದ ಜತೆಗೆ ನನ್ನ ಮಗಳು ಭಾವನಾತ್ಮಕವಾಗಿ ನರಕಯಾತನೆಯನ್ನು ಅನುಭವಿಸಿದಳು. ಈ ರೀತಿಯ ಅಪಪ್ರಚಾರದ ಕಡೆ ಗಮನ ಕೊಡದೆ ಅಧ್ಯಯನದತ್ತ ಗಮನಹರಿಸುವಂತೆ ನಾವು ಸಲಹೆ ನೀಡಿದ್ದೆವು. ಆದರೆ, ಕಾಲೇಜಿನಲ್ಲಿ ನಿರಂತರವಾಗಿ ಕಿರುಕುಳ ಮುಂದುವರಿಯಿತು. ಇದನ್ನು ಸಹಿಸದ ನನ್ನ ಮಗಳು ಬುಧವಾರ (ಏಪ್ರಿಲ್​ 01) ಬೆಳಗ್ಗೆ 11 ಗಂಟೆ ಸುಮಾರಿಗೆ ಸಾವಿಗೆ ಶರಣಾದಳು ಎಂದು ತಂದೆ ಉಮಾಶಂಕರ್​ ಸಲ್ಲಿಸಿರುವ ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಇನ್ನು ನಿಖಿತಾಳ ಕೋಣೆಯಲ್ಲಿ ಒಂದು ಡೆತ್​ನೋಟ್​ ಕೂಡ ಪತ್ತೆಯಾಗಿದೆ. ಅದರಲ್ಲಿ ತಾನು ಎದುರಿಸಿದ ಸಂಕಷ್ಟವನ್ನು ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದಾಳೆ. ನನ್ನ ಮತ್ತು ರಾಜು ಸರ್​ ನಡುವೆ ಯಾವುದೇ ಸಂಬಂಧವಿಲ್ಲ. ನನಗೆ ಅವರು ನನ್ನ ಪಾಲಕರ ಸಮಾನ. ವಿದ್ಯಾರ್ಥಿನಿಯಾಗಿ ಅವರ ಜತೆ ಒಳ್ಳೆಯ ಬಾಂದವ್ಯ ಹೊಂದಿದ್ದ ಕಾರಣಕ್ಕೆ ನನ್ನ ಸಹಪಾಠಿಗಳು ಇಲ್ಲಸಲ್ಲದ ಕತೆಗಳನ್ನು ಕಟ್ಟಿದರು. ಆ ಕಟ್ಟುಕತೆಯನ್ನು ನಂಬಿ ರಾಜು ಅವರ ಪತ್ನಿ ನಿಶಾ ಕೂಡ ನನ್ನ ಮೇಲೆ ಅನುಮಾನಪಟ್ಟರು. ಮದುವೆಯಾದ ವ್ಯಕ್ತಿಯ ಜತೆ ನನಗೆ ಸಂಬಂಧ ಕಲ್ಪಿಸಿದ್ದನ್ನು ನನ್ನಿಂದ ಸಹಿಸಿಕೊಳ್ಳಲು ಆಗುತ್ತಿಲ್ಲ. ರಾಜು ಸರ್​ ಬಳಿ ತನ್ನ ಅಧ್ಯಯನಕ್ಕೆ ಬೇಕಾದ ಮಾರ್ಗದರ್ಶನ ಮಾತ್ರ ಪಡೆಯುತ್ತಿದ್ದೆ. ಇಲ್ಲಿ ನಾನು ಯಾವುದೇ ತಪ್ಪು ಮಾಡಿಲ್ಲ. ಅದನ್ನು ಸಾಬೀತು ಮಾಡಲೆಂದೇ ನಾನು ಇಂಥದ್ದೊಂದು ಕಠಿಣ ನಿರ್ಧಾರ ತೆಗೆದುಕೊಳ್ಳುತ್ತಿದ್ದೇನೆ. ನನ್ನ ಸಾವಿಗೆ ಸಹಪಾಠಿಗಳಾದ ರಕ್ಷಾ, ಚಿನ್ಮಯಿ, ಅನುಷಾ, ಸಾಗರ್​ ಹಾಗೂ ಗ್ರೀಷ್ಮಾ ಕಾರಣ. ಅಲ್ಲದೆ, ರಾಜು ಅವರ ಪತ್ನಿಯೂ ಕೂಡ ಕಾರಣ ಎಂದು ನಿಖಿತಾ ಉಲ್ಲೇಖಿಸಿದ್ದಾರೆ.

ಇದಿಷ್ಟೇ ಅಲ್ಲದೆ, ತಮ್ಮ ತಂದೆ-ತಾಯಿಗೆ ನಿಖಿತಾ ಕ್ಷಮೆಯಾಚಿಸಿದ್ದಾರೆ. ನೀವು ಅಂದುಕೊಂಡಿದ್ದನ್ನು ನನ್ನಿಂದ ಸಾಧಿಸಲು ಆಗಲಿಲ್ಲ ಎಂದಿದ್ದಾರೆ. ರಾಜು ಅರ್​ ತುಂಬಾ ಒಳ್ಳೆಯವರು. ಅವರ ಮೇಲೆ ಸುಖಾ ಸುಮ್ಮನೇ ಯಾವುದೇ ಆರೋಪ ಮಾಡಬೇಡಿ. ನನ್ನ ಸಹಪಾಠಿಗಳನ್ನು ನಾನೆಂದಿಗೂ ಕ್ಷಮಿಸುವುದಿಲ್ಲ ಎಂದು ಮನದ ನೋವನ್ನು ಅಕ್ಷರ ರೂಪಕ್ಕೆ ಇಳಿಸಿ, ನಿಖಿತಾ ಸಾವಿಗೆ ಶರಣಾಗಿದ್ದಾಳೆ.

ಸದ್ಯ ನಿಖಿತಾ ತಂದೆ ಉಮಾಶಂಕರ್ ಅವರು ದಾಖಲಿಸಿರುವ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿಕೊಂಡಿರುವ ಹೊಳಲ್ಕೆರೆ ಠಾಣಾ ಪೊಲೀಸರು ತನಿಖೆ ಆರಂಭಿಸಿದ್ದಾರೆ.