ಇಂಡಿಯನ್ ಪಿಕಲ್‌ಬಾಲ್ ಲೀಗ್ ನಾಕೌಟ್ ರೇಸ್: ಗೆಲುವಿನ ಸನಿಹ ಎಡವಿದ ಬೆಂಗಳೂರು ಬ್ಲಾಸ್ಟರ್ಸ್

ಪಂದ್ಯದ ಆರಂಭದಲ್ಲಿ ಬೆಂಗಳೂರು ಬ್ಲಾಸ್ಟರ್ಸ್ ಆಟಗಾರರು ಅಕ್ಷರಶಃ ಅಬ್ಬರಿಸಿದರು. ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಕಣಕ್ಕಿಳಿದ ತಂಡದ ಪ್ರಮುಖ ಆಟಗಾರ ಫುಕ್ ಹುವಿನ್, ಎದುರಾಳಿ ದಿವ್ಯಾಂಶು ಕಟಾರಿಯಾ ಅವರನ್ನು 15-10 ಅಂತರದಲ್ಲಿ ಮಣಿಸಿ ತಂಡಕ್ಕೆ ಶುಭಾರಂಭ ಒದಗಿಸಿದರು. ಈ ಲಯವನ್ನು ಪುರುಷರ ಡಬಲ್ಸ್‌ನಲ್ಲೂ ಮುಂದುವರಿಸಿದ ಹುವಿನ್, ಅರ್ಜುನ್ ಸಿಂಗ್ ಅವರೊಂದಿಗೆ ಜೊತೆಗೂಡಿ ಮತ್ತೆ ಅದೇ 15-10 ಅಂತರದಲ್ಲಿ ಗೆಲುವು ಸಾಧಿಸುವ ಮೂಲಕ ತಂಡದ ಮುನ್ನಡೆಯನ್ನು 2-0ಗೆ ಏರಿಸಿದರು. ಬಳಿಕ ಬಂದ ಮಹಿಳಾ ಸಿಂಗಲ್ಸ್ ಪಂದ್ಯವು ಪ್ರೇಕ್ಷಕರನ್ನು ತುದಿಗಾಲಲ್ಲಿ ನಿಲ್ಲಿಸಿತು. ಆರಂಭಿಕ ಹಿನ್ನಡೆಯ ನಡುವೆಯೂ ಛಲ ಬಿಡದ ಬೆಂಗಳೂರಿನ ಪೀ ಚುವಾನ್ ಕಾವೊ, ಮೇಗನ್ ಫಡ್ಜ್ ವಿರುದ್ಧ 15-13 ಅಂತರದ ರೋಚಕ ಜಯ ದಾಖಲಿಸಿದರು. ಇದರೊಂದಿಗೆ ಬೆಂಗಳೂರು ತಂಡವು 3-0 ಅಂತರದ ಬಲಿಷ್ಠ ಮುನ್ನಡೆ ಸಾಧಿಸಿ ಪಂದ್ಯವನ್ನು ಸುಲಭವಾಗಿ ಗೆಲ್ಲುವ ಮುನ್ಸೂಚನೆ ನೀಡಿತ್ತು.

ಮುಂದುವರಿದ ಹೈದರಾಬಾದ್ ಪಂದ್ಯದ ದ್ವಿತೀಯಾರ್ಧದಲ್ಲಿ ನಡೆದ ನಾಟಕೀಯ ಬೆಳವಣಿಗೆಯಲ್ಲಿ ಹೈದರಾಬಾದ್ ರಾಯಲ್ಸ್ ತಂಡವು ಬೆಂಗಳೂರಿನ ಲೆಕ್ಕಾಚಾರವನ್ನು ತಲೆಕೆಳಗಾಗಿಸಿತು. ಮಹಿಳಾ ಡಬಲ್ಸ್‌ನಲ್ಲಿ ಮೇಗನ್ ಫಡ್ಜ್ ಮತ್ತು ಶ್ರೇಯಾ ಚಕ್ರವರ್ತಿ ಜೋಡಿಯು ಬೆಂಗಳೂರು ತಂಡವನ್ನು 15-7 ಅಂತರದಲ್ಲಿ ಮಣಿಸಿ ತಿರುಗೇಟು ನೀಡಿತು. ಪಂದ್ಯದ ಫಲಿತಾಂಶವನ್ನು ನಿರ್ಧರಿಸುವ ಅಂತಿಮ 'ಗ್ರಾಂಡ್ ರಾಲಿ' ಸುತ್ತಿನಲ್ಲಿ ಒತ್ತಡಕ್ಕೆ ಸಿಲುಕಿದ ಬೆಂಗಳೂರು ತಂಡವು 21-19 ಅಂತರದ ಕಠಿಣ ಹೋರಾಟದಲ್ಲಿ ಸೋಲೊಪ್ಪಿಕೊಂಡಿತು. ಅಂತಿಮವಾಗಿ 3-0 ಮುನ್ನಡೆಯಲ್ಲಿದ್ದ ಪಂದ್ಯವು 3-3 ರಲ್ಲಿ ಸಮಬಲಗೊಂಡು ಅಂತ್ಯವಾಯಿತು. ಅರ್ಜುನ್ ಮತ್ತು ಕಾವೊ ಅವರು 'ಪ್ಲೇಯರ್ ಆಫ್ ದ ಟೈ' ಗೌರವಕ್ಕೆ ಪಾತ್ರರಾದರು.

ಈ ಡ್ರಾ ಫಲಿತಾಂಶ ಹಾಗೂ ದಿನದ ಮತ್ತೊಂದು ಪಂದ್ಯದಲ್ಲಿ ಮುಂಬೈ ಸ್ಮಾಶರ್ಸ್ ತಂಡ ಗೆಲುವು ಸಾಧಿಸಿದ್ದರಿಂದ, ಅಂಕಪಟ್ಟಿಯಲ್ಲಿ ಸಂಕೀರ್ಣ ಸನ್ನಿವೇಶ ಸೃಷ್ಟಿಯಾಗಿದೆ. ಸದ್ಯ ಬೆಂಗಳೂರು ಬ್ಲಾಸ್ಟರ್ಸ್, ಮುಂಬೈ ಸ್ಮಾಶರ್ಸ್ ಮತ್ತು ಗುರಗಾಂವ್ ವಾರಿಯರ್ಸ್ ತಂಡಗಳು ಸಮಾನ ಅಂಕಗಳನ್ನು ಹೊಂದಿವೆ. ಹೀಗಾಗಿ ನಾಕೌಟ್ ಹಂತದ ಏಕೈಕ ಸ್ಥಾನಕ್ಕಾಗಿ ಶನಿವಾರ ಈ ಮೂರು ತಂಡಗಳ ನಡುವೆ 25 ಪಾಯಿಂಟ್‌ಗಳ ವಿಶೇಷ 'ಗ್ರಾಂಡ್ ರಾಲಿ' ಮಿನಿ ಟೂರ್ನಮೆಂಟ್ ನಡೆಯಲಿದೆ. ಇದರಲ್ಲಿ ಗೆದ್ದ ತಂಡವಷ್ಟೇ ಲಕ್ನೋ ಲಿಯೋಪಾರ್ಡ್ಸ್ ವಿರುದ್ಧ ಎಲಿಮಿನೇಟರ್ ಪಂದ್ಯ ಆಡಲು ಅರ್ಹತೆ ಪಡೆಯಲಿದೆ.