ಬಲವಂತದ ಮತಾಂತರ ಪ್ರಕರಣ ರದ್ದುಗೊಳಿಸಲು ನಕಾರ| High court

ಬೆಂಗಳೂರಿನ ಎಚ್​ಬಿಆರ್​ ಲೇಔಟ್​ ನಿವಾಸಿ, ಪ್ರಸ್ತುತ ಪರಪ್ಪನ ಅಗ್ರಹಾರ ಕೇಂದ್ರ ಕಾರಾಗೃಹದಲ್ಲಿ ನ್ಯಾಯಾಂಗ ಬಂಧನದಲ್ಲಿರುವ ಸೈಯದ್​ ಶೋಯೆಬ್​ ಎಂಬಾತ ಸಲ್ಲಿಸಿದ್ದ ಅರ್ಜಿಯನ್ನು ವಜಾಗೊಳಿಸಿದ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರಿದ್ದ ಏಕಸದಸ್ಯ ನ್ಯಾಯಪೀಠ, ಈ ಆದೇಶ ನೀಡಿದೆ.

ಸಂತ್ರಸ್ತ ಮಹಿಳೆಯು ಪಂಜಾಬ್​ ಮೂಲದವರಾಗಿದ್ದು, 2017ರಲ್ಲಿ ಆರೋಪಿಗೆ ಡ್ಯಾನ್ಸ್​ಕ್ಲಬ್​ ಒಂದರಲ್ಲಿ ಪರಿಚಯವಾಗಿದ್ದರು. ತನಗೆ ಈಗಾಗಲೇ ಮದುವೆಯಾಗಿ ಇಬ್ಬರು ಮಕ್ಕಳಿದ್ದಾರೆ ಎಂಬ ಸತ್ಯವನ್ನು ಮುಚ್ಚಿಟ್ಟಿದ್ದ ಆರೋಪಿ, ಪ್ರೀತಿಸುವ ನಾಟಕವಾಡಿ ನಕಲಿ ಮದುವೆ ಸಮಾರಂಭದ ಮೂಲಕ ಮಹಿಳೆಯನ್ನು ವಂಚಿಸಿದ್ದಾನೆ ಎಂಬ ಗಂಭೀರ ಆರೋಪಗಳು ಪ್ರಕರಣದಲ್ಲಿವೆ. ಇದನ್ನು ಪರಿಗಣಿಸಿರುವ ನ್ಯಾಯಪೀಠ ಪೊಲೀಸರು ತನಿಖೆ ಮುಂದುವರಿಸಲಿ ಎಂದು ಅಭಿಪ್ರಾಯಪಟ್ಟಿದೆ.

ಮಹಿಳೆ ನೀಡಿದ ದೂರಿನ ಪ್ರಕಾರ, ಆರೋಪಿಯು ಆಕೆಗೆ ಮತಾಂತರಗೊಳ್ಳುವಂತೆ ಒತ್ತಡ ಹೇರಿದ್ದ. ಮತಾಂತರದ ನಂತರ ಆತನಿಗೆ ಮೊದಲೇ ಮದುವೆಯಾಗಿರುವ ವಿಷಯ ತಿಳಿದು ಮಹಿಳೆ ದೂರ ಸರಿಯಲು ಯತ್ನಿಸಿದಾಗ, ಆಕೆಯ ಖಾಸಗಿ ವಿಡಿಯೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಡುವುದಾಗಿ ಬೆದರಿಕೆ ಹಾಕಿದ್ದ. 2019 ರಲ್ಲಿ ಕೇವಲ ತನ್ನ ಸ್ನೇಹಿತರ ಸಮ್ಮುಖದಲ್ಲಿ ನಕಲಿ ಮದುವೆ ನಡೆಸಿ, ನಕಲಿ ಪ್ರಮಾಣಪತ್ರ ನೀಡಿದ್ದ.

ಅಷ್ಟಕ್ಕೆ ನಿಲ್ಲದೆ, ಸಂತ್ರಸ್ತೆಯ ಪಾಲಕರು ನೀಡಿದ್ದ 10-12 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಾಭರಣಗಳನ್ನು ಬ್ಯಾಂಕ್​ ಲಾಕರ್​ನಲ್ಲಿ ಇಡುವುದಾಗಿ ನಂಬಿಸಿ ಪಡೆದುಕೊಂಡು ವಂಚಿಸಿದ್ದಾನೆ. ಎಚ್​ಬಿಆರ್​ ಲೇಔಟ್​ನಲ್ಲಿ ಆಸ್ತಿ ಖರೀದಿಸಿಕೊಡುವುದಾಗಿ ನಂಬಿಸಿ ಆಕೆಯಿಂದ ಹಂತ ಹಂತವಾಗಿ ಸುಮಾರು 60 ರಿಂದ 70 ಲಕ್ಷ ರೂಪಾಯಿ ಹಣವನ್ನು ಪಡಕೊಂಡು, ಆಸ್ತಿಯನ್ನು ತನ್ನ ತಾಯಿಯ ಹೆಸರಿಗೆ ಮಾಡಿಸಿದ್ದಾನೆ. ಅಲ್ಲದೆ ಆಕೆಯ ಡೆಬಿಟ್​ ಕಾರ್ಡ್​ ಬಳಸಿ ಹಣ ಡ್ರಾ ಮಾಡಿ ಜೂಜಾಟಕ್ಕೆ ಬಳಸುತ್ತಿದ್ದ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ. ಕಾಡುಗೊಂಡನಹಳ್ಳಿ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಅರ್ಜಿದಾರನ ಪರ ವಕೀಲರು ವಾದ ಮಂಡಿಸಿ, ಮಹಿಳೆಗೆ 30 ವರ್ಷ ವಯಸ್ಸಾಗಿದ್ದು, ಕಳೆದ 10 ವರ್ಷಗಳಿಂದ ಅರ್ಜಿದಾರರ ಜತೆಗೆ ಪರಸ್ಪರ ಒಪ್ಪಿತ ಲೈಂಗಿಕ ಸಂಬಂಧ ಇತ್ತು. ಮಹಿಳೆಯು ಸ್ವಇಚ್ಛೆಯಿಂದಲೇ ಗರ್ಭಪಾತದ ಮಾತ್ರೆಗಳನ್ನು ತಿಂದಿದ್ದು, ಈಗ ಸುಳ್ಳು ದೂರು ದಾಖಲಿಸಲಾಗಿದೆ ಎಂದಿದ್ದರು.