ಕಾಲುದಾರಿ, ಬಂಡಿದಾರಿ ಮುಚ್ಚಿದರೆ ಅಪರಾಧ

ಬೆಂಗಳೂರು: ಜಮೀನಿನ ನಕಾಶೆಯ ಕಾಲುದಾರಿ, ಬಂಡಿದಾರಿಯಲ್ಲಿ ತಿರುಗಾಡಲು ತಡೆಯೊಡ್ಡಿದರೆ ಅಪರಾಧವಾಗಲಿದೆ. ಒಂದು ವೇಳೆ ಮುಚ್ಚಿದ್ದರೆ ಅಥವಾ ಅಡ್ಡಿಪಡಿಸಿದರೆ ಸಂಬಂಧಪಟ್ಟ ತಹಸೀಲ್ದಾರ್‌ಗೆ ದೂರು ಕೊಟ್ಟರೆ ಅವರು ರಸ್ತೆ ಬಿಡಿಸಲಿದ್ದಾರೆ. ಈಗಾಗಲೇ ರಾಜ್ಯದಲ್ಲಿ 7914 ದೂರು ಬಂದಿದ್ದು, ಗ್ರಾಮ ಆಡಳಿತಾಧಿಕಾರಿ ಮತ್ತು ತಹಸೀಲ್ದಾರ್ ವಿಲೇವಾರಿ ಮಾಡುತ್ತಿದ್ದಾರೆ.

ಕರ್ನಾಟಕ ಭೂ ಕಂದಾಯ ನಿಯಮಗಳು 1966ರ ನಿಯಮ 59ರಲ್ಲಿ ದಾರಿಯ ಹಕ್ಕುಗಳು ಮತ್ತು ಇತರ ಅನುಭೋಗದ ಹಕ್ಕುಗಳ ಉಲ್ಲೇಖವಿದೆ. ಸಂಬಂಧಪಟ್ಟ ಜಮೀನುಗಳ ಭಾಗಿದಾರರು ಒಪ್ಪಿರುವಂತಹ ಸಂದರ್ಭದಲ್ಲಿ ಹಕ್ಕುಗಳ ದಾಖಲೆ ರಿಜಿಸ್ಟಾರ್‌ನಲ್ಲಿ ನಮೂದು ಮಾಡಲು ಅವಕಾಶ ಇದೆ. ದಿ ಇಂಡಿಯನ್ ಅಸೆಸ್‌ಮೆಂಟ್ ಆಕ್ಟ್ 1882ರಂತೆ ಪ್ರತಿ ಜಮೀನಿನ ಮಾಲೀಕರು ಅಥವಾ ಜಮೀನಿನ ಅನುಭವದಲ್ಲಿ ಇರುವವರು ಅವರ ಭೂಮಿ

ಪ್ರವೇಶಿಸುವ ಹಕ್ಕು ಮತ್ತು ವಹಿವಾಟಿನ ಹಕ್ಕನ್ನು ಹೊಂದಿರುತ್ತಾರೆ. ಇದಕ್ಕಾಗಿ ಬಾಜುದಾರರಿಂದ ಹಸ್ತಕ್ಷೇಪ ಅಥವಾ ಹಕ್ಕನ್ನು ಕಿತ್ತುಕೊಳ್ಳವುದಕ್ಕೆ ಸಾಧ್ಯವಿಲ್ಲ. ಇದಲ್ಲದೆ, ದಂಡ ಪ್ರಕ್ರಿಯಾ ಸಂಹಿತೆ 1973ರ ಕಲಂ 147 ಅನ್ವಯ ಭೂಮಿ ಮತ್ತು ನೀರಿನ ಹಕ್ಕಿನ ಉಪಯೋಗದ ಕುರಿತು ಸ್ಥಳೀಯ ಶಾಂತಿಗೆ ಭಂಗ ಉಂಟಾಗುವ ಸಂದರ್ಭದಲ್ಲಿ ಅದನ್ನು ನಿವಾರಿಸಲು ಕಾನೂನು ಪ್ರಕಾರ ಅಧಿಕಾರ ಚಲಾಯಿಸಲು ತಹಸೀಲ್ದಾರ್‌ಗೆ ಮ್ಯಾಜಿಸ್ಟ್ರೇಟ್ ಅಧಿಕಾರ ಇರುತ್ತದೆ. ಅದರಂತೆ ತಾಲೂಕು ತಹಸೀಲ್ದಾರ್ ನಕಾಶ ಕಂಡ ಕಾಲುದಾರಿ ಮತ್ತು ಬಂಡಿದಾರಿ ಅಥವಾ ರಸ್ತೆಗಳಲ್ಲಿ ಅನ್ಯ ಕೃಷಿ ಬಳಕೆದಾರರು ತಿರುಗಾಡಲು ಅವಕಾಶ ನೀಡದೆ ಅಡ್ಡಿಪಡಿಸುವುದು ಅಥವಾ ಬಳಸಲು ಮುಚ್ಚಿರುವುದು ಅಪರಾಧ. ಇಂತಹ ಸಂದರ್ಭದಲ್ಲಿ ತೆರವು ಮಾಡಿ ತಿರುಗಾಡಲು ದಾರಿಗಳನ್ನು ಸುಗಮಗೊಳಿಸುವಂತೆ 2023ರ ಅಕ್ಟೋಬರ್ 20ರಂದು ಕಂದಾಯ ಇಲಾಖೆ ಆದೇಶ ಹೊರಡಿಸಿದೆ.

ಸಾಮಾನ್ಯವಾಗಿ ಜಮೀನಿನಲ್ಲಿ ಬಂಡಿದಾರಿ ಮತ್ತು ಕಾಲುದಾರಿ ಇದ್ದರೂ ಅದನ್ನು ಮುಚ್ಚಿರುತ್ತಾರೆ. ಆದರೆ, ಬ್ರಿಟಿಷರು ಮಾಡಿರುವ ನಕಾಶದಲ್ಲಿ ಉಲ್ಲೇಖ ಇರಲಿದೆ. ಅದರಂತೆ ಪ್ರತಿಯೊಬ್ಬರೂ ಬಿಡಲೇ ಬೇಕು. ಒಂದು ಕಾಲುದಾರಿ ಮತ್ತು ಬಂಡಿದಾರಿಯನ್ನು ಮುಚ್ಚಿದ್ದರೆ ಮತ್ತು ತಡೆದರೆ ಅಪರಾಧ ಎಂದು ಕಂದಾಯ ಇಲಾಖೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಕೆಲವೊಂದು ಜಿಲ್ಲೆಗಳಲ್ಲಿ ನಕಾಶ ದಾಖಲೆಯಂತೆ ಬಂಡಿದಾರಿ, ಕಾಲುದಾರಿಯಲ್ಲಿ ತಿರುಗಾಡಲು ಅವಕಾಶ ಮಾಡಿಕೊಡುವಂತೆ ಅರ್ಜಿ ಸಲ್ಲಿಸಿದರೂ ಗ್ರಾಮ ಆಡಳಿತಾಧಿಕಾರಿಗಳು ಮತ್ತು ತಹಸೀಲ್ದಾರ್ ಕ್ರಮ ವಹಿಸುತ್ತಿಲ್ಲ ಎಂಬ ಆರೋಪಗಳು ಇವೆ. ಈ ಬಗ್ಗೆ ಕಂದಾಯ ಇಲಾಖೆ ಗಮನ ನೀಡಬೇಕೆಂದು ಸಾರ್ವಜನಿಕರ ಮನವಿಯಾಗಿದೆ.

ಜಿಲ್ಲೆ ಸ್ವೀಕೃತ ಅರ್ಜಿಗಳು

ತುಮಕೂರು 2933

ಹಾಸನ 1127

ದಾವಣಗೆರೆ 809

ಬೆಂ. ದಕ್ಷಿಣ 564

ಚಿಕ್ಕಮಗಳೂರು 333

ಬೆಂಗಳೂರು ನಗರ 283

ರಾಯಚೂರು 240

ಬೆಂ. ಗ್ರಾಮಾಂತರ 230

ಬೆಳಗಾವಿ 138

ಬೀದರ 127

ಒಟ್ಟು 7914