ರಾಜ್ಯ

ವಿಜಯಪುರದಲ್ಲಿ ನಿತ್ಯವೂ ಸಂಚಾರಸಿಕ್ಕು / VIJAYAPUR

ವಿಜಯಪುರದ ಅಂಕತಟ್ಟಿ ನಂಜುಂಡಪ್ಪ ಸರ್ಕಲ್​ನಲ್ಲಿ ಮಕ್ಕಳು, ವೃದ್ಧರು ಹಾಗೂ ಶಾಲಾ-&ಕಾಲೇಜು ವಿದ್ಯಾರ್ಥಿಗಳು ಭಯದಲ್ಲೇ ರಸ್ತೆ ದಾಟುತ್ತಿರುವುದು.
ವಿಜಯಪುರದ ಅಂಕತಟ್ಟಿ ನಂಜುಂಡಪ್ಪ ಸರ್ಕಲ್​ನಲ್ಲಿ ಮಕ್ಕಳು, ವೃದ್ಧರು ಹಾಗೂ ಶಾಲಾ-&ಕಾಲೇಜು ವಿದ್ಯಾರ್ಥಿಗಳು ಭಯದಲ್ಲೇ ರಸ್ತೆ ದಾಟುತ್ತಿರುವುದು.
Published on: 
ವಿಜಯಪುರ : ಪಟ್ಟಣದಲ್ಲಿ ದಿನೇದಿನೆ ವಾಹನಗಳ ದಟ್ಟಣೆ ಹೆಚ್ಚಾಗುತ್ತಿದ್ದು, ಮುಖ್ಯರಸ್ತೆಗಳು ಹಾಗೂ ಕಿರಿದಾದ ಗಲ್ಲಿಮಾರ್ಗಗಳಲ್ಲಿ ಸವಾರರು ಎಲ್ಲೆಂದರಲ್ಲಿ ವಾಹನಗಳನ್ನು ನಿಲ್ಲಿಸಿ ಹೋಗುತ್ತಿರುವುದರಿಂದ ಸುಗಮ ಸಂಚಾರಕ್ಕೆ ಅಡೆತಡೆ ಉಂಟಾಗಿದೆ.
ಪಟ್ಟಣದ ಅಂಕತಟ್ಟಿ ನಂಜುಂಡಪ್ಪ ಸರ್ಕಲ್​ನಿಂದ ಶಿಡ್ಲಘಟ್ಟ ಕ್ರಾಸ್​ವರೆಗೂ ಪ್ರಸ್ತುತ ರಸ್ತೆ ವಿಸ್ತರಣೆ ಕಾಮಗಾರಿ ನಡೆಯುತ್ತಿದೆ. ಇದರಿಂದಾಗಿಯೂ ಟ್ರಾಫಿಕ್​ ಸಮಸ್ಯೆ ಮತ್ತಷ್ಟು ಜಟಿಲಗೊಂಡಿದೆ. ಹಳೇ ಸರ್ಕಾರಿ ಆಸ್ಪತ್ರೆ ರಸ್ತೆ, ಗಾಂಧಿಚೌಕ, ಬಜಾರ್​ ರಸ್ತೆ, ವೆಂಕಟರಮಣಸ್ವಾಮಿ ದೇವಾಲಯದ ರಸ್ತೆ ಹಾಗೂ ರೇಷ್ಮೆ ಗೂಡಿನ ಮಾರುಕಟ್ಟೆ ರಸ್ತೆ ಸೇರಿದಂತೆ ಪಟ್ಟಣದ ಬಹುತೇಕ ಮಾರ್ಗಗಳು ಕಿರಿದಾಗಿರುವುದರಿಂದ ಸದಾ ವಾಹನ ದಟ್ಟಣೆಯಿಂದಲೇ ಕೂಡಿರುತ್ತವೆ. ಅದರಲ್ಲೂ ಬೆಳಗ್ಗೆ ಹಾಗೂ ಸಂಜೆ ವೇಳೆಯಂತೂ ಸವಾರರು ಕಿಲೋಮೀಟರ್​ಗಟ್ಟಲೆ ಸಾಲಿನಲ್ಲಿ ನಿಲ್ಲಬೇಕಾದ ಪರಿಸ್ಥಿತಿ ನಿಮಾರ್ಣವಾಗಿದೆ.
ಫುಟ್​ಪಾತ್​ ಅತಿಕ್ರಮಣ, ಅಪಘಾತಗಳಿಗೆ ಆಹ್ವಾನ: ಪುರಸಭೆ ಹಾಗೂ ಪೊಲೀಸ್​ ಇಲಾಖೆಯ ಬೇಜವಾಬ್ದಾರಿಯಿಂದಾಗಿ ಪಟ್ಟಣದ ಬಹುತೇಕ ಕಡೆಗಳಲ್ಲಿ ಫುಟ್​ಪಾತ್​ಗಳನ್ನು ಅಂಗಡಿ ಮಳಿಗೆಗಳ ಮಾಲೀಕರು ಆಕ್ರಮಿಸಿಕೊಂಡಿದ್ದಾರೆ. ಇನ್ನುಳಿದ ಅರ್ಧ ರಸ್ತೆಯನ್ನು ವಾಹನಗಳ ಅನಧಿಕೃತ ನಿಲುಗಡೆಗೆ ಬಳಸಲಾಗುತ್ತಿದೆ. ಕೇವಲ ಅಲ್ಪ ಜಾಗದಲ್ಲೇ ವಾಹನ ಸವಾರರು ಮತ್ತು ಪಾದಚಾರಿಗಳು ಸಂಚರಿಸಬೇಕಾಗಿದ್ದು, ಇದು ನಿತ್ಯವೂ ಸಣ್ಣ-ಪುಟ್ಟ ಅಪಘಾತಗಳಿಗೆ ಅವಕಾಶ ನೀಡಿದೆ. ಪಟ್ಟಣದಲ್ಲಿ ಸಾರ್ವಜನಿಕ ವಾಹನ ನಿಲುಗಡೆಗೆ ಎಲ್ಲೂ ಸೂಕ್ತ ಪಾರ್ಕಿಂಗ್​ ವ್ಯವಸ್ಥೆ ಇಲ್ಲದಿರುವುದೇ ಈ ಸಮಸ್ಯೆಗೆ ಮೂಲ ಕಾರಣ ಎಂದು ಪಟ್ಟಣದ ನಿವಾಸಿ ಕೇಶವ ಆಕ್ರೋಶ ಹೊರಹಾಕಿದ್ದಾರೆ.
ಎಲ್ಲಿಯೂ ಕಾಣದ ಪೊಲೀಸ್​ ಸಿಬ್ಬಂದಿ! : ಪಟ್ಟಣದ ಪ್ರಮುಖ ರಸ್ತೆಗಳ ಇಕ್ಕೆಲಗಳಲ್ಲಿ ದ್ವಿಚಕ್ರ ಹಾಗೂ ನಾಲ್ಕು ಚಕ್ರದ ವಾಹನಗಳನ್ನು ಎಲ್ಲೆಂದರಲ್ಲಿ ನಿಲ್ಲಿಸಲಾಗುತ್ತಿದ್ದರೂ, ದ್ವಿಚಕ್ರ ವಾಹನಗಳಲ್ಲಿ "ತ್ರಿಬಲ್​ ರೈಡಿಂಗ್​' ನಡೆಯುತ್ತಿದ್ದರೂ ಇದನ್ನು ಕೇಳುವವರೇ ಇಲ್ಲದಂತಾಗಿದೆ. ಅಂಕತಟ್ಟಿ ನಂಜುಂಡಪ್ಪ ಸರ್ಕಲ್​ನಲ್ಲಿ ಮಕ್ಕಳು, ವೃದ್ಧರು ಹಾಗೂ ಶಾಲಾ-&ಕಾಲೇಜು ವಿದ್ಯಾರ್ಥಿಗಳು ರಸ್ತೆ ದಾಟಬೇಕೆಂದರೆ ಜೀವ ಭಯದಲ್ಲಿ ಸಾಹಸ ಮಾಡಬೇಕಿದೆ. ಇಷ್ಟೊಂದು ವಾಹನ ದಟ್ಟಣೆ ಇರುವ ಕಡೆಗಳಲ್ಲಿ ಒಬ್ಬ ಪೊಲೀಸ್​ ಸಹ ಕಣ್ಣಿಗೆ ಕಾಣದಿರುವುದು ಸಾರ್ವಜನಿಕರ ಬೇಸರಕ್ಕೆ ಕಾರಣವಾಗಿದೆ.
ಹಣ ವಸೂಲಿಗಷ್ಟೇ ಸೀಮಿತವೇ ಖಾಕಿ? : ಪಟ್ಟಣದ ದರ್ಗಾ ಮುಖ್ಯರಸ್ತೆಯ ಮೂಲಕ ಸಾವಿರಾರು ವಾಹನಗಳು ಕೋಲಾರ-&ದೇವನಹಳ್ಳಿ ರಸ್ತೆಯಲ್ಲಿ ಸಂಚರಿಸುತ್ತವೆ. ಶಾಲಾ-&ಕಾಲೇಜು ಬಿಡುವ ಸಮಯದಲ್ಲಿ ವಿದ್ಯಾರ್ಥಿಗಳು ಪ್ರಾಣ ಕೈಯಲ್ಲಿ ಹಿಡಿದು ರಸ್ತೆ ದಾಟುತ್ತಾರೆ. ಆದರೂ ಇಲ್ಲಿ ಪೊಲೀಸರು ನಿಯೋಜನೆಗೊಳ್ಳುವುದಿಲ್ಲ. ಬದಲಾಗಿ ಬೈಪಾಸ್​ ರಸ್ತೆಗಳಲ್ಲೇ ಬೀಡುಬಿಟ್ಟು ದಂಡದ ಹೆಸರಿನಲ್ಲಿ ವಾಹನಗಳನ್ನು ನಿಲ್ಲಿಸಿ, ಸವಾರರನ್ನು ಪೀಡಿಸುತ್ತಾರೆ ಎಂದು ಜನ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಪಟ್ಟಣದ ಗಾಂಧಿಚೌಕದ ಪ್ರಮುಖ ರಸ್ತೆಯಲ್ಲಿ ಸದಾ ಸಂಚಾರ ಸಿಕ್ಕಿನ ಸಮಸ್ಯೆ ಇರುತ್ತದೆ. ರಸ್ತೆಯ ಇಕ್ಕೆಲಗಳಲ್ಲಿ ಎಲ್ಲೆಂದರಲ್ಲಿ ದ್ವಿಚಕ್ರ ವಾಹನಗಳನ್ನು ನಿಲ್ಲಿಸುವುದರಿಂದ ನಿತ್ಯವೂ ಸಂಚಾರಕ್ಕೆ ಕಿರಿಕಿರಿ ತಪ್ಪಿದ್ದಲ್ಲ. ಪೊಲೀಸರು ಇತ್ತ ಗಮನ ಹರಿಸಬೇಕು.

— > ಕೃಷ್ಣಮೂರ್ತಿ ಸ್ಥಳಿಯ ನಿವಾಸಿ

ಪಟ್ಟಣದಿಂದ ಕೋಲಾರ ರಸ್ತೆ, ದೇವನಹಳ್ಳಿ ರಸ್ತೆ, ಮೇಲೂರು ರಸ್ತೆಯ ಬದಿಗಳಲ್ಲಿ ಅಡ್ಡಾದಿಡ್ಡಿ ವಾಹನಗಳನ್ನು ನಿಲುಗಡೆ ಮಾಡುತ್ತಿರುವುದರಿಂದ ನಿತ್ಯ ವಾಹನ ಸವಾರರು ಕಿರಿಕಿರಿ ಅನುಭವಿಸುವಂತಾಗಿದೆ. ಪೊಲೀಸ್​ ಇಲಾಖೆ ಇನ್ನಾದರೂ ಕಠಿಣ ಕ್ರಮ ಕೈಗೊಳ್ಳಬೇಕು.

— > ಮುರಳೀಧರ್​ ವಿಜಯಪುರ ನಿವಾಸಿ
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net