ಕಲಬುರಗಿ: ಪರೀಕ್ಷೆಯಲ್ಲಿ ನಕಲು ಹಿಡಿದಿದ್ದಕ್ಕೆ ಶಿಕ್ಷಕನ ಮೇಲೆ ಹಲ್ಲೆ; ಸಿಸಿಟಿವಿ ವಿಡಿಯೋ ವೈರಲ್ | Cheating in Exam

ಕಲಬುರಗಿ: ಕಾಲೇಜಿನಲ್ಲಿ ಪರೀಕ್ಷೆ ನಡೆಯುತ್ತಿದೆ ಎಂದರೆ ಅಲ್ಲಿ ಸ್ಮಶಾಣ ಮೌನ ನೆಲೆಸಿರುತ್ತದೆ. ಆದರೆ ಕಲಬುರಗಿಯ ಕಾಲೇಜೊಂದರಲ್ಲಿ ಪರೀಕ್ಷೆಯ ವೇಳೆ ನಡೆದ ಘಟನೆ ಮಾತ್ರ ಕಾಲೇಜನ್ನೇ ಸ್ಮಶಾಣವಾಗಿಸುವ ಯತ್ನ ಎಂದರೆ ತಪ್ಪಾಗದು. ನಕಲು ಮಾಡುತ್ತಿದ್ದಾಗ (Cheating in Exam) ಹಿಡಿದಿದ್ದಕ್ಕೆ ಕೋಪಗೊಂಡ ವಿದ್ಯಾರ್ಥಿಯೊಬ್ಬ, ಪರೀಕ್ಷಾ ಕೊಠಡಿಯಲ್ಲೇ ತನ್ನ ಗುರುಗಳ ಮೇಲೆ ಮನಬಂದಂತೆ ಹಲ್ಲೆ ನಡೆಸಿದ್ದಾನೆ.

ಕಲಬುರಗಿಯ ಪ್ರತಿಷ್ಠಿತ ಡಾ. ಮಲಕರೆಡ್ಡಿ ಹೋಮಿಯೋಪತಿ ಕಾಲೇಜಿನಲ್ಲಿ ಈ ಘಟನೆ ನಡೆದಿದ್ದು, ಕಾಲೇಜಿನಲ್ಲಿ ಆಂತರಿಕ ಪರೀಕ್ಷೆ ನಡೆಯುತ್ತಿದ್ದಾಗ ಕೇರಳ ಮೂಲದ ಶಹಬಾಜ್ ಎಂಬ ವಿದ್ಯಾರ್ಥಿ ಹೋಮಿಯೋಪತಿಕ್ ಮೆಟೀರಿಯಾ ಮೆಡಿಕಾ ವಿಷಯದ ಪರೀಕ್ಷೆ ಬರೆಯುತ್ತಿದ್ದ. ಆದರೆ ಈತ ಪರೀಕ್ಷಾ ಹಾಲ್‌ಗೆ ಕದ್ದುಮುಚ್ಚಿ ಮೊಬೈಲ್ ಫೋನ್ ತಂದಿದ್ದಲ್ಲದೆ, ಅದನ್ನೇ ನೋಡಿ ಉತ್ತರಗಳನ್ನು ನಕಲು ಮಾಡುತ್ತಿದ್ದ.

ಆ ಸಮಯದಲ್ಲಿ ಪರೀಕ್ಷಾ ಮೇಲ್ವಿಚಾರಕರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದ ಸಹಾಯಕ ಪ್ರಾಧ್ಯಾಪಕ ಶಿವರಾಜ್ ಕುಮಾರ್ ಅವರಿಗೆ ಅನುಮಾನ ಬಂದು ಶಹಬಾಜ್ ಬಳಿ ಹೋಗಿದ್ದಾರೆ. ಆತ ಮೊಬೈಲ್ ಬಳಸಿ ಕಾಪಿ ಮಾಡುತ್ತಿರುವುದು ರೆಡ್ ಹ್ಯಾಂಡ್ ಆಗಿ ಸಿಕ್ಕಿಬಿದ್ದಿದೆ. ತಕ್ಷಣವೇ ಕಾರ್ಯಪ್ರವೃತ್ತರಾದ ಪ್ರಾಧ್ಯಾಪಕರು ಆತನ ಉತ್ತರ ಪತ್ರಿಕೆಯನ್ನು ವಶಪಡಿಸಿಕೊಂಡು, ಪರೀಕ್ಷಾ ಕೊಠಡಿಯಿಂದ ಹೊರಹೋಗುವಂತೆ ಸೂಚಿಸಿದ್ದಾರೆ.

ಬಹಿರಂಗವಾಗಿರುವ ಸಿಸಿಟಿವಿ ದೃಶ್ಯಾವಳಿಗಳು ಬೆಚ್ಚಿಬೀಳಿಸುವಂತಿವೆ. ಮೊದಲು ಸುಮ್ಮನೆ ಕೊಠಡಿಯ ಬಾಗಿಲ ಕಡೆಗೆ ನಡೆದು ಹೋದ ವಿದ್ಯಾರ್ಥಿ ಶಹಬಾಜ್, ಇದ್ದಕ್ಕಿದ್ದಂತೆ ಹಿಂದೆ ತಿರುಗಿ ಬಂದು ಪ್ರಾಧ್ಯಾಪಕ ಶಿವರಾಜ್ ಕುಮಾರ್ ಅವರ ಮೇಲೆ ಎರಗಿದ್ದಾನೆ. ಅವರ ಮುಖ ಮತ್ತು ತಲೆಗೆ ಪದೇ ಪದೇ ಗುದ್ದಿದ್ದಾನೆ. ಈ ಹಠಾತ್ ದಾಳಿಯಿಂದ ಪ್ರಾಧ್ಯಾಪಕರು ತಬ್ಬಿಬ್ಬಾಗಿದ್ದಾರೆ. ಪರೀಕ್ಷೆ ಬರೆಯುತ್ತಿದ್ದ ಇತರ ವಿದ್ಯಾರ್ಥಿಗಳು ತಕ್ಷಣವೇ ಓಡಿಬಂದು ಶಹಬಾಜ್‌ನನ್ನು ತಡೆದಿದ್ದರಿಂದ ಮುಂದೆ ಆಗಬಹುದಾದ ಅನಾಹುತವನ್ನು ತಪ್ಪಿಸಿದ್ದಾರೆ.

ಘಟನೆಯ ಬಗ್ಗೆ ಕಾಲೇಜು ಆಡಳಿತ ಮಂಡಳಿ ಗಂಭೀರವಾಗಿ ಪರಿಗಣಿಸಿದೆ. ಪ್ರಾಧ್ಯಾಪಕರಿಂದ ಈವರೆಗೆ ಅಧಿಕೃತವಾಗಿ ಯಾವುದೇ ಪೊಲೀಸ್ ದೂರು ದಾಖಲಾಗಿಲ್ಲವಾದರೂ, ಕಾಲೇಜು ಆಂತರಿಕ ತನಿಖೆ ಆರಂಭಿಸಿದೆ. ಶಹಬಾಜ್ ಪೋಷಕರಿಗೆ ಮಾಹಿತಿ ನೀಡಲಾಗಿದ್ದು, ಮುಂದಿನ ಯಾವುದೇ ಪರೀಕ್ಷೆಗಳಿಗೆ ಹಾಜರಾಗದಂತೆ ಆತನನ್ನು ನಿರ್ಬಂಧಿಸಲಾಗಿದೆ ಎಂದು ಕಾಲೇಜ್​ ಮೂಲಗಳು ತಿಳಿಸಿವೆ,(ಏಜನ್ಸೀಸ್​).