ಚೆಂಡು ಮತ್ತು ಸೇವಂತಿಗೆ ಹೂವಿಗೆ ಬೆಲೆ ಕುಸಿತ

ವಿಜಯವಾಣಿ ಸುದ್ದಿಜಾಲ ಕೋಲಾರ

ಎನ್.ಮುನಿವೆಂಕಟೇಗೌಡ

ಚಂಡುಹೂವಿನ ಬೆಲೆ ತೀವ್ರ ಕುಸಿತ ಕಂಡಿದ್ದು, ಮಾರುಕಟ್ಟೆಯಲ್ಲಿ ಚೆಂಡುಹೂವನ್ನು ಕೇಳುವವರೇ ಇಲ್ಲದಂತೆ ಆಗಿದ್ದು, ವ್ಯಾಪಾರವಾಗದೆ ಇರುವ ಹೂವನ್ನು ರಸ್ತೆಗಳಿಗೆ ಸುರಿಯುವಂತಾಗಿದೆ.

ಕೋಲಾರ ಜಿಲ್ಲೆಯಲ್ಲಿ ಸೇವಂತಿಗೆ, ಚಂಡುಹೂವು ಬೆಳೆಗಾರರ ಸಂಖ್ಯೆ ದಿನೇ ದಿನೇ ಹೆಚ್ಚಾಗುತ್ತಿದೆ. ಟೊಮೆಟೋ ಬೆಳೆಗಳಿಂದ ರೈತರು ನಷ್ಟ ಹೊಂದಿದ್ದು, ಹೂವು ಬೆಳೆಯಲು ರೈತರು ಮುಂದಾಗಿದ್ದಾರೆ. ಕಳೆದ ವರ್ಷ ತೀವ್ರ ನಷ್ಟಕ್ಕೆ ಸಿಲುಕಿದ ಹೂವು ಬೆಳೆಗಾರರು ಈ ವರ್ಷವಾದರೂ ಉತ್ತಮ ಬೆಲೆ ಬರಬಹುದು ಎಂಬ ನಿರೀಕ್ಷೆಯಲ್ಲಿ ಇದ್ದ ರೈತರಿಗೆ ವರ್ಷದ ಪ್ರಾರಂಭದಲ್ಲಿಯೇ ಚೆಂಡುಹೂವಿಗೆ ಬೆಲೆ ಕುಸಿತ ಕಂಡಿದ್ದು, ರೈತರು ಆತಂಕಕ್ಕೆ ಒಳಗಾಗಿದ್ದಾರೆ.

ಸದ್ಯಕ್ಕೆ ಸೇವಂತಿಗೆ ಹೂವಿಗೂ ಬೆಲೆ ಕುಸಿತ ಕಂಡಿದೆ. ಪೇಪರ್ ಸೇವಂತಿಗೆ ಕೆ.ಜಿ. ಒಂದಕ್ಕೆ ೩೦ ರಿಂದ ೪೦ ರೂ.ಗಳ ತನಕ ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿದೆ. ಐಶ್ವರ್ಯ ಸೇವಂತಿಗೆ ೬೦ ರಿಂದ ೭೦ ರೂ.ಗಳ ತನಕ ಮಾರಾಟವಾಗುತ್ತಿದೆ. ಕಳೆದ ೨ ದಿನಗಳಿಂದ ಮಾತ್ರ ಈ ಬೆಲೆ ಸೇವಂತಿಗೆಗೆ ಇದೆ. ಕಳೆದ ೨ ದಿನಗಳ ಹಿಂದೆ ೫೦ ರೂ.ಗಳು ಮೀರದಂತೆ ಇತ್ತು.

ಚೆಂಡು ಹೂವು ಕೆ.ಜಿ.ಗೆ ೮ ರಿಂದ ೯ ರೂ.ಗಳ ತನಕ ಮಾರುಕಟ್ಟೆಯಲ್ಲಿ ಬೆಲೆ ಇರುವ ಕಾರಣ, ಮಾರುಕಟ್ಟೆಗೆ ತಂದ ಹೂವು ವ್ಯಾಪಾರವಾಗದೆ ರಸ್ತೆಗಳಿಗೆ ಸುರಿದು ಹೋಗುವಂತಹ ಪರಿಸ್ಥಿತಿ ರೈತರದ್ದು ಆಗಿದೆ.

ಧನುರ್ಮಾಸ ಇದ್ದ ಕಾರಣ ಹೂವಿನ ಬೆಲೆ ಕುಸಿದಿದ್ದು, ಧನುರ್ಮಾಸ ಮುಗಿಯುವ ಕಾಲ ಬಂದಿದ್ದು, ಮಾಘಮಾಸ ಪ್ರಾರಂಭವಾಗುವ ದಿನಗಳು ಹತ್ತಿರವಿದೆ. ಹಾಗೂ ಸಂಕ್ರಾAತಿ ಹಬ್ಬವೂ ಹತ್ತಿರವಿರುವುದರಿಂದ ೨ ರಿಂದ ೩ ದಿನಗಳ ನಂತರ ಹೂವಿನ ಬೆಲೆ ಏರಿಕೆಯಾಗುವ ಸಾಧ್ಯತೆ ಇದೆ. ಚೆಂಡು ಹೂವನ್ನು ರಸ್ತೆ ಮತ್ತು ಚರಂಡಿಗಳಿಗೆ ಎಸೆಯುವುದು ಬೇಡ. ಉತ್ತಮ ಬೆಲೆ ಬರುವ ನಿರೀಕ್ಷೆ ಇದೆ. ಅಲ್ಲಿಯ ತನಕ ರೈತರು ಕಾಯಬೇಕು ಎಂದು ವ್ಯಾಪಾರಸ್ಥರು ಹೇಳುತ್ತಿದ್ದಾರೆ.

ಕೋಟ್

ಒಂದು ಎಕರೆಯಲ್ಲಿ ಸೇವಂತಿಗೆಯನ್ನು ಬೆಳೆಯಬೇಕಾದರೆ ೨ ಲಕ್ಷ ರೂ.ಗಳ ಖರ್ಚು ಬರುತ್ತದೆ. ಹೂವನ್ನು ಕಿತ್ತು ಮಾರುಕಟ್ಟೆಗೆ ತರಬೇಕಾದರೆ ಒಂದು ಕೆ.ಜಿ.ಗೆ ೧೫ ರಿಂದ ೨೦ ರೂ.ಗಳು ಖರ್ಚು ಬರುತ್ತದೆ. ಮಾರುಕಟ್ಟೆ ಕಮೀಷನ್ ಸೇರಿದರೆ ಮಾರುಕಟ್ಟೆಯಲ್ಲಿ ಮಾರಾಟವಾಗುವ ಹೂವಿನ ಬೆಲೆ ಕೂಲಿಗೂ ಸಾಕಾಗುತ್ತಿಲ್ಲ. ಕನಿಷ್ಟ ೧೦೦ ರೂ.ಗಳ ತನಕ ಮಾರಾಟವಾದರೆ ರೈತನಿಗೆ ಅಸಲು ಬರುತ್ತದೆ. ಕಳೆದ ಮೂರು ನಾಲ್ಕು ತಿಂಗಳಿAದ ಬೆಲೆ ಇಲ್ಲದೆ ನಷ್ಟ ಅನುಭವಿಸುವಂತೆ ಆಗಿದೆ. ಸಂಕ್ರಾAತಿಯ ನಂತರವಾದರೂ ಬೆಲೆ ಬರಬಹುದು ಎಂಬ ನಿರೀಕ್ಷೆಯಲ್ಲಿ ಕಾಯುತ್ತಿದ್ದೇವೆ. ಚೆಂಡು ಹೂವನ್ನು ಕೇಳುವವರೇ ಇಲ್ಲ. ತೋಟಗಳಲ್ಲಿಯೇ ಬಿಡುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ.

-ನಾರಾಯಣಸ್ವಾಮಿ, ರೈತ, ನುಗ್ಗಲಾಪುರ

ಕೋಟ್

ಚೆಂಡು ಹೂವಿನ ಬೆಲೆ ಏರಿಕೆಯಾಗುತ್ತಿಲ್ಲ. ಸೇವಂತಿಗೆ ಹೂವಿನ ಬೆಲೆ ಕಳೆದ ೨ ದಿನಗಳಿಂದ ಸ್ವಲ್ಪ ಮಟ್ಟಿಗೆ ಏರಿಕೆಯಾಗುತ್ತಿದೆ. ಪೇಪರ್ ಸೇವಂತಿಗೆ ಆಂಧ್ರಪ್ರದೇಶದಿAದ ಹೆಚ್ಚಾಗಿ ಬರುತ್ತಿದೆ. ಆದ್ದರಿಂದ ನಮ್ಮ ಸೇವಂತಿಗೆಗೆ ಬೆಲೆ ಕುಸಿತ ಉಂಟಾಗಿದೆ. ಸಂಕ್ರಾAತಿಗೆ ಬೆಲೆ ಏರಿಕೆಯಾಗುವ ಸಾಧ್ಯತೆ ಇದೆ. ಚೆಂಡು ಹೂವನ್ನು ಕೇಳುವವರೇ ಇಲ್ಲ. ಬೆಳೆಗಾರರ ಸಂಖ್ಯೆ ಹೆಚ್ಚಾಗಿದೆ. ಆಂಧ್ರ ಮತ್ತು ತಮಿಳುನಾಡಿನಲ್ಲಿ ಸಂಕ್ರಾAತಿ ಹಬ್ಬವನ್ನು ದೊಡ್ಡ ಹಬ್ಬವಾಗಿ ಆಚರಣೆ ಮಾಡುತ್ತಾರೆ. ಅಲ್ಲಿ ಚೆಂಡು ಹೂವಿಗೆ ಬೇಡಿಕೆ ಇದೆ. ಆಂಧ್ರಪ್ರದೇಶ ಮತ್ತು ತಮಿಳು ನಾಡಿನಲ್ಲಿ ಚೆಂಡು ಹೂವಿನ ಬೆಳೆಗಾರರು ಹೆಚ್ಚಾಗಿ ಇರುವುದರಿಂದ ಕೋಲಾರ ಮಾರುಕಟ್ಟೆಯಲ್ಲಿ ಚೆಂಡು ಹೂವಿಗೆ ಬೇಡಿಕೆ ಕಡಿಮೆಯಾಗಿದೆ.

-ವೆಂಕಟೇಶಪ್ಪ, ಹೂವಿನ ವ್ಯಾಪಾರಸ್ಥ