ಗಾಜಲಹಳ್ಳಿ ಭೂ ಒತ್ತುವರಿ ತೆರವು land encroachment

ಗಾಜಲಹಳ್ಳಿ ಗ್ರಾಮದ ಸರ್ವೇನಂ.21ರ ಸರ್ಕಾರಿ ಗೋಮಾಳ ಮತ್ತು ಖರಾಬು ಜಮೀನಿದ್ದು, ಈ ಭೂಮಿಯನ್ನು ಕುರುಬೂರು ನಂಜುಂಡಪ್ಪ ಎಂಬುವರು ಸರ್ವೇ ನಂಬರ್​ 51 ಎಂದು ನಕಲಿ ದಾಖಲೆ ಸೃಷ್ಟಿ ಮಾಡಿ ರಾಚಾಪುರ ಗ್ರಾಮದ ವೀಣಾ ಅವರಿಗೆ ಮಾರಾಟ ಮಾಡಿದ್ದರು ಎನ್ನಲಾಗಿತ್ತು.

ಗ್ರಾಮದ ಪಕ್ಕದಲ್ಲಿರುವ ಸರ್ಕಾರಿ ಜಮೀನು ನಮ್ಮ ಗ್ರಾಮಕ್ಕೆ ಬೇಕು. ಗ್ರಾಮದಲ್ಲಿ 160 ಪರಿಶಿಷ್ಟ ಕುಟುಂಬಗಳಿದ್ದು, ಅಂಬೇಡ್ಕರ್​ ಭವನ ಮತ್ತು ವಸತಿ ರಹಿತರಿಗೆ ನಿವೇಶನ ಕೋಡಬೇಕು ಎಂದು ಒತ್ತಾಯಿಸಿ ಗ್ರಾಮಸ್ಥರು ಪ್ರತಿಭಟಿಸಿದ್ದರು.

ಆದರೆ, ಈ ಜಮೀನಿನ ಮಾಲಕಿ, ನಮ್ಮ ಜಮೀನಿನಲ್ಲಿ ಗಾಜಲಹಳ್ಳಿ ಗ್ರಾಮದ ಕೆಲವರು ಅಕ್ರಮ ಪ್ರವೇಶ ಮಾಡಿ ರಾತ್ರೋರಾತ್ರಿ ಶಾಮಿಯಾನ ಹಾಕಿದ್ದಾರೆ ಎಂದು 2022ರಲ್ಲಿ ಗ್ರಾಮಾಂತರ ಠಾಣೆಗೆ ದೂರು ನೀಡಿದ್ದರು. ಪ್ರಕರಣ ನ್ಯಾಯಾಲಯದ ಮೆಟ್ಟಿಲು ಏರಿತ್ತು. ನ್ಯಾಯಾಲಯದಲ್ಲಿ ಮಾಲಕಿ ಪರ ಆದೇಶವಾಗಿರುವುದಲ್ಲದೆ, ಸೂಕ್ತ ಪೊಲೀಸ್​ ಬಂದೋಬಸ್ತ್​ನಲ್ಲಿ ಒತ್ತುವರಿ ತೆರವು ಮಾಡುವಂತೆ ಸೂಚಿಸಿದ್ದರಿಂದ ಚಿಂತಾಮಣಿ ಗ್ರಾಮಾಂತರ ಠಾಣೆ ಪೊಲೀಸ್​ ಇನ್​ಸ್ಪೆಕ್ಟರ್​ ಶಿವರಾಜ್​ ನೇತೃತ್ವದಲ್ಲಿ ತೆರವು ಕಾರ್ಯ ನಡೆಸಿದರು.

ತೆರವಿಗೆ ಗ್ರಾಮದ ಮಹಿಳೆಯರು ಸೇರಿದಂತೆ ಹಲವಾರು ಮಂದಿ ತೀವ್ರ ಪ್ರತಿರೋಧ ವ್ಯಕ್ತಪಡಿಸಿದರು. ಅಲ್ಲಿದ್ದ ಅಂಬೇಡ್ಕರ್​ ಭಾವಚಿತ್ರ ಮತ್ತು ಗುಡಿಸಲು ತೆರವಿಗೆ ಜೆಸಿಬಿ ಮುಂದಾದಾಗ ಅಡ್ಡಿ ಮಾಡಿದರು. ಗ್ರಾಮಾಂತರ ಠಾಣೆಯ ಮಹಿಳಾ ಮತ್ತು ಪುರುಷ ಪೊಲೀಸರು ಎಲ್ಲರನ್ನು ತಡೆದು ಸ್ಥಳದಿಂದ ಹೊರಗೆ ಕಳುಹಿಸಿ ತೆರವು ಮಾಡಿದರು.