ಸರ್ಕಾರಿ ‘ವ್ಯವಹಾರ ಪ್ರಕ್ರಿಯೆ’ ಮರು ವಿನ್ಯಾಸ, ತೃಪ್ತಿಯೂ ಮಾನದಂಡ! Government

ಹೊಸ ಇಲಾಖೆ ಸ್ಥಾಪನೆ ಮಾಡುವುದಾಗಿ ಶನಿವಾರವಷ್ಟೇ ಸಂಪುಟ ಸಭೆಯಲ್ಲಿ ನಿರ್ಣಯಿಸಿದ್ದರು. ತರುವಾಯ, ಈ ಇಲಾಖೆ ಕಾರ್ಯಚಟುವಟಿಕೆ ಹೇಗಿರಬಹುದೆಂದು ಬೆನ್ನುಬಿದ್ದ ವಿಜಯವಾಣಿಗೆ ಈ ಅಚ್ಚರಿಯ ಮಾಹಿತಿ ಲಭ್ಯವಾಗಿದೆ.

ಸರ್ಕಾರದ ( Government )ಕಡತ ನಿರ್ವಹಣೆ ವ್ಯವಸ್ಥೆ ಬಗ್ಗೆ ಸಾಕಷ್ಟು ಆಕ್ಷೇಪ ಇದೆ. ಕಾಲನುಕಾಲಕ್ಕೆ ಬದಲಾವಣೆಗೆ ಸಾಕಷ್ಟು ಪ್ರಯತ್ನ ಕೂಡ ನಡೆದಿದೆ. ಆದರೂ ಕಡತಗಳ ವಿಲೇವಾರಿ ಆಮೆಗತಿಯಲ್ಲಿ ಸಾಗುವುದು ವಾಡಿಕೆಯಾಗಿದೆ. ಆದರೀಗ ಹೊಸ ಇಲಾಖೆಯ ಕಲ್ಪನೆಯಲ್ಲಿ ಸರ್ಕಾರಿ ವ್ಯವಹಾರ ಪ್ರಕ್ರಿಯೆ ಮರು ವಿನ್ಯಾಸದ ಬಗ್ಗೆ ಪ್ರಸ್ತಾಪ ಮಾಡಲಾಗಿದೆ.

ಒಂದು ಕಡತ ಹತ್ತಾರು ಟೇಬಲ್ ದಾಟಿ ಹೋಗುವ ಸದ್ಯದ ಸಂಕೀರ್ಣ ನಿಯಮಗಳನ್ನು ಸರಳೀಕರಿಸಿ, ಅತ್ಯಂತ ವೇಗವಾಗಿ ನಿರ್ಧಾರ ಕೈಗೊಳ್ಳುವಂತೆ ಸರ್ಕಾರಿ ಕಾರ್ಯವಿಧಾನವನ್ನೇ ಇಲ್ಲಿ ಮರು ವಿನ್ಯಾಸಗೊಳಿಸುವ ಪ್ರಸ್ತಾಪ ಮಾಡಲಾಗಿದೆ.

ಸಾರ್ವಜನಿಕರು ಸರ್ಕಾರಿ ಕಚೇರಿಗಳಿಗೆ ಅಲೆದಾಡುವುದನ್ನು ತಪ್ಪಿಸಲು ತಂತ್ರಜ್ಞಾನ ಎಷ್ಟೇ ಮುಂದುವರಿದಿದ್ದರೂ, ಇಲಾಖೆಗಳ ಒಳಗಿನ ನಿಯಮಗಳು ಮತ್ತು ಕಾಗದದ ಪ್ರಕ್ರಿಯೆಗಳು ಇಂದಿಗೂ ವಿಳಂಬಕ್ಕೆ ಕಾರಣವಾಗುತ್ತಿವೆ. ‘ಸಕಾಲ’ದಂತಹ ಯೋಜನೆಗಳಿದ್ದರೂ ಇಲಾಖೆಗಳ ನಡುವಿನ ಸಮನ್ವಯದ ಕೊರತೆಯಿಂದಾಗಿ ಫೈಲ್ಗಳು ಧೂಳು ತಿನ್ನುತ್ತಿರುತ್ತವೆ. ಈ ಆಡಳಿತಾತ್ಮಕ ಮಂದಗತಿಯೇ ಈ ಮಹತ್ವದ ನಿರ್ಧಾರಕ್ಕೆ ಅಸಲಿ ಹಿನ್ನೆಲೆಯಾಗಿದೆ. ಕೇವಲ ಡಿಜಿಟಲೀಕರಣ ಮಾಡುವುದರಿಂದ ಪ್ರಯೋಜನವಿಲ್ಲ, ಬದಲಿಗೆ ಕಡತ ವಿಲೇವಾರಿಯ ಮೂಲ ನಿಯಮಗಳನ್ನೇ ಬದಲಾಯಿಸಬೇಕು ಎಂದು ಸರ್ಕಾರಕ್ಕೆ ಮನವರಿಕೆಯಾಗಿರುವುದು ಈ ಪ್ರಸ್ತಾಪದಿಂದ ಸ್ಪಷ್ಟವಾಗುತ್ತದೆ.

ಲಭ್ಯ ಮಾಹಿತಿ ಪ್ರಕಾರ ದೂರುಗಳ ವಿಲೇವಾರಿಗೆ ಕಾಲಮಿತಿ ನಿಗದಿ ಮಾಡಲಾಗುತ್ತದೆ. ಪ್ರಧಾನ ಕಾರ್ಯದರ್ಶಿಯಿಂದ ಆರಂಭವಾಗಿ, ನಿರ್ದೇಶಕರು, ಉಪ ನಿರ್ದೇಶಕರು ಹಾಗೂ ಇನ್ನೂ ಕೆಳಹಂತದ ವರೆಗೆ ಪ್ರತಿಯೊಬ್ಬರಿಗೂ ಪ್ರತಿ ಅರ್ಜಿಯನ್ನು ವಿಲೇವಾರಿ ಮಾಡುವ ಜವಾಬ್ದಾರಿ, ಹೊಣೆಗಾರಿಕೆ ನಿಗದಿಯಾಗಲಿದೆ. ಕಾಲಮಿತಿಯಲ್ಲಿ ಬಗೆಹರಿಸದೇ ಇದ್ದರೆ ಅದಕ್ಕೆ ಸೂಕ್ತ ಬೆಲೆ ತೆರಬೇಕಾಗುತ್ತದೆ. ಅಲ್ಲದೇ ಅರ್ಜಿ ವಿಲೇವಾರಿ ಮಾನಿಟರಿ ವ್ಯವಸ್ಥೆ ಕೂಡ ಇರಲಿದೆ.

ಹಾಗೆಯೇ, ಹೊಸ ಇಲಾಖೆಯು ಕೇವಲ ದೂರುಗಳನ್ನು ಸ್ವೀಕರಿಸಿ ಕೈತೊಳೆದುಕೊಳ್ಳುವುದಿಲ್ಲ. ಬದಲಿಗೆ, ಸಾರ್ವಜನಿಕರ ದೂರು ಇತ್ಯರ್ಥವಾದ ನಂತರ ಅವರ ಪ್ರತಿಕ್ರಿಯೆ ಮತ್ತು ತೃಪ್ತಿಯ ಮಟ್ಟವನ್ನು ಆಧರಿಸಿ ಇಲಾಖೆಯ ಯಶಸ್ಸನ್ನು ಅಳೆಯಲಾಗುತ್ತದೆ. ಅಂದರೆ, ಕಾಗದದ ಮೇಲೆ ‘ದೂರು ಇತ್ಯರ್ಥ’ ಎಂದು ಬರೆದರೆ ಸಾಲದು, ದೂರುದಾರನಿಗೆ ನ್ಯಾಯ ಸಿಕ್ಕಿದೆಯೇ ಎಂಬ ಗುಣಾತ್ಮಕ ಪರಿಶೀಲನೆ ಇಲ್ಲಿ ನಡೆಯಲಿದೆ. ಇದು ಆಡಳಿತದಲ್ಲಿ ಜವಾಬ್ದಾರಿಯನ್ನು ಹೆಚ್ಚಿಸಲಿದೆ.

ಪ್ರಸ್ತುತ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆ ಇ-ಆಡಳಿತ ವಿಭಾಗದ ಅಡಿಯಲ್ಲಿ ಬರುವ ‘ದೂರುಗಳು ಮತ್ತು ಕುಂದುಕೊರತೆಗಳು’ ವಿಭಾಗದ 2 ಶಾಖೆಗಳ ಎಲ್ಲಾ ಮಂಜೂರಾದ ಹುದ್ದೆಗಳನ್ನು ಯಥಾವತ್ತಾಗಿ ಈ ಹೊಸ ಇಲಾಖೆಗೆ ವರ್ಗಾಯಿಸಲು ನಿರ್ಧರಿಸಲಾಗಿದೆ. ಹೀಗಾಗಿ ಹೊಸದಾಗಿ ಯಾವುದೇ ಹುದ್ದೆ ಸೃಷ್ಟಿಯ ವಿಚಾರ ಬರುವುದಿಲ್ಲ. ಸಕಾಲವನ್ನೂ ಇಲ್ಲಿಯೇ ವಿಲೀನಗೊಳಿಸುವ ಪ್ರಸ್ತಾಪವಿದೆ.

ಮುಖ್ಯಾಂಶ