ಕಮಿಷನ್ ಕೊಟ್ಟರೆ ಅತ್ಯುತ್ತಮ ವಿನ್ಯಾಸದ ಮೈಸೂರು ರೇಷ್ಮೆ ಸೀರೆ ಕೊಡ್ತಾರೆ: ಕೆಎಸ್‌ಐಸಿ ಮಳಿಗೆಯಲ್ಲಿ ಕಮಿಷನ್ ದಂಧೆ-Commission scam at KSIC store

ಬೆಂಗಳೂರಿನ ಎಂ.ಜಿ.ರಸ್ತೆ, ಬಸವೇಶ್ವರನಗರ, ಕೆ.ಜಿ.ರಸ್ತೆ, ಗಾಂಧಿ ಬಜಾರ್, ಮಲ್ಲೇಶ್ವರಂ ವೃತ್ತ, ಜಯನಗರ, ಮೈಸೂರಿನ ಮನಂತೋಡಿ ರಸ್ತೆ, ಮೃಗಾಲಯದ ಮುಖ್ಯ ರಸ್ತೆ, ಕೆ.ಆರ್. ಸರ್ಕಲ್, ಜೆಎಲ್‌ಬಿ ರಸ್ತೆ, ಕಾಳಿದಾಸ ರಸ್ತೆ, ಬೆಂ.ದಕ್ಷಿಣದ ಚನ್ನಪಟ್ಟಣ, ದಾವಣಗೆರೆ, ಹೈದರಾಬಾದ್‌ನಲ್ಲಿ ಕೆಎಸ್‌ಐಸಿ ಮಾರಾಟ ಮಳಿಗೆಗಳಿವೆ. ಅತ್ಯುತ್ತಮ ಗುಣಮಟ್ಟ, ಶುದ್ಧತೆಯ ಭರವಸೆ ಇರುವುದರಿಂದ ಗ್ರಾಹಕರು, ಸೀರೆ ಖರೀದಿಸಲು ಕೆಎಸ್‌ಐಸಿ ಮಳಿಗೆಗಳ ಮುಂದೆ ಸರದಿ ಸಾಲಿನಲ್ಲಿ ನಿಲ್ಲುತ್ತಿದ್ದಾರೆ. ಭೌಗೋಳಿಕ ಸೂಚನೆ(ಜಿಐ) ಟ್ಯಾಗ್ ಹೊಂದಿರುವ ಏಕೈಕ ಮೈಸೂರು ಸಿಲ್ಕ್ ಸೀರೆಗಳ ಉತ್ಪಾದಕ ಸಂಸ್ಥೆ ಕೆಎಸ್‌ಐಸಿ ಆಗಿದೆ.

ಸೀರೆಗಳ ನೇಕಾರಿಕೆ ಪ್ರಕ್ರಿಯೆ ಬಹಳ ಸೂಕ್ಷ್ಮವಾಗಿದ್ದು, ನುರಿತ ಕುಶಲಕರ್ಮಿಗಳು ಕಡಿಮೆ ಇರುವುದರಿಂದ ಬೇಡಿಕೆಗೆ ತಕ್ಕಷ್ಟು ಪೂರೈಕೆ ಮಾಡಲು ಸಾಧ್ಯವಾಗುತ್ತಿಲ್ಲ. 23 ಸಾವಿರ ರೂ. ನಿಂದ 2.5 ಲಕ್ಷದವರೆಗೆ ಸೀರೆಗೆ ದರ ಇದೆ. ಮಳಿಗೆಗಳಲ್ಲಿನ ವಿಪರೀತ ಜನಸಂದಣಿ ನಿಯಂತ್ರಿಸಲು ಮತ್ತು ಎಲ್ಲರಿಗೂ ಸೀರೆ ಸಿಗುವಂತೆ ಮಾಡಲು ಪ್ರತಿ ಗ್ರಾಹಕರಿಗೆ ಒಂದೇ ಸೀರೆ ನೀಡಲಾಗುತ್ತಿದೆ. ಟೋಕನ್ ವ್ಯವಸ್ಥೆಯನ್ನು ಜಾರಿಗೆ ತರಲಾಗಿದೆ. ಆದರೆ, ಕಮಿಷನ್ ನೀಡದವರಿಗೆ ಯಾವುದೇ ಸೀರೆ ತೋರಿಸಿ ಮಾರಾಟ ಮಾಡಲಾಗುತ್ತಿದೆ. ಖಾಸಗಿ ಮಳಿಗೆಗಳು ಸಹ ಮೈಸೂರು ರೇಷ್ಮೆ ಸೀರೆ ಎಂದು ಹೇಳಿ ಮಹಿಳೆಯರಿಗೆ ಮಾರಾಟ ವಂಚಿಸುತ್ತಿರುವ ಬಗ್ಗೆ ದೂರುಗಳಿವೆ.

ಕರ್ನಾಟಕ ರೇಷ್ಮೆ ಉದ್ಯಮಗಳ ನಿಗಮವು 2022-23ರಿಂದ 2024-25ವರೆಗೆ 3.10 ಲಕ್ಷ ಸೀರೆಗಳ ತಯಾರಿಕೆ ಪೈಕಿ 3.09 ಲಕ್ಷ ಸೀರೆ ಮಾರಾಟದಿಂದ 221 ಕೋಟಿ ರೂ.ಲಾಭ ಗಳಿಸಿದೆ. ಇನ್ನಷ್ಟು ಲಾಭ ಗಳಿಸುವ ಅವಕಾಶವಿದ್ದರೂ ಆಡಳಿತ ವ್ಯವಸ್ಥೆಯ ಅಸಹಾಯಕತೆಯಿಂದ ಕೆಎಸ್‌ಐಸಿ ನಲುಗುತ್ತಿದೆ. ಇದರಿಂದಾಗಿ ರಾಜ್ಯದ ಅಸ್ಮಿತೆಯಾಗಿ, ಮಹಿಳೆಯರ ಅಚ್ಚುಮೆಚ್ಚಿನ ಅದ್ಧೂರಿಯ ಉಡುಗೆಯಾಗಿರುವ ‘ಮೈಸೂರು ರೇಷ್ಮೆ ಸೀರೆ’ ತಯಾರಿಗೆ ಹೊಸತನ ಸೃಷ್ಟಿಸಲಾಗದ ವ್ಯಥೆ ಪಡೆಯುತ್ತಿದೆ. ಮೈಸೂರಿನ ಪ್ರಭಾವಿಗಳಿಗೆ ಹೊರ ನಗರಗಳಿಂದ, ವಿದೇಶದಿಂದ ಜನರು ಕರೆ ಮಾಡಿ ನಮಗೊಂದು ಅತ್ಯುತ್ತಮ ರೇಷ್ಮೆ ಸೀರೆ ಬೇಕಿದೆ ಕೊಡಿಸಬಹುದೇ ಎಂದು ಅವರ ಮೂಲಕ ಪ್ರಭಾವ ಬೀರುತ್ತಿದ್ದಾರೆ. ಇದು ಸಾಮಾನ್ಯವಾದ ಸೀರೆಯಲ್ಲ. ಜಗತ್ತಿನ ಹೆಂಗಳೆಯರ ಗೆದ್ದ ಸೀರೆಯಾಗಿದೆ. ಆದರೆ, ಅವರ ಬೇಡಿಕೆಗೆ ಸೂಕ್ತವಾಗಿ ಉದ್ಯಮ ಬೆಳೆಸಲಾಗದೆ ಉದ್ಯೊಗ ಸೃಷ್ಟಿಯ, ಆರ್ಥಿಕತೆಗೆ ಬೂಸ್ಟ್ ಒದಗಿಸಬಹುದಾಗಿದ್ದ ಕಾಮಧೇನುವಿನಂಥ ಉದ್ಯಮವನ್ನು ಉಸಿರುಕಟ್ಟಿಸಲಾಗುತ್ತಿದೆ. ಜನರ ಒತ್ತಡ, ಬೇಡಿಕೆ ತಡೆಕೊಳ್ಳಲಾಗದೆ ಆನ್‌ಲೈನ್ ಮಾರಾಟ ಸೇವೆ ರದ್ದುಪಡಿಸಲಾಗಿದೆ. ಎಲ್ಲ ಉದ್ಯಮಗಳು ಆನ್‌ಲೈನ್ ವ್ಯವಹಾರ ನಂಬಿಕೊಂಡಿದ್ದರೆ, ಮೈಸೂರು ರೇಷ್ಮೆ ಸೀರೆ ಮಾರಾಟವನ್ನು ಮತ್ತೆ ಹಳೆಯ ಸಾಂಪ್ರದಾಯಿಕ ಶೈಲಿಗೆ ಸಂಬಂಧಿಸಿದವರು ಸೀಮಿತಗೊಳಿಸಿದ್ದಾರೆ.