ಕಾಂಗ್ರೆಸ್​ನಲ್ಲಿ ಹೆಚ್ಚಿದ ಆಕಾಂಕ್ಷಿಗಳ ದಂಡು

ಕಲಬುರಗಿ: ಮಹಾನಗರ ಪಾಲಿಕೆ ಮೇಯರ್​ ಮತ್ತು ಉಪ ಮೇಯರ್​ ಸ್ಥಾನದ ಚುನಾವಣೆಗೆ ಆ.7ರಂದು ಮುಹೂರ್ತ ಫಿಕ್ಸ್​ ಆಗಿದೆ. ಮೇಯರ್​ ಸ್ಥಾನ ಬಿಸಿಎ ಮತ್ತು ಉಪ ಮೇಯರ್​ ಸ್ಥಾನ ಸಾಮಾನ್ಯ ಮಹಿಳೆಗೆ ಮೀಸಲಾಗಿದ್ದು, ಕಾಂಗ್ರೆಸ್​ ಮತ್ತು ಬಿಜೆಪಿ ಪಾಳಯದಲ್ಲಿ ಲೆಕ್ಕಾಚಾರಗಳು ಗರಿಗೆದರಿವೆ.

ಆಡಳಿತಾರೂಢ ಕಾಂಗ್ರೆಸ್​ ಬಹುಮತದ ಸಂಖ್ಯಾಬಲ ಹೊಂದಿದ್ದರಿಂದ ತಲೆಬಿಸಿ ಕಡಿಮೆ. ನಿಗದಿಯಾದ ಮೀಸಲಾತಿ ಪ್ರಕಾರ ಎರಡೂ ಸ್ಥಾನಗಳಿಗೆ ನಾ ಮುಂದು, ತಾ ಮುಂದು ಎಂದು ಆಕಾಂಕ್ಷಿಗಳು ನಾಯಕರ ದುಂಬಾಲು ಬಿದ್ದಿದ್ದಾರೆ.

ಮೇಯರ್​&ಉಪ ಮೇಯರ್​ ಜತೆ ಆರೋಗ್ಯ, ಶಿಕ್ಷಣ, ಹಣಕಾಸು ಮತ್ತು ಲೆಕ್ಕಪತ್ರ ಸ್ಥಾಯಿ ಸಮಿತಿಗಳಿಗೂ ಇಂದಿರಾ ಸ್ಮಾರಕ ಭವನದಲ್ಲಿ ಆ.7ರಂದು ಮಧ್ಯಾಹ್ನ 3.30ಕ್ಕೆ ಚುನಾವಣಾ ಪ್ರಕ್ರಿಯೆ ನಡೆಯಲಿದೆ. ಬೆಳಗ್ಗೆ 10ರಿಂದ ನಾಮಪತ್ರ ಸಲ್ಲಿಕೆ ಪ್ರಕ್ರಿಯೆ ಶುರುವಾಗಲಿದ್ದು, ಸಂಬಂಧಿತ ಮತದಾರರಿಗೆ ನೋಟಿಸ್​ ನೀಡಲಾಗಿದೆ.

ರಾಜ್ಯದಲ್ಲಿ ಆಡಳಿತ ಚುಕ್ಕಾಣಿ ಹಿಡಿದಿರುವ ಕಾಂಗ್ರೆಸ್​ ಪಾಲಿಕೆಯಲ್ಲೂ ಬಹುಮತಕ್ಕೆ ಬೇಕಾಗುವ ಸಂಖ್ಯಾಬಲ ಹೊಂದಿದೆ. 28 ಪಕ್ಷದ ಸದಸ್ಯರಿದ್ದಾರೆ. ಜತೆಗೆ ಸಂಸದ ರಾಧಾಕೃಷ್ಣ ದೊಡ್ಡಮನಿ, ರಾಜ್ಯಸಭಾ ಸದಸ್ಯ ಮಲ್ಲಿಕಾರ್ಜುನ ರ್ಖಗೆ, ಶಾಸಕರಾದ ಅಲ್ಲಮಪ್ರಭು ಪಾಟೀಲ್​, ಕನೀಜ್​ ಫಾತಿಮಾ, ವಿಧಾನ ಪರಿಷತ್​ ಸದಸ್ಯರಾದ ಜಗದೇವ ಗುತ್ತೇದಾರ್​, ತಿಪ್ಪಣ್ಣಪ್ಪ ಕಮಕನೂರ, ಡಾ.ಚಂದ್ರಶೇಖರ ಪಾಟೀಲ್​ ಹುಮನಾಬಾದ್​ ಮತ ಚಲಾಯಿಸುವ ಹಕ್ಕು ಹೊಂದಿದ್ದಾರೆ. ಹೀಗಾಗಿ ಕಾಂಗ್ರೆಸ್​ ಸಂಖ್ಯಾಬಲ 35ಕ್ಕೆ ಏರಿಕೆಯಾಗಲಿದೆ. ಮೇಯರ್​ ಸ್ಥಾನ ಬಿಸಿಎಗೆ ಮೀಸಲಾಗಿರುವ ಹಿನ್ನೆಲೆಯಲ್ಲಿ ಸದಸ್ಯರಾದ ಗೋಳಾ, ಅಲಿಖಾನ್​, ಸೈಯದ್​ ಅಹ್ಮದ್​, ಅನುಪಮಾ ಕಮಕನೂರ, ರಾಗಮ್ಮ ಇನಾಮದಾರ್​, ಇಮ್ರಾನ್​, ಹಮೀದ್​, ರಿಯಾಜ್​ ಪಟ್ಕೋ, ನಜ್ಮಾ ತಯಾರ್​ಅಲಿ ರೇಸ್​ನಲ್ಲಿದ್ದಾರೆ. ಉಪ ಮೇಯರ್​ ಸ್ಥಾನಕ್ಕೆ ಲತಾ ರವಿ ರಾಠೋಡ್​, ರೇಣುಕಾ ಹೋಳ್ಕರ್​, ನಿಂಗಮ್ಮ ಕಟ್ಟಿಮನಿ ಇತರರು ರೇಸ್​ನಲ್ಲಿದ್ದಾರೆ.

ಪಾಲಿಕೆಯಲ್ಲಿ ಬಿಜೆಪಿ 22 ಪ್ಲಸ್​ 1 ಅಂದರೆ 23 ಸಂಖ್ಯಾಬಲ ಹೊಂದಿದೆ. ಜತೆಗೆ ವಿಧಾನ ಪರಿಷತ್​ ಸದಸ್ಯರಾದ ಬಿ.ಜಿ. ಪಾಟೀಲ್​, ಶಶೀಲ್​ ನಮೋಶಿ ಮತ್ತು ಶಾಸಕ ಬಸವರಾಜ ಮತ್ತಿಮಡು ಮತದಾನದ ಹಕ್ಕು ಹೊಂದಿದ್ದಾರೆ. ಹೀಗಾಗಿ ಸಂಖ್ಯಾಬಲ 26ಕ್ಕೆ ತಲುಪಲಿದೆ. ಮೇಯರ್​ ಸ್ಥಾನಕ್ಕೆ ಮಲ್ಲು ಉದನೂರ, ವಿಜಯಕುಮಾರ ಸೇವಲಾನಿ, ದಿಗಂಬರ ನಾಡಗೌಡ, ವೆಂಕಮ್ಮ ಗುತ್ತೇದಾರ್​, ಉಪ ಮೇಯರ್​ ಸ್ಥಾನಕ್ಕೆ ಶೋಭಾ ದೇಸಾಯಿ, ಶಾಂತಾಬಾಯಿ, ಮೇನಾ ಕಳಸ್ಕರ್​, ಪಾರ್ವತಿ ದೇವದುರ್ಗ, ಗಂಗಮ್ಮ ಮುನ್ನಳ್ಳಿ, ಹೊನ್ನಮ್ಮ ಬಾಬು ಇತರರು ಅವಕಾಶ ಸಿಕ್ಕರೆ ಒಂದು ಕೈ ನೋಡಲು ಸಿದ್ಧರಾಗಿದ್ದಾರೆ. ಈ ಮಧ್ಯೆ ಜೆಡಿಎಸ್​ನ ನಾಲ್ವರು ಸದಸ್ಯರಲ್ಲಿ ಯಾರು ಯಾವ ಕಡೆ ವಾಲುತ್ತಾರೆ ಎಂಬುದನ್ನು ಕಾದುನೋಡಬೇಕಿದೆ. ಮೇಲಿನ ಹಂತದಲ್ಲಿ ಬಿಜೆಪಿ&ಜೆಡಿಎಸ್​ ಒಟ್ಟಾಗಿ ಹೋಗುತ್ತಿದ್ದರೂ ಸ್ಥಳಿಯ ಸಂಸ್ಥೆ ಚುನಾವಣೆಯಲ್ಲಿ ಸದಸ್ಯರು ಕೊನೆಯ ಹಂತದಲ್ಲಿ ಕೈಗೊಳ್ಳುವ ನಿರ್ಧಾರ ಮೇಲೆ ಎಲ್ಲವೂ ಅವಲಂಬಿಸಿದೆ.

ಮತದಾರರ ವಿಶೇಷ ಸಮಗ್ರ ಪರಿಷ್ಕರಣೆ (ಎಸ್​ಐಆರ್​) ಪ್ರಕ್ರಿಯೆ ಆ.8ರಂದು ಪೂರ್ಣಗೊಳ್ಳಲಿದೆ. ಸಂಸತ್​ ಅಧಿವೇಶನವೂ ಶುರುವಾಗಿದೆ. ಹೀಗಾಗಿ ಪಾಲಿಕೆ ಚುನಾವಣೆ ಪ್ರಕ್ರಿಯೆಗೆ ತೊಡಕಾಗಬಹುದು ಎಂಬ ಕಾರಣಕ್ಕೆ ದಿನ ಮುಂದೂಡುವ ಸಾಧ್ಯತೆ ದಟ್ಟವಾಗಿದೆ. ಈ ನಿಟ್ಟಿನಲ್ಲಿ ಕಾಂಗ್ರೆಸ್​ ಹಿರಿಯ ನಾಯಕರು, ಪಾಲಿಕೆ ಕೆಲ ಸದಸ್ಯರು ಚುನಾವಣಾ ಪ್ರಕ್ರಿಯೆ ಮುಂದೂಡುವಂತೆ ಚುನಾವಣಾಧಿಕಾರಿಯೂ ಆಗಿರುವ ಪ್ರಾದೇಶಿಕ ಆಯುಕ್ತರಿಗೆ ಮನವಿ ಮಾಡಿದ್ದಾರೆ ಎನ್ನಲಾಗಿದೆ.

ಮೇಯರ್​ ಸ್ಥಾನದ ಮೀಸಲು ಪ್ರಶ್ನಿಸಿ ಪಾಲಿಕೆ ಸದಸ್ಯೆ ಲತಾ ರವಿ ರಾಠೋಡ್​ ಹೈಕೋರ್ಟ್​ ಕಲಬುರಗಿ ಪೀಠದ ಮೊರೆ ಹೋಗಿದ್ದಾರೆ. ಮೇಯರ್​ ಸ್ಥಾನ ಬಿಸಿಎಗೆ ಮೀಸಲಾಗಿದೆ. 2022ರಲ್ಲಿ 24ನೇ ಅವಧಿಗೆ ಮೇಯರ್​ ಸ್ಥಾನ ಎಸ್​ಸಿ ಮೀಸಲು ನಿಗದಿಯಾಗಿತ್ತು. ಆದರೆ ಕಾರಣಾಂತರಗಳಿಂದ ಬಂದದ್ದು ಕೈತಪ್ಪಿ ಹೋಗಿದೆ. ಪ್ರತಿ 10 ವರ್ಷಕ್ಕೊಮ್ಮೆ ಮೀಸಲು ಬದಲಾವಣೆ ಆಗಬೇಕು. ಸುಮಾರು 16 ವರ್ಷಗಳಿಂದ ಎಸ್​ಸಿ ಮೀಸಲು ಬಂದಿಲ್ಲ. ಹೀಗಾಗಿ ಈ ಬಾರಿಯಾದರೂ ನ್ಯಾಯ ಕೊಡಿಸುವಂತೆ ಮನವಿ ಮಾಡಿದ್ದಾರೆ. ಮೇಯರ್​ ಸ್ಥಾನ ಎಸ್​ಸಿ (ಮಹಿಳೆ)ಗೂ ಮೀಸಲಾತಿ ದೊರೆತಿಲ್ಲ. ಲತಾ ರಾಠೋಡ್​ ಅರ್ಜಿ ಜು.30ರಂದು ವಿಚಾರಣೆಗೆ ಬರಲಿದೆ.

"

ಕಲಬುರಗಿ ಮಹಾನಗರ ಪಾಲಿಕೆಗೆ ಈ ಮೊದಲು ಮೇಯರ್​ ಸ್ಥಾನ ಎಸ್​ಸಿ ಮೀಸಲು ನಿಗದಿಯಾಗಿತ್ತು. ಕಾರಣಾಂತರಗಳಿಂದ ಕೈಬಿಟ್ಟು ಹೋಗಿದೆ. ಈ ಬಾರಿಯಾದರೂ ಮೀಸಲು ನಿಗದಿ ಮಾಡಿ ಅನುಕೂಲ ಮಾಡಿಕೊಡುವಂತೆ ಕೋರಿ ಕೋರ್ಟ್​ ಮೊರೆ ಹೋಗಲಾಗಿದೆ. ಜತೆಗೆ ಜಿಲ್ಲಾ ಕಾಂಗ್ರೆಸ್​ ಅಧ್ಯಕ್ಷರಿಗೂ ಮನವಿ ಸಲ್ಲಿಸಲಾಗಿದೆ.

— > ಲತಾ ರವಿ ರಾಠೋಡ್​ ಸದಸ್ಯೆ, ಮಹಾನಗರ ಪಾಲಿಕೆ ಕಲಬುರಗಿ