ಕೆರೆ-ಕಟ್ಟೆ ಭರ್ತಿಗೆ ಹೇಮಾವತಿ ನೀರು ಹರಿಸಿ

ಕೆ.ಆರ್.ಪೇಟೆ:

ಹೇಮಾವತಿ ಜಲಾಶಯದಲ್ಲಿ 32 ಟಿಎಂಸಿ ನೀರಿದ್ದರೂ ತಾಲೂಕಿನ ಕೆರೆ-ಕಟ್ಟೆಗಳನ್ನು ತುಂಬಿಸಲು ರಾಜ್ಯ ಸರ್ಕಾರ ಮುಂದಾಗಿಲ್ಲ ಎಂದು ಆರೋಪಿಸಿ ತಾಲೂಕು ರೈತ ಸಂಘ ಹಾಗೂ ವಿವಿಧ ಸಂಘಟನೆಗಳ ನೇತೃತ್ವದಲ್ಲಿ ರೈತರು ಹೇಮಾವತಿ ಎಡದಂಡೆ ನಾಲಾ ಉಪ ವಿಭಾಗದ ಕಚೇರಿ ಎದುರು ಪ್ರತಿಭಟನೆ ನಡೆಸಿದರು.

ಶಾಸಕ ಎಚ್.ಟಿ.ಮಂಜು ಬೆಂಬಲ:

ಪ್ರತಿಭಟನಾ ಸ್ಥಳಕ್ಕೆ ಶಾಸಕ ಎಚ್.ಟಿ.ಮಂಜು ಭೇಟಿ ನೀಡಿ ರೈತರ ಹೋರಾಟಕ್ಕೆ ಬೆಂಬಲ ಸೂಚಿಸಿದರು. ಬಳಿಕ ಮಾತನಾಡಿದ ಅವರು, ರೈತ ಸಂಘದ ಹೋರಾಟದ ಶಕ್ತಿಯಿಂದಲೇ ನಾವು ಶಾಸಕನಾಗುವ ಹಾದಿ ಕಂಡುಕೊಂಡಿದ್ದು, ಇಂದಿಗೂ ರೈತ ಕಾರ್ಯಕರ್ತನಾಗಿಯೇ ಇದ್ದೇನೆ. ರೈತರಿಗೆ ನೀರು ಕೊಡಿಸುವ ನಿಟ್ಟಿನಲ್ಲಿ ಪ್ರಯತ್ನ ನಡೆಸುತ್ತಿದ್ದೇನೆ. ರಾಜ್ಯ ಜಲಸಂಪನ್ಮೂಲ ಸಚಿವರು, ಹಾಸನ ಜಿಲ್ಲಾ ಉಸ್ತುವಾರಿ ಸಚಿವರು, ಜಿಲ್ಲಾಧಿಕಾರಿಗಳು ಹಾಗೂ ನೀರಾವರಿ ಇಲಾಖೆ ಇಂಜಿನಿಯರ್‌ಗಳೊಂದಿಗೆ ಸಂಪರ್ಕದಲ್ಲಿದ್ದೇನೆ. ಪ್ರಸ್ತುತ ಹೇಮಾವತಿ ಕಾಲುವೆಗಳಿಗೆ 1000 ಕ್ಯೂಸೆಕ್ ನೀರು ಬಿಡಿಸಲಾಗಿದ್ದು, ಇನ್ನಷ್ಟು ನೀರು ಹರಿಸುವಂತೆ ಸೂಚಿಸಿದ್ದೇನೆ ಎಂದರು.

19 ಟಿಎಂಸಿ ನೀರು ರೈತರ ಬಳಕೆಗೆ:

ಅಧೀಕ್ಷಕ ಇಂಜಿನಿಯರ್ ಗಂಗಾಧರ್ ಮಾತನಾಡಿ, ಗೊರೂರು ಅಣೆಕಟ್ಟೆಯಲ್ಲಿ 32 ಟಿಎಂಸಿ ನೀರಿದ್ದು, 13 ಟಿಎಂಸಿಯನ್ನು ಬೇಸಿಗೆಯ ಕುಡಿಯುವ ನೀರಿಗಾಗಿ ಕಾಯ್ದಿರಿಸಬೇಕಿದೆ. ಉಳಿದ 19 ಟಿಎಂಸಿ ನೀರು ರೈತರ ಬಳಕೆಗೆ ಲಭ್ಯವಿದೆ. ಸರ್ಕಾರದ ನಿರ್ದೇಶನದಂತೆ ಕಾಲುವೆಯಲ್ಲಿ ನೀರು ಹರಿಸಲಾಗುತ್ತಿದೆ ಎಂದು ತಿಳಿಸಿದರು.