ಶೈಕ್ಷಣಿಕ ಪರಿಕರಗಳಿಂದ ಮೂಡಿಬಂದ ಗಣೇಶ- A magnificent decoration of Lord Ganesha

ಶಾಲಾ ಬ್ಯಾಗ್, ನೋಟ್‌ಬುಕ್, ಪೆನ್, ಪೆನ್ಸಿಲ್, ರಬ್ಬರ್, ಶಾರ್ಪನರ್, ಸ್ಕೇಲ್, ಜ್ಯಾಮಿಟ್ರಿ ಬಾಕ್ಸ್, ಕ್ರಯಾನ್ಸ್, ಮಾರ್ಕರ್, ಹೈಲೈಟರ್, ಕ್ಯಾಲ್ಕುಲೇಟರ್ ಮತ್ತು ಲಂಚ್‌ಬಾಕ್ಸ್ ಸೇರಿ ಸಾವಿರಾರು ಶೈಕ್ಷಣಿಕ ಪರಿಕರಗಳನ್ನು ಬಳಸಿ ಗಣಪತಿಗೆ ಭವ್ಯ ಅಲಂಕಾರ ಮಾಡಲಾಗಿದೆ. ಅಂದಾಜು 50 ಮಂದಿ ಕಲಾವಿದರು ಮತ್ತು ಕಾರ್ಯಕರ್ತರು 15 ದಿನಗಳ ಕಾಲ ನಿರಂತರವಾಗಿ ಶ್ರಮಿಸಿ ಈ ವಿಶೇಷ ಕಲಾಕೃತಿ ಸಿದ್ಧಪಡಿಸಿದ್ದಾರೆ.

ಅಂದಾಜು 10 ಸಾವಿರ ನೋಟ್‌ಬುಕ್‌ಗಳು, 10 ಸಾವಿರ ಪೆನ್ ಮತ್ತು ಪೆನ್ಸಿಲ್‌ಗಳು, ಸಾವಿರಕ್ಕೂ ಹೆಚ್ಚು ರಬ್ಬರ್ ಮತ್ತು ಶಾರ್ಪನರ್‌ಗಳು ಸೇರಿ ದೊಡ್ಡ ಪ್ರಮಾಣದ ವಿದ್ಯಾರ್ಥಿ ಪರಿಕರಗಳನ್ನು ಅಲಂಕಾರದಲ್ಲಿ ಬಳಸಲಾಗಿದೆ.

ವಿದ್ಯಾಗಣಪತಿಯ ಮತ್ತೊಂದು ವಿಶೇಷತೆಯಾಗಿ ಹಿಂದಿನ ತಲೆಮಾರಿನ ಕಲಿಕೆಯ ನೆನಪುಗಳನ್ನು ಮೂಡಿಸುವ ಸ್ಲೇಟು, ಬಳಪ, ಡಸ್ಟರ್‌ನಿಂದ ಹಿಡಿದು ಇಂದಿನ ಆಧುನಿಕ ಶಾಲಾ ಪರಿಕರಗಳವರೆಗೆ ಒಂದೇ ಕಲಾತ್ಮಕ ವಿನ್ಯಾಸದಲ್ಲಿ ಜೋಡಿಸಲಾಗಿದೆ. ಭಾರತದ ಸಂವಿಧಾನ, ಭಗವದ್ಗೀತೆ ಸೇರಿ ಪ್ರೇರಣಾದಾಯಿ ಗ್ರಂಥಗಳಿಗೂ ವಿಶೇಷ ಸ್ಥಾನ ನೀಡಲಾಗಿದೆ.

ಗಣಪತಿಯ ದೊಡ್ಡ ತಲೆ ವಿಶಾಲ ಚಿಂತನೆ, ದೊಡ್ಡ ಕಿವಿಗಳು ಆಲಿಸುವ ಗುಣ, ಸಣ್ಣ ಕಣ್ಣುಗಳು ಏಕಾಗ್ರತೆ ಮತ್ತು ಸೊಂಡಿಲು ಪರಿಸ್ಥಿತಿಗೆ ಹೊಂದಿಕೊಳ್ಳುವ ಸಾಮರ್ಥ್ಯವನ್ನು ಪ್ರತಿನಿಧಿಸುತ್ತವೆ ಎಂಬ ಜೀವನ ಸಂದೇಶವನ್ನೂ ಈ ಬಾರಿಯ ಅಲಂಕಾರದಲ್ಲಿ ಪ್ರತಿಬಿಂಬಿಸುವ ಪ್ರಯತ್ನ ಮಾಡಲಾಗಿದೆ. ಅಲಂಕಾರಕ್ಕಾಗಿ ಬಳಸಿರುವ ಶೈಕ್ಷಣಿಕ ಸಾಮಗ್ರಿಗಳನ್ನು ಹಬ್ಬದ ನಂತರ ಸರ್ಕಾರಿ, ಖಾಸಗಿ ಶಾಲೆಗಳ ಅಗತ್ಯವಿರುವ ವಿದ್ಯಾರ್ಥಿಗಳಿಗೆ ವಿತರಿಸುವುದಾಗಿ ಟ್ರಸ್ಟ್ ಹೇಳಿದೆ.