ರಾಜ್ಯ

ಅವೈಜ್ಞಾನಿಕ ಹಂಪ್​ಗಳಿಂದ ಹೆಚ್ಚಿದ ಅಡಚಣೆ

Increased obstruction due to unscientific humps
Increased obstruction due to unscientific humps
ಚಿಕ್ಕಬಳ್ಳಾಪುರ ಡೆಸ್ಕ್
Published on: 
ಚೇಳೂರು: ತಾಲೂಕಿನ ಹೊಸಹುಡ್ಯ ಗ್ರಾಮದಲ್ಲಿ ಚೇಳೂರಿನಿಂದ ಚಿಂತಾಮಣಿಗೆ ಸಂಪರ್ಕ ಕಲ್ಪಿಸುವ ಮುಖ್ಯ ರಸ್ತೆಯಲ್ಲಿ ಅವೈಜ್ಞಾನಿಕವಾಗಿ ನಿರ್ಮಿಸಿರುವ ರಸ್ತೆ ಹಂಪ್​ಗಳು ವಾಹನ ಸವಾರರಿಗೆ ಭಾರಿ ತೊಂದರೆ ಉಂಟುಮಾಡುತ್ತಿವೆ.
ಸುಮಾರು 400 ಮೀಟರ್​ ದೂರದ ರಸ್ತೆಯೊಳಗೆ 3 ಕಡೆ ಒಟ್ಟು 9 ಹಂಪ್​ ನಿರ್ಮಿಸಿರುವುದರಿಂದ ದಿನನಿತ್ಯ ಸಂಚರಿಸುವ ವಾಹನ ಸವಾರರು ಸಂಕಷ್ಟ ಅನುಭವಿಸುತ್ತಿದ್ದಾರೆ.
ಈ ರಸ್ತೆಯಲ್ಲಿ ಅತಿಯಾದ ಹಂಪ್​ ನಿರ್ಮಿಸಿರುವುದರಿಂದ ವಾಹನಗಳು ಆಗಾಗ್ಗೆ ಬ್ರೇಕ್​ ಹಾಕಬೇಕಾದ ಪರಿಸ್ಥಿತಿ ಎದುರಾಗಿದೆ. ಈ ಪರಿಣಾಮವಾಗಿ ಬೈಕ್​, ಕಾರು ಸೇರಿ ಹಲವು ವಾಹನಗಳ ಭಾಗಗಳು ಹಾನಿಗೊಳಗಾಗುತ್ತಿದ್ದು, ವಾಹನಗಳನ್ನು ರಿಪೇರಿ ಮಾಡಿಸಲು ಸವಾರರು ವೆಚ್ಚ ಮಾಡಬೇಕಾದ ಸ್ಥಿತಿ ನಿರ್ಮಾಣವಾಗಿದೆ.
ಸ್ಥಳಿಯ ವಾಹನ ಸವಾರರು ಮತ್ತು ಗ್ರಾಮಸ್ಥರು ಹೇಳುವಂತೆ, ವೈಜ್ಞಾನಿಕ ಮಾನದಂಡ ಪಾಲಿಸದೆ ಹಂಪ್​ಗಳನ್ನು ನಿರ್ಮಿಸಲಾಗಿದೆ. ಸಾಮಾನ್ಯವಾಗಿ ರಸ್ತೆ ಹಂಪ್​ಗಳ ನಡುವಿನ ಅಂತರ ಕನಿಷ್ಠ 100 ಮೀಟರ್​ ಇರಬೇಕು ಎಂದು ಮಾರ್ಗಸೂಚಿಗಳು ಹೇಳುತ್ತವೆ. ಆದರೆ, ಇಲ್ಲಿ ಅಲ್ಪ ದೂರದಲ್ಲಿ ಹಲವಾರು ಹಂಪ್​ಗಳನ್ನು ನಿರ್ಮಿಸಿರುವುದರಿಂದ ಸಂಚಾರ ದುಸ್ತರವಾಗಿದೆ.
ಹಂಪ್​ಗಳು ಅತಿಯಾಗಿ ಎತ್ತರವಾಗಿರುವುದರಿಂದ ವಿಶೇಷವಾಗಿ ದ್ವಿಚಕ್ರ ವಾಹನ ಸವಾರರು ಅಪಾಯದ ಭೀತಿಯಲ್ಲಿ ಸಂಚರಿಸಬೇಕಾಗಿದೆ.
ಎಷ್ಟೋ ಬಾರಿ ಈ ಹಂಪ್​ಗಳಿಂದ ಅಪಘಾತಗಳು ಆಗಿವೆ. ಸಾಕಷ್ಟು ಆಸ್ಪತ್ರೆಗೆ ದಾಖಲಾಗಿದ್ದಾರೆ. ರಾತ್ರಿ ಸಮಯದಲ್ಲಿ ಸರಿಯಾದ ಗುರುತು ಅಥವಾ ಎಚ್ಚರಿಕೆ ಫಲಕಗಳಿಲ್ಲದ ಕಾರಣ ಅಪಘಾತ ಸಂಭವಿಸುವ ಸಾಧ್ಯತೆ ಹೆಚ್ಚಾಗಿದೆ ಎಂದು ಸ್ಥಳಿಯರು ಆತಂಕ ವ್ಯಕ್ತಪಡಿಸಿದ್ದಾರೆ.
ಈ ಬಗ್ಗೆ ಸಂಬಂಧಪಟ್ಟ ಲೋಕೋಪಯೋಗಿ ಇಲಾಖೆ ಅಧಿಕಾರಿಗಳಿಗೆ ತಿಳಿಸಿದರೂ ಯಾವ ಪ್ರಯೋಜನ ಆಗಿಲ್ಲ.
ಸಂಬಂಧಿಸಿದ ಅಧಿಕಾರಿಗಳು ಅವೈಜ್ಞಾನಿಕ ಹಂಪ್​ಗಳನ್ನು ತೆರವುಗೊಳಿಸಿ, ಸಂಚಾರಕ್ಕೆ ಅನುಕೂಲವಾಗುವಂತೆ ವಾಹನ ಸವಾರರು ಮತ್ತು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.
"

"ಚೇಳೂರುನಿಂದ ಚಿಂತಾಮಣಿ ರಸ್ತೆಯ ಹೊಸಹುಡ್ಯ (ಉಪ್ಪುಕುಂಟಪಲ್ಲಿ) ಗ್ರಾಮದಲ್ಲಿ ಅಧಿಕಾರಿಗಳ ರ್ನಿಲಕ್ಷದಿಂದ ಮೂರು ಕಡೆ ಹಂಪ್​ಗಳನ್ನು ಹಾಕಿದ್ದು ಪ್ರಯಾಣಿಕರಿಗೆ ತೊಂದರೆ ಆಗಿದೆ."

> ವೆಂಕಟೇಶ್​, ಡೆವರ್​ ಚೇಳೂರು

"

"ಹಂಪ್​ಗಳ ಸಮಸ್ಯೆ ಬಗ್ಗೆ ನಮ್ಮ ಗಮನಕ್ಕೆ ಬಂದಿದೆ ಇದರ ಬಗ್ಗೆ ಎಇಇ ಅಧಿಕಾರಿಗಳ ಜತೆ ಚರ್ಚಿಸಿ, ಸ್ಥಳಕ್ಕೆ ಪರಿಶಿಲನೆ ಮಾಡಿ ಜನರಿಗೆ ತೊಂದರೆ ಆಗದಂತೆ ಕ್ರಮಕೈಗೊಳ್ಳಲಾಗುವುದು."

> ಕಲ್ಯಾಣ್​ ಕುಮಾರ್​, ಕಿರಿಯ ಅಭಿಯಂತರರು ಬಾಗೇಪಲ್ಲಿ

unscientific
Increased
humps
obstruction
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net