ಮಗಳಿಗೆ 18 ವರ್ಷ ಕಳೆದರೂ ಶಿಕ್ಷಣದ ಖರ್ಚು ತಂದೆಯ ಕರ್ತವ್ಯ| 16 ಲಕ್ಷ ರೂಪಾಯಿ ಪಾವತಿಸಲು ಉದ್ಯಮಿಗೆ ಆದೇಶ| High court

ಎಂಡಿ ಸ್ನಾತಕೋತ್ತರ ಪದವಿ ವ್ಯಾಸಂಗ ಮಾಡುತ್ತಿರುವ ಮಗಳ ಮೊದಲ ವರ್ಷದ ವಿದ್ಯಾಭ್ಯಾಸದ ಖರ್ಚಿಗೆ 16 ಲಕ್ಷ ರೂಪಾಯಿ ಪಾವತಿಸಲು ಆದೇಶಿಸಿದ್ದ ಜಿಲ್ಲಾ ನ್ಯಾಯಾಲಯದ ಆದೇಶದ ಪ್ರಶ್ನಿಸಿ ಮಂಗಳೂರು ಮೂಲದ ಉದ್ಯಮಿ ಸಲ್ಲಿಸಿದ್ದ ಅರ್ಜಿ ವಜಾಗೊಳಿಸಿರುವ ನ್ಯಾಯಮೂರ್ತಿ ಎಚ್​.ಪಿ. ಸಂದೇಶ್​ ಅವರಿದ್ದ ಏಕಸದಸ್ಯ ನ್ಯಾಯಪೀಠ ಈ ಆದೇಶ ನೀಡಿದೆ. 

ಸುಪ್ರೀಂ ಕೋರ್ಟ್​ನ ತೀರ್ಪುಗಳನ್ನು ಉಲ್ಲೇಖಿಸಿರುವ ನ್ಯಾಯಪೀಠ, ತನ್ನ ಶಿಕ್ಷಣವನ್ನು ಮುಂದುವರಿಸಲು ತಮ್ಮ ಆರ್ಥಿಕ ಸಂಪನ್ಮೂಲಗಳ ಮಿತಿಯೊಳಗೆ ಪಾಲಕರು ಹಣಕಾಸಿನ ನೆರವು ಒದಗಿಸಬೇಕು ಎಂದು ಕೋರಲು ಹೆಣ್ಣು ಮಕ್ಕಳಿಗೆ ಕಾನೂನಾತ್ಮಕ ಹಕ್ಕಿದೆ ಎಂದು ಹೇಳಿದೆ. ಮಗಳು ವಯಸ್ಕಳಾಗಿರುವುದರಿಂದ ಬ್ಯಾಂಕ್​ನಿಂದ ಸಾಲ ಪಡೆದು ಓದಲಿ ಎಂದು ಹೇಳಲು ಸಾಧ್ಯವಿಲ್ಲ. ಆಕೆಗೆ ಸ್ವಂತ ಆದಾಯವಿಲ್ಲದಿರುವುದರಿಂದ ಮತ್ತು ಇಂದಿನ ವೈದ್ಯಕಿಯ ಕ್ಷೇತ್ರದಲ್ಲಿ ಎಂಡಿ ಪದವಿಯಿಲ್ಲದೆ ಎಂಬಿಬಿಎಸ್​ಗೆ ಹೆಚ್ಚಿನ ಮೌಲ್ಯವಿಲ್ಲದ ಕಾರಣ, ಅದಕ್ಕೆ ತಗಲುವ ವೆಚ್ಚವನ್ನು ತಂದೆಯೇ ಭರಿಸಬೇಕು ಎಂದು ಆದೇಶಿಸಿದೆ.

ಎಂಬಿಬಿಎಸ್​ ಮುಗಿಸಿದ ನಂತರ ಪಿಜಿ ನೀಟ್​ ಪರೀಕ್ಷೆಯಲ್ಲಿ ಉತ್ತಮ ಅಂಕ ಗಳಿಸಿದ್ದ ವಿದ್ಯಾರ್ಥಿನಿಯು ಮಂಗಳೂರಿನ ಖಾಸಗಿ ಮೆಡಿಕಲ್​ ಕಾಲೇಜಿನಲ್ಲಿ ಸೀಟು ಪಡೆದಿದ್ದಳು. ಮೊದಲ ವರ್ಷದ ಕಾಲೇಜು ಶುಲ್ಕ ಮತ್ತು ಇತರ ವೆಚ್ಚಗಳಿಗಾಗಿ ಒಟ್ಟು 16 ಲಕ್ಷ ರೂಪಾಯಿಗಳ ಅಗತ್ಯವಿತ್ತು. ಆದರೆ, ತಂದೆ ಮತ್ತು ತಾಯಿಯ ನಡುವಿನ ಕೌಟುಂಬಿಕ ಭಿನ್ನಾಭಿಪ್ರಾಯಗಳ ಕಾರಣ ಮಗಳು ತೊಂದರೆಗೆ ಸಿಲುಕಿದ್ದಳು. ಶುಲ್ಕ ತುಂಬುವುದು ಅನಿವಾರ್ಯವಾಯದ ಕಾರಣ ತನ್ನ ಅಜ್ಜನಿಂದ 13.87 ಲಕ್ಷ ರೂ. ಸಾಲ ಪಡೆದು ಕೆಇಎ ಮತ್ತು ಕಾಲೇಜಿಗೆ ಕಟ್ಟಿದ್ದಳು. ಆನಂತರ ತನ್ನ ತಂದೆಯಿಂದ ವಿದ್ಯಾಭ್ಯಾಸಕ್ಕೆ ಹಣ ಕೊಡಿಸುವಂತೆ ಕೌಟುಂಬಿಕ ದೌರ್ಜನ್ಯ ಕಾಯ್ದೆ ಅಡಿಯಲ್ಲಿ ಮ್ಯಾಜಿಸ್ಟ್ರೆಟ್​ ನ್ಯಾಯಾಲಯದ ಮೊರೆ ಹೋಗಿದ್ದಳು. ಇದನ್ನು ಪರಿಗಣಿಸಿದ್ದ ನ್ಯಾಯಾಲಯ 16 ಲಕ್ಷ ರೂ. ಪಾವತಿಸಲು ಆದೇಶ ನೀಡಿತ್ತು. ಈ ಆದೇಶವನ್ನು ಜಿಲ್ಲಾ ನ್ಯಾಯಾಲಯವು ಕೂಡ ಎತ್ತಿಹಿಡಿದಿತ್ತು. 

ತಾನು ಆರ್ಥಿಕ ನಷ್ಟದಲ್ಲಿದ್ದು, ಸಾಲಗಾರನಾಗಿದ್ದೇನೆ ಎಂಬ ತಂದೆಯ ವಾದವನ್ನೂ ನ್ಯಾಯಪೀಠ ತಳ್ಳಿಹಾಕಿದೆ. ಅವರ ಐಟಿ ರಿರ್ಟನ್​ ಮತ್ತು ಬ್ಯಾಂಕ್​ ದಾಖಲೆಗಳನ್ನು ಪರಿಶೀಲಿಸಿ, ಅರ್ಜಿದಾರರು ಕೋಟ್ಯಂತರ ರೂ. ಮೌಲ್ಯದ ಆಸ್ತಿ ಹೊಂದಿದ್ದಾರೆ. ಅಲ್ಲದೆ, ವಿವಿಧ ಬ್ಯಾಂಕ್​ಗಳಿಂದ ದೊಡ್ಡಮೊತ್ತದ ಸಾಲಗಳನ್ನು ಪಡೆದು ಮರುಪಾವತಿಸುವ ಸಾಮರ್ಥ್ಯ ಹೊಂದಿರುವುದು ದಾಖಲೆಗಳಿಂದ ಸಾಬೀತಾಗಿದೆ. ಮಗಳು ಎಂಬಿಬಿಎಸ್​ ಸೇರುವಾಗ ಪಾಲಕರಿಬ್ಬರೂ ಒಟ್ಟಿಗೆ ನಿಧಾರ ಕೈಗೊಂಡಿರುವುದರಿಂದ, ಉನ್ನತ ಶಿಕ್ಷಣದ ಜವಬ್ದಾರಿಯಿಂದ ತಂದೆ ಈಗ ಹಿಂದೆ ಸರಿಯಲು ಸಾಧ್ಯವಿಲ್ಲ ಎಂದು ಹೇಳಿದೆ.