ಇಡ್ಲಿಗೆ 80, ದೋಸೆಗೆ 150, ಬಿರಿಯಾನಿಗೆ 500 ರೂಪಾಯಿ! ಬೆಲೆ ಹೆಚ್ಚಳದ ಎಚ್ಚರಿಕೆ ನೀಡಿದ Hotel ಮಾಲೀಕರ ಸಂಘ

ಪತ್ರಿಕಾ ಹೇಳಿಕೆ ಹೊರಡಿಸಿರುವ ಅವರು, ಅವೈಜ್ಞಾನಿಕ ವೇತನ ಪರಿಷ್ಕರಣೆಯಿಂದ ಆತಿಥ್ಯ ಕ್ಷೇತ್ರಕ್ಕೆ ಸಮಸ್ಯೆ ಆಗಲಿದೆ. ಈಗ ಇರುವ ವೇತನಕ್ಕೆ ಹೋಲಿಸಿದರೆ ಶೇ.60 ಅಧಿಕ ಹೆಚ್ಚಳವನ್ನು ಸರ್ಕಾರ ಮಾಡಿದೆ. ಇದು ಸಂಕಷ್ಟದಲ್ಲಿರುವ ಉದ್ಯಮಕ್ಕೆ ಹೊಡೆದ ನೀಡಲಿದೆ. ಪರಿಣಾಮವಾಗಿ ಆಹಾರಗಳ ಬೆಲೆ ಏರಿಸುವುದು ಅನಿವಾರ್ಯವಾಗಲಿದೆ. ಆದ್ದರಿಂದ ಸರ್ಕಾರ ತಕ್ಷಣವೇ ಮಧ್ಯಪ್ರವೇಶಿಸಬೇಕು ಎಂದು ಜಿ.ಕೆ.ಶೆಟ್ಟಿ ಆಗ್ರಹಿಸಿದ್ದಾರೆ.

ಎಲ್​ಪಿಜಿ ಸಿಲಿಂಡರ್​ಗಳ ಬೆಲೆ 1,884ರೂ. ನಿಂದ 3,152ರೂ. ಗೆ ಏರಿಕೆಯಾಗಿದೆ. ದಿನಸಿ, ವಿದ್ಯುತ್​ ದರ ಮತ್ತು ಕಸದ ಸೆಸ್​ಗಳೂ ಏರಿಕೆಯಾಗಿವೆ. ಕನಿಷ್ಠ ವೇತನ ಹೆಚ್ಚಳ ಜಾರಿ ಸಂದರ್ಭದಲ್ಲಿ ಕ್ಷೇತ್ರವನ್ನು ಪ್ರತ್ಯೇಕ ವರ್ಗವಾಗಿ ಪರಿಗಣಿಸುವಂತೆ ಸರ್ಕಾರಕ್ಕೆ ಮನವಿ ಸಲ್ಲಿಸಲಾಗಿತ್ತು. ಆದರೆ, ಅದನ್ನು ಪರಿಗಣಿಸಿಲ್ಲ. ಹೋಟೆಲ್​ ಮಾಲೀಕರು ಮತ್ತು ಗ್ರಾಹಕರಿಗೆ ಉಂಟಾಗಬಹುದಾದ ಸಂಭಾವ್ಯ ನಷ್ಟ ತಡೆಯಲು ಸರ್ಕಾರ ವೇತನ ಪರಿಷ್ಕರಣೆ ಮರುಪರಿಶೀಲಿಸಬೇಕು ಎಂದು ರಾಜ್ಯ ಹೋಟೆಲ್​ಗಳ ಸಂಘ ಕೋರಿದೆ.

ಹೋಟೆಲ್​ ಉದ್ಯಮವು ಈಗಾಗಲೇ ಕಾರ್ಮಿಕರಿಗೆ ಆಹಾರ, ವಸತಿ, ಯೂನಿಫಾರ್ಮ್​ ಹಾಗೂ ತೊಳೆಯುವ ಭತ್ಯೆ ಸೇರಿ ಹಲವು ಸೌಲಭ್ಯಗಳನ್ನು ನೀಡುತ್ತಿದೆ. ರಾಜ್ಯದಲ್ಲಿ ಅತಿ ಹೆಚ್ಚಿನ ಉದ್ಯೋಗ ಸೃಷ್ಟಿ ಈ ಕ್ಷೇತ್ರದಿಂದ ಆಗಿದೆ. ಈ ಅವೈಜ್ಞಾನಿಕ ವೇತನ ಹೆಚ್ಚಳವು ಕ್ಷೇತ್ರದ ಮೇಲೆ ಮಾಡಿರುವ ಗದಾಪ್ರಹಾರವಾಗಿದೆ. ವಾಸ್ತವ ಸ್ಥಿತಿ ಪರಿಗಣಿಸಿ ಸರ್ಕಾರ ಪರಿಷ್ಕರಣೆ ಮಾಡಬೇಕಿತ್ತು ಎಂದು ಸಂಘ ಹೇಳಿದೆ.