ಗಂಭೀರ ಪ್ರಕರಣಗಳಲ್ಲಿ ಜಾಮೀನು ನೀಡಲಾಗದು| High court

ಫ್ರಾನ್ಸ್​ನಿಂದ ಬೆಂಗಳೂರಿಗೆ ಕೊರಿಯರ್​ ಮೂಲಕ ಎಂಡಿಎಂಎ ಮಾತ್ರೆಗಳನ್ನು ತರಿಸಿಕೊಂಡಿದ್ದ ತಮಿಳುನಾಡು ಮೂಲದ ಎಸ್​. ಸೆಲ್ವ ಕುಮಾರ್​ ಎಂಬಾತ ಸಲ್ಲಿಸಿದ್ದ ಅರ್ಜಿ ವಜಾಗೊಳಿಸಿ ನ್ಯಾಯಮೂರ್ತಿ ಎಸ್​. ವಿಶ್ವಜಿತ್​ ಶೆಟ್ಟಿ ಅವರಿದ್ದ ಏಕಸದಸ್ಯ ನ್ಯಾಯಪೀಠ ಆದೇಶಿಸಿದೆ. 

ಬೆಂಗಳೂರಿನ ವಿಮಾನ ನಿಲ್ದಾಣದಲ್ಲಿನ ಕೊರಿಯರ್​ ಕೊರಿಯರ್​ ಕಂಪನಿಗೆ ಬಂದಿದ್ದ ಅನುಮಾನಾಸ್ಪದ ಪಾರ್ಸೆಲನ್ನು ನಾಕೋರ್ಟಿಕ್ಸ್​ ಕಂಟ್ರೋಲ್​ ಬ್ಯೂರೋ (ಎನ್​ಸಿಬಿ) ಅಧಿಕಾರಿಗಳು ತಪಾಸಣೆ ನಡೆಸಿದಾಗ 34 ಗುಲಾಬಿ ಮತ್ತು 19 ನೀಲಿ ಬಣ್ಣದ ಎಂಡಿಎಂಎ ಮಾತ್ರೆಗಳು ಪತ್ತೆಯಾಗಿದ್ದವು.

ಎನ್​ಸಿಬಿ ನಡೆಸಿದ ತನಿಖೆಯಿಂದ ಆರೋಪಿಗಳ ಅಂತಾರಾಷ್ಟ್ರೀಯ ಜಾಲ ಅನಾವರಣಗೊಂಡಿತ್ತು. ಸೆಲ್ವ ಕುಮಾರ್​ ಈ ಪಾರ್ಸೆಲ್​ ಬುಕ್​ ಮಾಡಲು 24,500 ರೂಪಾಯಿಗಳನ್ನು ಡೆಪಾಸಿಟ್​ ಮಾಡಿದ್ದನು. ಈತನ ಸಹಚರ ಹರಿ ಬಾಲಮುರುಗನ್​ ಎಂಬಾತ ಟೆಲಿಗ್ರಾಮ್​ನಲ್ಲಿ ಫ್ರಾನ್ಸ್​ ದೇಶದ ಡ್ರಗ್ಸ್​ ಪೆಡ್ಲರ್​ ಜತೆ ಸಂಪರ್ಕದಲ್ಲಿರುವುದು ಪತ್ತೆಯಾಗಿತ್ತು. 

ಬ್ಯಾಂಕ್​ ಖಾತೆಗಳ ವಿವರಗಳು ಮತ್ತು ಡಿಜಿಟಲ್​ ಸಂಭಾಷಣೆಗಳು ಆರೋಪಿಗಳ ನಡುವಿನ ಅಕ್ರಮ ವ್ಯವಹಾರವನ್ನು ಸಾಬೀತುಪಡಿಸಿವೆ. ಅಲ್ಲದೆ, ಮಾದಕ ದ್ರವ್ಯವನ್ನು ಜಪ್ತಿ ಮಾಡುವಾಗ ಎನ್​ಸಿಬಿ ಅಧಿಕಾರಿಗಳು ಎನ್​ಡಿಪಿಎಸ್​ ಕಾಯ್ದೆಯ ಯಾವುದೇ ಕಡ್ಡಾಯ ನಿಯಮಗಳನ್ನು ಉಲ್ಲಂಘಿಸಿಲ್ಲ ಎಂಬುದನ್ನು ಪರಿಗಣಿಸಿದ ಹೈಕೋರ್ಟ್​ ಆರೋಪಿಯ ಅರ್ಜಿಯನ್ನು ತಿರಸ್ಕರಿಸಿದೆ.

ಇನ್ನೊಂದು ಪ್ರತ್ಯೇಕ ಪ್ರಕರಣದಲ್ಲಿ ಪ್ರಕರಣ ದಾಖಲಾಗುತ್ತಿದ್ದಂತೆಯೇ ದುಬೈಗೆ ಪರಾರಿಯಾಗಿ, ನಂತರ ಅಲ್ಲಿನ ಪೊಲೀಸರಿಂದ ಬಂಧನಕ್ಕೊಳಗಾಗಿ ಭಾರತಕ್ಕೆ ಹಸ್ತಾಂತರಗೊಂಡಿದ್ದ ಆರೋಪಿಗೆ ಜಾಮೀನು ನೀಡಲು ಹೈಕೋರ್ಟ್​ ನಿರಾಕರಿಸಿದೆ. ಕೇರಳಂ ಮೂಲದ ಲಿಜೋ ಜೋಸ್​ ಎಂಬಾತ ಸಲ್ಲಿಸಿದ್ದ ಅರ್ಜಿಯನ್ನು ನ್ಯಾಯಮೂರ್ತಿ ಎಸ್​. ವಿಶ್ವಜಿತ್​ ಶೆಟ್ಟಿ ಅವರಿದ್ದ ಏಕಸದಸ್ಯ ನ್ಯಾಯಪೀಠ ವಜಾಗೊಳಿಸಿದೆ. ಮೆಕ್ಸಿಕೋದಿಂದ 6.5 ಕೆ.ಜಿ ಲೈಸರ್ಜಿಕ್​ ಆ್ಯಸಿಡ್​ ಡೈಎಥಿಲಮೈಡ್​ (ಎಲ್​ಎಸ್​ಡಿ) ಎಂಬ ಮಾದಕ ವಸ್ತುವನ್ನು ತರಿಸಿಕೊಂಡ ಆರೋಪ ಈತನ ಮೇಲಿದೆ. ಆರೋಪಿಯು ಈಗಾಗಲೇ ಒಮ್ಮೆ ದೇಶ ಬಿಟ್ಟು ಓಡಿಹೋಗಿದ್ದ ಕಾರಣ ಆ ಸಾಧ್ಯತೆಯನ್ನು ಕಡೆಗಣಿಸುವಂತಿಲ್ಲ ಎಂದು ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ.