ಪೈಪ್​ಲೈನ್​ ಅಳವಡಿಸಲು ಭೂಸ್ವಾಧೀನ ಅಗತ್ಯವಿಲ್ಲ| High court

ಖಾಸಗಿ ಮಾಲೀಕರ ಒಪ್ಪಿಗೆಯಿಲ್ಲದಿದ್ದರೂ ಅವರ ಜಾಗದ ಅಡಿಯಲ್ಲಿ ಪೈಪ್​ಲೈನ್​ ಅಳವಡಿಸಲು ಅವಕಾಶ ಮಾಡಿಕೊಡುವ ಬಿಡಬ್ಲ್ಯುಎಸ್​ಎಸ್​ಬಿ ಕಾಯ್ದೆಯ ಸೆಕ್ಷನ್​ 77ರ ಸಿಂಧುತ್ವ ಪ್ರಶ್ನಿಸಿ ಸಲ್ಲಿಕೆಯಾಗಿದ್ದ ಎರಡು ಪ್ರತ್ಯೇಕ ಅರ್ಜಿಗಳನ್ನು ನ್ಯಾಯಮೂರ್ತಿ ಸೂರಜ್​ ಗೋವಿಂದರಾಜ್​ ಅವರ ಏಕಸದಸ್ಯ ನ್ಯಾಯಪೀಠ ವಜಾಗೊಳಿಸಿದೆ.

ಕಾಯ್ದೆಯ ಅಡಿಯಲ್ಲಿ ಜಾಗದ ಮಾಲೀಕತ್ವವು ಖಾಸಗಿಯವರ ಬಳಿಯೇ ಇರಲಿದ್ದು, ಪೈಪ್​ಲೈನ್​ ನಿರ್ವಹಣೆಯ ಹಕ್ಕು ಮಾತ್ರ ಮಂಡಳಿಗೆ ಸಿಗಲಿದೆ. ಇದು ಸಂವಿಧಾನ ನೀಡಿರುವ ಆಸ್ತಿ ಹಕ್ಕಿನ ಉಲ್ಲಂಘನೆಯಾಗುವುದಿಲ್ಲ. ಆದರೆ, ಕಾಮಗಾರಿ ಸಂದರ್ಭದಲ್ಲಿ ಜಾಗಕ್ಕೆ ಅಥವಾ ಮೇಲ್ಮೆಗೆ ಯಾವುದೇ ನಷ್ಟ ಉಂಟಾಗಿದ್ದರೆ ಅದಕ್ಕೆ ಸೂಕ್ತ ಪರಿಹಾರ ಪಡೆಯಲು ಮಾಲೀಕರಿಗೆ ಹಕ್ಕಿರುತ್ತದೆ ಎಂದು ನ್ಯಾಯಪೀಠ ಸ್ಪಷ್ಟಪಡಿಸಿದೆ.

ಈ ಹಿಂದಿನ ಪ್ರಕರಣಗಳಲ್ಲಿ ಸುಪ್ರೀಂ ಕೋರ್ಟ್​ ಬಿಡಬ್ಲ್ಯುಎಸ್​ಎಸ್​ಬಿ ಪರ ನೀಡಿರುವ ತೀರ್ಪುಗಳನ್ನು ಪರಿಗಣಿಸಿದ ನ್ಯಾಯಪೀಠ, ಅರ್ಜಿ ವಜಾಗೊಳಿಸಿ ಮಂಡಳಿಗಿರುವ ಅಧಿಕಾರ ವ್ಯಾಪ್ತಿಯನ್ನು ಎತ್ತಿಹಿಡಿದಿದೆ.

ಭೂಮಾಲೀಕರ ಪರ ವಾದ ಮಂಡಿಸಿದ್ದ ವಕೀಲರು, ಪೈಪ್​ಲೈನ್​ ಅಳವಡಿಸಿದ ಜಾಗದ ಸುತ್ತಲೂ ಯಾವುದೇ ಕಟ್ಟಡ ನಿರ್ಮಿಸದಂತೆ ಬಿಡಬ್ಲ್ಯುಎಸ್​ಎಸ್​ಬಿ ಕಾಯ್ದೆಯ ಸೆಕ್ಷನ್​ 76ರ ಅಡಿಯಲ್ಲಿ ರ್ನಿಬಂಧ ವಿಧಿಸಲಾಗುತ್ತದೆ. ಇದು ಮಾಲೀಕರ ಜಮೀನು ಅಭಿವೃದ್ಧಿಯ ಹಕ್ಕನ್ನು ಕಸಿದುಕೊಳ್ಳುವುದರಿಂದ, ಮಂಡಳಿಯು ಮಾರುಕಟ್ಟೆ ದರದಲ್ಲಿ ಪರಿಹಾರ ನೀಡಿ ಅಧಿಕೃತವಾಗಿ ಭೂಸ್ವಾಧೀನ ಮಾಡಿಕೊಳ್ಳಬೇಕು ಎಂದು ವಾದಿಸಿದ್ದರು.

ಅರ್ಜಿದಾರರ ವಾದಕ್ಕೆ ಪ್ರತಿಕ್ರಿಯಿಸಿದ್ದ ಮಂಡಳಿ ಪರ ವಕೀಲರು, ನಗರದಾದ್ಯಂತ ಲೇಔಟ್​ಗಳಲ್ಲಿ ಪೈಪ್​ ಅಳವಡಿಸಲು ಪ್ರತಿ ಬಾರಿಯೂ ಭೂಸ್ವಾಧೀನ ಪ್ರಕ್ರಿಯೆ ನಡೆಸುತ್ತಾ ಹೋದರೆ ಯಾವುದೇ ಯೋಜನೆಗಳನ್ನು ಜಾರಿಗೊಳಿಸಲು ಸಾಧ್ಯವಾಗುವುದಿಲ್ಲ. ಇದು ಕೇವಲ ಜಾಗದ ಬಳಕೆಯ ಹಕ್ಕಾಗಿದ್ದು, ಕಾಯ್ದೆಯಡಿ ಕಾಮಗಾರಿಯಿಂದಾಗುವ ನಷ್ಟಕ್ಕೆ ಮಾತ್ರ ಪರಿಹಾರ ನೀಡಲು ಅವಕಾಶವಿದೆ ಎಂದು ತಿಳಿಸಿದ್ದರು.