ಈರುಳ್ಳಿ ಬೆಲೆ ಕುಸಿತ! ಗದಗ ಎಪಿಎಂಸಿಯಲ್ಲಿ ರೈತರ ಆಕ್ರೋಶ

ವಿಜಯವಾಣಿ ಸುದ್ದಿಜಾಲ ಗದಗ

ಕಬ್ಬು, ಮೆಕ್ಕೆಜೋಳ ಬೆಲೆ ಕುಸಿತದಿಂದ ಕಂಗಾಲಾಗಿರುವ ರೈತರು ಈದೀಗ ಈರುಳ್ಳಿ ಬೆಲೆ ಕುಸಿತದಿಂದಲೂ ನಷ್ಟ ಅನುಭವಿಸುತ್ತಿದ್ದಾರೆ. ಪರಿಣಾಮ ಗದಗ ಜಿಲ್ಲೆಯಲ್ಲಿ ಈರುಳ್ಳಿ ಬೆಲೆ ಕುಸಿತದಿಂದ ಪ್ರತಿಭಟನೆಗಳು ಜರಗುತ್ತಿವೆ. ಜಿಲ್ಲೆಯ ಈರಳ್ಳಿ ಬೆಳೆಗಾರರು ಈರುಳ್ಳಿ ದರ ಕುಸಿತದಿಂದ ಆಕ್ರೋಶಗೊಂಡು ಗದಗ ಎಪಿಎಂಸಿ ಆವರಣದಲ್ಲಿ ಪ್ರತಿಭಟನೆ ನಡೆಸಿದರು.

ಗದಗ ಎಪಿಎಂಸಿ ಮಾರುಕಟ್ಟೆಯಲ್ಲಿ ಬೆಳಗ್ಗೆ ಎಂದಿನಂತೆ ಜಿಲ್ಲೆಯ ವಿವಿಧ ಗ್ರಾಮಗಳಿಂದ ಆಗಮಿಸಿದ ರೈತರು ಈರಳ್ಳಿ ಮೂಟೆಯನ್ನು ಇಳಿಸಿ ಮಾರಾಟಕ್ಕೆ ಕಾಯುತ್ತ ಕುಳಿತಿದ್ದರು. ಎಂದಿನಂತೆ ಟೆಂಡರ್​ ಪ್ರಕ್ರಿಯೆ ಆರಂಬವಾಗದೇ ದಿನಕ್ಕಿಂತಲೂ ತಡವಾಗಿಯೇ ಪ್ರಾರಂಭವಾಯಿತು. ಪ್ರಕ್ರಿಯೆ ಪ್ರಾರಂಭವಾದರೂ ದರದಲ್ಲಿ ತೀರಾ ಕಡಿಮೆ ಘೋಷಣೆ ಆಗುತ್ತಿದ್ದಂತೆ ರೈತರು ತೀವ್ರ ಆಕ್ಷೇಪ ವ್ಯಕ್ತ ಪಡಿಸಿದರು. ಮಾರುಕಟ್ಟೆಯಲ್ಲಿ ಎಲ್ಲ ಖರೀದಿದಾದರು ಉದ್ದೇಶ ಪೂರ್ವಕವಾಗಿ ದರದಲ್ಲಿ ಭಾರಿ ಕುಸಿತ ಮಾಡಿದ್ದಾರೆ ಎಂದು ಆಕ್ರೋಶ ವ್ಯಕ್ತ ಪಡಿಸಿ, ಅಂಗಡಿಗಳ ಮುಂದೆ ರೈತರು ಪ್ರತಿಭಟನೆಗೆ ಮುಂದಾದರು.

ಈ ವೇಳೆ ಈರುಳ್ಳಿ ಖರೀದಿ ಅಂಗಡಿ ಮಾಲೀಕರು ಮತ್ತು ರೈತರ ನಡುವೆ ತೀವ್ರ ಮಾತಿನ ಚಕಮಕಿ ಜರುಗಿತು. ಒಂದೆರಡು ಅಂಗಡಿಗಳ ಮುಂದೆ ಆರಂಭವಾದ ಪ್ರತಿಭಟನೆ ಕೆಲ ಹೊತ್ತಿನಲ್ಲಿಯೇ ಎಪಿಎಂಸಿ ಎಲ್ಲಾ ಅಂಗಡಿಗಳ ಮುಂದೆ ವಿಸ್ತರಿಸಿತು. ಪ್ರತಿಭಟನೆಯ ಜತೆಗೆ ಎಪಿಎಂಸಿ ಮುಖ್ಯ ರಸ್ತೆಗೆ ಆಗಮಿಸಿ ಪ್ರತಿಭಟನೆ ನಡೆಸಿ, ಕೂಡಲೇ ಮರು ಟೆಂಡರ್​ ನಡೆಸುವಂತೆ ಒತ್ತಾಯಿಸಿದರು.