ಶಿಥಿಲಾವಸ್ಥೆಯ ಶಾಲೆ ಕಟ್ಟಡಗಳಲ್ಲಿ ಛಾವಣಿಯ ಕಾಂಕ್ರೀಟ್ ಚೂರುಗಳು ಬಿದ್ದು ವಿದ್ಯಾರ್ಥಿಗಳು ಗಾಯಗೊಳ್ಳುವ ಪ್ರಕರಣಗಳು ನಿರಂತರವಾಗಿ ವರದಿಯಾಗುತ್ತಿವೆ. ಈ ಹಿಂದೆ ಬಾಗೇಪಲ್ಲಿ ತಾಲೂಕಿನ ಲುಮದ್ದೇಪಲ್ಲಿಯ ಸರ್ಕಾರಿ ಶಾಲೆಯಲ್ಲಿ ಕಾಂಕ್ರಿಟ್ ಚೂರು ಬಿದ್ದು, ಮೂವರು ವಿದ್ಯಾರ್ಥಿಗಳ ಗಾಯಗೊಂಡಿದ್ದು, ಈ ಪೈಕಿ ಬಾಲಕಿಯ ತಲೆಗೆ 4 ಹೊಲಿಗೆ ಹಾಕಲಾಗಿತ್ತು. ಇನ್ನು ರಾಯಚೂರು ತಾಲೂಕಿನ ಅರಸಿಗೇರ ಸರ್ಕಾರಿ ಶಾಲೆಯಲ್ಲಿ ಒಬ್ಬ ವಿದ್ಯಾರ್ಥಿನಿ ಗಾಯಗೊಂಡ ಪ್ರಕರಣ ವರದಿಯಾಗಿತ್ತು.ಜಿಲ್ಲೆಗಳಲ್ಲಿನ ಹಲವು ಶಾಲೆಗಳ ಪೈಕಿ ಶಿಥಿಲಾವಸ್ಥೆಯಲ್ಲಿರುವ ಕಟ್ಟಡದಲ್ಲಿ ಛಾವಣಿಯ ಕಾಂಕ್ರಿಟ್ ಚೂರುಗಳು ಉದುರಿ ಬೀಳುವುದು, ಮಳೆಯ ನೀರು ಸೋರುವುದು, ಗೋಡೆ ಮುಟ್ಟಿದಾಗ ವಿದ್ಯುತ್ ಶಾಕ್ ಹೊಡೆಯುವುದು ಸೇರಿದಂತೆ ಹಲವು ಆತಂಕಕಾರಿ ಟನೆಗಳು ನಡೆಯುತ್ತಿವೆ. ಛಾವಣಿಯಿಂದ ಕಲ್ಲು ಮಣ್ಣು ಉದುರಿದ ಕುರುಹುಗಳನ್ನು ಹೊಂದಿರುವ ಶಾಲೆಗಳಿವೆ. ಆದರೆ, ಇದನ್ನು ಸಂಬಂಧಪಟ್ಟ ಇಲಾಖೆಗಳು ಗಂಭೀರವಾಗಿ ಪರಿಗಣಿಸಿಲ್ಲ ಎಂಬ ಆರೋಪ ಕೇಳಿ ಬಂದಿವೆ.
