ದೇಶದ ಸಮಗ್ರ ಅಭಿವೃದ್ಧಿಗೆ ಜಿಎಸ್​ಟಿ ಆಧಾರ

ಕಲಬುರಗಿ: ಸರಕು ಮತ್ತು ಸೇವಾ ತೆರಿಗೆ (ಜಿಎಸ್​ಟಿ) ವ್ಯವಸ್ಥೆಯಿಂದ ದೇಶದ ಆರ್ಥಿಕ ವ್ಯವಸ್ಥೆಯಲ್ಲಿ ಬಹಳಷ್ಟು ಪಾರದರ್ಶಕತೆ, ಉತ್ತರದಾಯಿತ್ವ ಹಾಗೂ ಕಾರ್ಯಕ್ಷಮತೆ ಬಂದಿದೆ. 2017ರ ಜುಲೈ 1ರಂದು ಜಾರಿಗೆ ಬಂದ ಒಂದು ರಾಷ್ಟ್ರ ಒಂದು ತೆರಿಗೆ ವ್ಯವಸ್ಥೆಯು ತೆರಿಗೆ ಪದ್ಧತಿ ಸರಳೀಕರಿಸುವುದರೊಂದಿಗೆ ವಂಚನೆ ತಗ್ಗಿಸಿ, ಸರ್ಕಾರದ ಆದಾಯ ಹೆಚ್ಚಿಸುವ ಮೂಲಕ ದೇಶದ ಸಾಮಾಜಿಕ&ಆರ್ಥಿಕ ಅಭಿವೃದ್ಧಿಗೆ ಮಹತ್ವದ ಕೊಡುಗೆ ನೀಡಿದೆ. ಇದರಿಂದ ದೇಶದ ಅಭಿವೃದ್ಧಿಗೆ ಹೊಸ ದಿಕ್ಕು ನೀಡಿದೆ ಎಂದು ಕರ್ನಾಟಕ ಕೇಂದ್ರೀಯ ವಿಶ್ವವಿದ್ಯಾಲಯದ ಕುಲಪತಿ ಪ್ರೊ.ಬಟ್ಟು ಸತ್ಯನಾರಾಯಣ ಹೇಳಿದರು.

ಸಿಜಿಎಸ್​ಟಿ, ಎಸ್​ಜಿಎಸ್​ಟಿ ಹಾಗೂ ಐಜಿಎಸ್​ಟಿ ವ್ಯವಸ್ಥೆಯು ಕೇಂದ್ರ ಮತ್ತು ರಾಜ್ಯಗಳ ನಡುವಿನ ಹಣಕಾಸು ಸಹಕಾರ ಮತ್ತಷ್ಟು ಬಲಪಡಿಸಿದ್ದು, ರಾಜ್ಯಗಳ ಸರ್ವತೋಮುಖ ಹಾಗೂ ಸಮತೋಲಿತ ಅಭಿವೃದ್ಧಿಗೆ ನೆರವಾಗಿದೆ. ತೆರಿಗೆ ಆದಾಯದಿಂದ ದೇಶದ ಮೂಲಸೌಕರ್ಯ, ಶಿಕ್ಷಣ, ಆರೋಗ್ಯ ಹಾಗೂ ಸಾರ್ವಜನಿಕ ಕಲ್ಯಾಣ ಸೇರಿ ಅನೇಕ ಯೋಜನೆಗಳಿಗೆ ಪ್ರಮುಖ ಆಧಾರವಾಗಿದೆ. ಇದರಿಂದ ವಿಕಸಿತ ಭಾರತ&2047 ಕನಸಿನ ಸಾಕಾರಕ್ಕೆ ಜಿಎಸ್​ಟಿ ಪ್ರಮುಖ ಪಾತ್ರ ವಹಿಸುತ್ತಿದೆ ಎಂದು ಅಭಿಪ್ರಾಯಪಟ್ಟರು.

ಕಡಗಂಚಿ ಕರ್ನಾಟಕ ಕೇಂದ್ರೀಯ ವಿಶ್ವವಿದ್ಯಾಲಯದ ಕಾನೂನು ವಿಭಾಗ, ಭಾರತೀಯ ಸಾಮಾಜಿಕ ವಿಜ್ಞಾನ ಸಂಶೋಧನಾ ಮಂಡಳಿ ಸಹಯೋಗದೊಂದಿಗೆ ಜಿಎಸ್​ಟಿ ಸುಧಾರಣೆಗಳ ಕುರಿತು ಗುರುವಾರ ಆಯೋಜಿಸಿದ್ದ ಎರಡು ದಿನಗಳ ರಾಷ್ಟ್ರೀಯ ಸಮ್ಮೇಳನಕ್ಕೆ ಚಾಲನೆ ನೀಡಿ ಮಾತನಾಡಿದರು.

ವಿದ್ಯಾರ್ಥಿಗಳು ಜಿಎಸ್​ಟಿಯ ಉದ್ದೇಶ, ತೆರಿಗೆ ವ್ಯವಸ್ಥೆ ಹಾಗೂ ರಾಷ್ಟ್ರ ನಿರ್ಮಾಣದಲ್ಲಿ ಜಿಎಸ್​ಟಿ ಮಹತ್ವವನ್ನು ಸಮಗ್ರವಾಗಿ ಅರ್ಥಮಾಡಿಕೊಳ್ಳಬೇಕು ಎಂದರು.

ಮುಖ್ಯ ಭಾಷಣ ಮಾಡಿದ ಪಾಟ್ನಾದ ಚಾಣಕ್ಯ ರಾಷ್ಟ್ರೀಯ ಕಾನೂನು ವಿಶ್ವವಿದ್ಯಾಲಯದ ಸಂಶೋಧನಾ ಮತ್ತು ಅಭಿವೃದ್ಧಿ ವಿಭಾಗದ ಡೀನ್​ ಪ್ರೊ.ಸುಭಾಶ್ಚಂದ್ರ ರಾಯ್​ ಮಾತನಾಡಿ, ತೆರಿಗೆ ಪದ್ಧತಿಯು ಪ್ರತಿಯೊಬ್ಬರ ಜೀವನದ ಅವಿಭಾಜ್ಯ ಅಂಗ. ಸುಸಂಸತ ಸಮಾಜದ ಭದ್ರ ಅಡಿಪಾಯ. ಉತ್ತಮ ಆಡಳಿತ, ಮೂಲಸೌಕರ್ಯ ಅಭಿವೃದ್ಧಿ, ಸಾರ್ವಜನಿಕ ಕಲ್ಯಾಣ ಹಾಗೂ ರಾಷ್ಟ್ರದ ಸಮಗ್ರ ಪ್ರಗತಿಗೆ ತೆರಿಗೆ ವ್ಯವಸ್ಥೆ ಅತ್ಯಗತ್ಯ ಎಂದು ಹೇಳಿದರು.

ಭಾರತದ ತೆರಿಗೆ ವ್ಯವಸ್ಥೆಯು ಪ್ರಗತಿಪರ ಮಾದರಿಯಾಗಿ ರೂಪುಗೊಂಡಿದ್ದು, ಜಿಎಸ್​ಟಿ ಜಾರಿಗೆ ಬಂದ ನಂತರ ತೆರಿಗೆ ವ್ಯವಸ್ಥೆಯಲ್ಲಿ ಪಾರದರ್ಶಕತೆ ಹಾಗೂ ಏಕರೂಪತೆ ಹೆಚ್ಚಾಗಿದೆ. ತೆರಿಗೆ ಸುಧಾರಣೆ, ತೆರಿಗೆ ದರ ಹಾಗೂ ತೆರಿಗೆ ಅನುಸರಣೆಯ ಕುರಿತು ನಿರಂತರ ಚರ್ಚೆಗಳು ಅಗತ್ಯ. ಜನಸ್ನೇಹಿ ಜಿಎಸ್​ಟಿ ವ್ಯವಸ್ಥೆ, ಸರಳ ತೆರಿಗೆ ಆಡಳಿತ, ಅನಗತ್ಯ ತೆರಿಗೆ ಹೊರೆ ಕಡಿತ ಮಾಡುವುದು, ಸ್ವಯಂಪ್ರೇರಿತ ತೆರಿಗೆ ಪಾವತಿ ಮಾಡುವುದು ಹಾಗೂ ಸಾಮಾಜಿಕ ನ್ಯಾಯದೊಂದಿಗೆ ಆರ್ಥಿಕ ಅಭಿವೃದ್ಧಿ ಸಮತೋಲನಗೊಳಿಸುವ ಅಗತ್ಯವಿದೆ ಎಂದು ಹೇಳಿದರು.

ಅಧ್ಯಕ್ಷತೆ ವಹಿಸಿದ್ದ ಕಾನೂನು ಅಧ್ಯಯನ ನಿಕಾಯದ ಡೀನ್​ ಪ್ರೊ.ಬಸವರಾಜ ಕುಬಕಡ್ಡಿ, ತೆರಿಗೆ ಪದ್ಧತಿಯು ಮನುಷ್ಯನ ಜನನದಿಂದ ಹಿಡಿದು ಮರಣದವರೆಗೆ ಜೀವನದ ಅವಿಭಾಜ್ಯ ಅಂಗವಾಗಿದೆ. ಸರ್ಕಾರ ಸಂಗ್ರಹಿಸುವ ತೆರಿಗೆ ಹಣವನ್ನು ನಮ್ಮ ದೇಶದ ಶಿಕ್ಷಣ, ಆರೋಗ್ಯ, ಮೂಲಸೌಕರ್ಯ ಹಾಗೂ ಸಾರ್ವಜನಿಕ ಕಲ್ಯಾಣಗಳ ಕಾರ್ಯಕ್ರಮಗಳ ಮೂಲಕ ಸರ್ಕಾರವು ರಾಷ್ಟ್ರ ನಿರ್ಮಾಣಕ್ಕೆ ಮರುಹೂಡಿಕೆ ಮಾಡಲಾಗುತ್ತದೆ ಎಂದು ಹೇಳಿದರು.

ಸಮ್ಮೇಳನದ ಸಂಚಾಲಕ ಡಾ.ಜಯಂತ ಬೊರುವಾ ಸ್ವಾಗತಿಸಿದರು. ಎರಡು ದಿನಗಳ ರಾಷ್ಟ್ರೀಯ ಸಮ್ಮೇಳನದ ಉದ್ದೇಶ ಹಾಗೂ ಕಾರ್ಯಕ್ರಮದ ರೂಪುರೇಷೆ ವಿವರಿಸಿದರು. ಕಾನೂನು ವಿಭಾಗದ ಮುಖ್ಯಸ್ಥ ಡಾ.ಅನಂತ್​ ಚಿಂಚುರೆ ವಂದಿಸಿದರು.

ವಾಣಿಜ್ಯ ತೆರಿಗೆ ಇಲಾಖೆಯ ನಿವೃತ್ತ ಹೆಚ್ಚುವರಿ ಆಯುಕ್ತ ಡಾ.ಬಿ.ವಿ.ಮುರಳಿಕೃಷ್ಣ, ಆದಾಯ ತೆರಿಗೆ ಆಯುಕ್ತ ವಿನೋದ್​ ಕುಮಾರ್​, ಸಿಯುಕೆಯ ವ್ಯವಹಾರ ಅಧ್ಯಯನ ನಿಕಾಯ ಡೀನ್​ ಪ್ರೊ.ಪಾಂಡುರಂಗ ವಿ, ಶರಣಬಸವ ವಿಶ್ವವಿದ್ಯಾಲಯದ ಎಂಬಿಎ ಕಾರ್ಯಕ್ರಮದ ಅಧ್ಯಕ್ಷ ಡಾ.ಬಿ.ಎಸ್​.ಹೂಗಾರ, ಸಿಯುಕೆ ಪ್ರಾಧ್ಯಾಪಕರಾದ ಪ್ರೊ.ಎ.ಎನ್​.ವಿಜಯಕುಮಾರ್​, ಡಾ.ಮೊಹಮ್ಮದ್​ ಜೋಹೈರ್​, ಡಾ.ಗಣಪತಿ ಸಿನ್ನೂರ, ಪ್ರೊ.ದೇವರಾಜಪ್ಪ, ಪ್ರೊ.ಲಿಂಗಮೂರ್ತಿ, ಡಾ.ರಂಗನಾಥಂ ಜಿ., ಡಾ.ಸಫಿಯಾ ಪರ್ವೀನ್​, ಡಾ. ಸುಷ್ಮಾ, ಡಾ.ನಿರಂಜ ಪೂಜಾರ್​, ಡಾ.ಶಿವಕುಮಾರ್​ ಬೆಳ್ಳಿ, ಡಾ.ಬಸವರಾಜ ಎಂ, ಡಾ.ಶಶಿರೇಖಾ ಮಾಳಗಿ, ಡಾ.ಜಗದೀಶಚಂದ್ರ ಟಿ.ಜಿ. ಡಾ.ರೇಣುಕಾ ಗುಬ್ಬೇವಾಡ ಇತರರಿದ್ದರು.

"

ನಮ್ಮ ದೇಶದಲ್ಲಿ ಕೇಂದ್ರ ಹಾಗೂ ರಾಜ್ಯಗಳೆರಡೂ ತೆರಿಗೆ ಅಧಿಕಾರ ಹೊಂದಿರುವ ಒಕ್ಕೂಟ ವ್ಯವಸ್ಥೆಯಿದ್ದು, ಜಿಎಸ್​ಟಿ ಜಾರಿಯಾದ ನಂತರ ಪರೋಕ್ಷ ತೆರಿಗೆ ವ್ಯವಸ್ಥೆ ಏಕೀಕೃತಗೊಂಡು, ದೇಶದ ತೆರಿಗೆ ಆಡಳಿತ ಸುಧಾರಿಸಿದೆ. ತೆರಿಗೆ ಅನುಸರಣೆ ಹೆಚ್ಚಿದೆ ಹಾಗೂ ಸರ್ಕಾರದ ಆದಾಯವು ವೃದ್ಧಿಯಾಗಿ ದೇಶದ ಆರ್ಥಿಕ ಅಭಿವೃದ್ಧಿಗೆ ಮಹತ್ವದ ಕೊಡುಗೆ ನೀಡಿದೆ.

— ಡಾ.ಬಸವರಾಜ ಕುಬಕಡ್ಡಿ, ಡೀನ್​, ಕಾನೂನು ನಿಕಾಯ, ಸಿಯುಕೆ.