ರಾಜ್ಯ

ಉತ್ತರ ರಾಜ್ಯಗಳ ವಿವಿ ಹೆಸರಲ್ಲೇ ನಕಲಿ ಪಿಎಚ್.ಡಿ ಜಾಸ್ತಿ

ಉತ್ತರ ರಾಜ್ಯಗಳ ವಿವಿ ಹೆಸರಲ್ಲೇ ನಕಲಿ ಪಿಎಚ್.ಡಿ ಜಾಸ್ತಿ
ಉತ್ತರ ರಾಜ್ಯಗಳ ವಿವಿ ಹೆಸರಲ್ಲೇ ನಕಲಿ ಪಿಎಚ್.ಡಿ ಜಾಸ್ತಿ
Published on: 

ಪ್ರಮುಖ ಮುಖ್ಯಾಂಶಗಳು

  • ನಕಲಿ ಪ್ರಮಾಣಪತ್ರ ನೀಡಿರುವ 249 ಅಭ್ಯರ್ಥಿಗಳ ಹೆಸರುಗಳನ್ನು ಪತ್ತೆ ಮಾಡಿರುವ ಕಾಲೇಜು ಶಿಕ್ಷಣ ಇಲಾಖೆಯು ಯಾವ ವಿಶ್ವವಿದ್ಯಾಲಯಗಳಿಂದ ಪ್ರಮಾಣಪತ್ರಗಳನ್ನು ತಂದಿದ್ದಾರೆಂದು ಪತ್ತೆ
  • ಇದರಲ್ಲಿ 133 ನಕಲಿ ಪಿಎಚ್.ಡಿಗಳು ಉತ್ತರ ಪ್ರದೇಶದ್ದಾಗಿವೆ. ಚೌದರಿ ಚರಣ್‌ಸಿಂಗ್ ಯೂನಿವರ್ಸಿಟಿ-107 ಹಾಗೂ ಬಂಡೇಳ್‌ಖಂಡ್ ಯೂನಿವರ್ಸಿಟಿಯಿಂದ 16 ಪ್ರಮಾಣಪತ್ರಗಳು ಬಂದಿವೆ.
  • ಮಗದ್ ವಿಶ್ವವಿದ್ಯಾಲಯದ 26, ರಾಜಸ್ಥಾನದ ಸನ್‌ರೈಸ್ ವಿವಿ-24, ಮೇಘಾಲಯದ ಸಿಎಂಜೆ-10, ಮಧ್ಯಪ್ರದೇಶದ ಶ್ರೀ ಸತ್ಯ ಸಾಯಿ ಯೂನಿವರ್ಸಿಟಿ ಆ್ ಟೆಕ್ನಾಲಜಿ ಆೃಂಡ್ ಮೆಡಿಕಲ್ ಸೈನ್ಸಸ್-8
ಎನ್.ಎಲ್. ಶಿವಮಾದು
ಬೆಂಗಳೂರು: ರಾಜ್ಯದ ಸರ್ಕಾರಿ ಪದವಿ ಕಾಲೇಜುಗಳಲ್ಲಿ ಅತಿಥಿ ಉಪನ್ಯಾಸಕರಾಗಿ ಹುದ್ದೆ ಗಿಟ್ಟಿಸಿಕೊಳ್ಳಲು ಅಭ್ಯರ್ಥಿಗಳು ನೀಡಿರುವ ನಕಲಿ ಪಿಎಚ್.ಡಿ ಪ್ರಮಾಣಪತ್ರಗಳು ಉತ್ತರ ಪ್ರದೇಶ, ಬಿಹಾರ, ರಾಜಸ್ಥಾನ, ಹರಿಯಾಣ, ಮೇಘಾಲಯ ಸೇರಿ ಉತ್ತರ ಭಾರತ ರಾಜ್ಯಗಳ ವಿಶ್ವವಿದ್ಯಾಲಯಗಳ ಹೆಸರಿನಲ್ಲಿ ಪಡೆದಿರುವ ನಕಲಿ ಪ್ರಮಾಣಪತ್ರಗಳಾಗಿರುವುದು ಪತ್ತೆಯಾಗಿದೆ.
ಕಳೆದ ವರ್ಷ (2025-26) ಕಾಲೇಜು ಶಿಕ್ಷಣ ಇಲಾಖೆ ವ್ಯಾಪ್ತಿಯ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜುಗಳಲ್ಲಿ ಬೋಧನೆ ಮಾಡಿರುವ ಅತಿಥಿ ಉಪನ್ಯಾಸಕರ ಪಿಎಚ್.ಡಿ ಪದವಿ ಪ್ರಮಾಣಪತ್ರಗಳ ನೈಜತೆ ಪರಿಶೀಲಿಸಿದಾಗ, ಹೊರ ರಾಜ್ಯಗಳ ವಿಶ್ವವಿದ್ಯಾಲಯಗಳ ಹೆಸರಿನಲ್ಲಿರುವುದು ಇಲಾಖೆಯ ದತ್ತಾಂಶಗಳಿಂದ ಖಾತ್ರಿಯಾಗಿದೆ.

ಉತ್ತರ ಪ್ರದೇಶದಲ್ಲಿಯೇ 133:

ನಕಲಿ ಪ್ರಮಾಣಪತ್ರ ನೀಡಿರುವ 249 ಅಭ್ಯರ್ಥಿಗಳ ಹೆಸರುಗಳನ್ನು ಪತ್ತೆ ಮಾಡಿರುವ ಕಾಲೇಜು ಶಿಕ್ಷಣ ಇಲಾಖೆಯು ಯಾವ ವಿಶ್ವವಿದ್ಯಾಲಯಗಳಿಂದ ಪ್ರಮಾಣಪತ್ರಗಳನ್ನು ತಂದಿದ್ದಾರೆಂದು ಪತ್ತೆ ಹಚ್ಚಿದೆ. ಇದರಲ್ಲಿ 133 ನಕಲಿ ಪಿಎಚ್.ಡಿಗಳು ಉತ್ತರ ಪ್ರದೇಶದ್ದಾಗಿವೆ. ಚೌದರಿ ಚರಣ್‌ಸಿಂಗ್ ಯೂನಿವರ್ಸಿಟಿ-107 ಹಾಗೂ ಬಂಡೇಳ್‌ಖಂಡ್ ಯೂನಿವರ್ಸಿಟಿಯಿಂದ 16 ಪ್ರಮಾಣಪತ್ರಗಳು ಬಂದಿವೆ.
ಅದೇ ರೀತಿ ಬಿಹಾರದ ಮಗದ್ ವಿಶ್ವವಿದ್ಯಾಲಯದ 26, ರಾಜಸ್ಥಾನದ ಸನ್‌ರೈಸ್ ವಿವಿ-24, ಮೇಘಾಲಯದ ಸಿಎಂಜೆ-10, ಮಧ್ಯಪ್ರದೇಶದ ಶ್ರೀ ಸತ್ಯ ಸಾಯಿ ಯೂನಿವರ್ಸಿಟಿ ಆ್ ಟೆಕ್ನಾಲಜಿ ಆೃಂಡ್ ಮೆಡಿಕಲ್ ಸೈನ್ಸಸ್-8, ರಾಜಸ್ಥಾನದ ಒಪಿಜೆಎಸ್-7, ಹೈದರಾಬಾದ್‌ನ ಒಸ್ಮಾನಿಯಾ-7, ತಮಿಳುನಾಡಿನ ಅಣ್ಣಾಮಲೈ ವಿವಿ ಹಾಗೂ ಹರಿಯಾಣದ ಎನ್‌ಐಎಲ್‌ಎಂ ವಿವಿಯಿಂದ ತಲಾ 4 ಪ್ರಮಾಣಪತ್ರಗಳು ಸಲ್ಲಿಕೆಯಾಗಿವೆ.

ನಕಲಿ ಜಾಲದ ಶಂಕೆ

ಯುಜಿಸಿ ನಿಯಮಗಳ ಅನ್ವಯ ಪದವಿ ಕಾಲೇಜುಗಳಲ್ಲಿ ಬೋಧನೆ ಮಾಡಲು ಪಿಎಚ್.ಡಿ ಪದವಿ ಕಡ್ಡಾಯವಾಗಿದೆ. ಹೀಗಾಗಿ, ಹುದ್ದೆ ಗಿಟ್ಟಿಸಲು ಮತ್ತು ಇಂತಹ ಅಭ್ಯರ್ಥಿಗಳ ಅಸಹಾಯಕತೆಯನ್ನೇ ಬಂಡವಾಳವನ್ನಾಗಿ ಮಾಡಿಕೊಂಡಿರುವ ಜಾಲವಿದೆಯೇ ಎಂಬ ಬಗ್ಗೆ ಉನ್ನತ ಶಿಕ್ಷಣ ಇಲಾಖೆ ಅಧಿಕಾರಿಗಳು ಸಂಶಯ ವ್ಯಕ್ತಪಡಿಸಿದ್ದಾರೆ.
ಹಣ ಮಾಡುವುದಕ್ಕಾಗಿ ತಂತ್ರಜ್ಞಾನ ಬಳಸಿಕೊಂಡು ನಕಲಿ ಪ್ರಮಾಣಪತ್ರ ವಿತರಿಸುವ ಜಾಲವಿದೆಯೇ ಅಥವಾ ಈ ಪ್ರಮಾಣಪತ್ರಗಳನ್ನು ನೀಡಿದ್ದು ಯಾರು?, ಕರ್ನಾಟಕಕ್ಕೂ ಉತ್ತರ ಪ್ರದೇಶ, ಬಿಹಾರಗಳಿಗೂ ಹೇಗೆ ಸಂಬಂಧ ಎಂಬ ವಿಷಯಗಳನ್ನು ಗಂಭೀರವಾಗಿ ಪರಿಗಣಿಸಿದ್ದು, ಇಲಾಖೆ ಹಂತದಲ್ಲಿ ಯಾವೆಲ್ಲ ಕ್ರಮ ಕೈಗೊಳ್ಳಲು ಸಾಧ್ಯವಿದೆ ಎಂಬುದನ್ನು ಪರಿಶೀಲಿಸಲಾಗುತ್ತದೆ. ಸಂಬಂಧವಿಟ್ಟ ವಿಶ್ವವಿದ್ಯಾಲಯಗಳಿಂದಲೂ ಮತ್ತೊಮ್ಮೆ ಸ್ಪಷ್ಟತೆ ಪಡೆದು ಮುಂದಿನ ನಿರ್ಣಯ ಕೈಗೊಳ್ಳಲಾಗುತ್ತದೆ ಎಂದು ತಿಳಿದು ಬಂದಿದೆ.

ಮತ್ತೆ 500 ನಕಲಿ ಪಿಎಚ್.ಡಿ?

ರಾಜ್ಯದಲ್ಲಿ ಪ್ರಸ್ತುತ 10,335 ಅತಿಥಿ ಉಪನ್ಯಾಸಕರು ಕಾರ್ಯನಿರ್ವಹಿಸುತ್ತಿದ್ದಾರೆ. ಇದರಲ್ಲಿ ಸುಮಾರು 500ಕ್ಕೂ ಹೆಚ್ಚಿನ ಮಂದಿ ನಕಲಿ ಪಿಎಚ್.ಡಿ ಹೊಂದಿದ್ದಾರೆಂದು ಅತಿಥಿ ಉಪನ್ಯಾಸಕರೇ ಆರೋಪ ಮಾಡುತ್ತಿದ್ದಾರೆ. ಇದೀಗ ಕಾಲೇಜು ಹಂತದ ಸಮಿತಿಯಲ್ಲಿ ಪತ್ತೆಯಾಗಿರುವಂತೆ 249 ಮಂದಿ ವಿರುದ್ಧ ಕ್ರಮ ಕೈಗೊಳ್ಳಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಮತ್ತಷ್ಟು ಮಂದಿ ಕಂಡುಬಂದಲ್ಲಿ ಅವರ ವಿರುದ್ಧವೂ ಕ್ರಿಮಿನಲ್ ಮೊಕದ್ದಮೆ ದಾಖಲಿಸಲಾಗುತ್ತದೆ ಎಂದು ಕಾಲೇಜು ಶಿಕ್ಷಣ ಇಲಾಖೆ ಆಯುಕ್ತ ಎಚ್.ಎನ್. ಗೋಪಾಲಕೃಷ್ಣ ಎಚ್ಚರಿಕೆ ನೀಡಿದ್ದಾರೆ.

ವಿಶ್ವವಿದ್ಯಾಲಯಗಳಿಗೆ ಕೆಟ್ಟ ಹೆಸರು: ಪ್ರೊ. ಶಿವರಾಜು

ದೇಶದ ಉನ್ನತ ಶಿಕ್ಷಣದಲ್ಲಿ ಕರ್ನಾಟಕದಲ್ಲಿ ಗುಣಮಟ್ಟದ ಶಿಕ್ಷಣ ದೊರೆಯಲಿದೆ ಎಂಬ ಹೆಸರಿದೆ. ಇಂತಹ ನಕಲಿಗಳಿಂದ ರಾಜ್ಯದ ಗುಣಾತ್ಮಕ ಶಿಕ್ಷಣಕ್ಕೆ ಪೆಟ್ಟು ಬೀಳಲಿದೆ ಮತ್ತು ನಕಲಿಗಳಿಂದ ಸಂಬಂಧಪಟ್ಟ ವಿಶ್ವವಿದ್ಯಾಲಯಗಳಿಗೂ ಕೆಟ್ಟ ಹೆಸರು ಬರಲಿದೆ. ಆದ್ದರಿಂದ ಸಂಬಂಧಪಟ್ಟ ಅಭ್ಯರ್ಥಿಗಳ ವಿರುದ್ಧ ಕ್ರಮ ಜರುಗಿಸುವ ಜತೆಗೆ ನಕಲಿ ಜಾಲವಿದೆಯೇ ಎಂಬುದನ್ನು ಪತ್ತೆ ಹಚ್ಚಬೇಕು. ಸರ್ಕಾರದ ಹಂತದಲ್ಲಿ ಈ ಕುರಿತು ನಿರ್ಧಾರ ಕೈಗೊಳ್ಳಬೇಕು ಎಂದು ಬೆಂಗಳೂರು ವಿಶ್ವವಿದ್ಯಾಲಯದ ಕುಲಪತಿ ಪ್ರೊ. ಸಿ. ಶಿವರಾಜು ಒತ್ತಾಯಿಸಿದ್ದಾರೆ.
"

ಕಾಲೇಜು ಮಟ್ಟದ ಸಮಿತಿಗಳಿಂದ ನಕಲಿ ಪಿಎಚ್.ಡಿ ಪತ್ತೆ ಹಚ್ಚಲಾಗಿದ್ದು, ಕ್ರಿಮಿನಲ್ ಕೇಸ್ ದಾಖಲಿಸಲು ಆದೇಶ ನೀಡಲಾಗಿದೆ. ಮುಂದಿನ ದಿನಗಳಲ್ಲಿ ಯಾವ ರೀತಿಯ ಕ್ರಮ ಜರುಗಿಸಬೇಕು ಎಂಬ ಬಗ್ಗೆ ಸರ್ಕಾರದ ಹಂತದಲ್ಲಿ ಚರ್ಚಿಸಲಾಗುವುದು.

— - ಎಚ್.ಎನ್. ಗೋಪಾಲಕೃಷ್ಣ, ಆಯುಕ್ತ, ಕಾಲೇಜು ಶಿಕ್ಷಣ ಇಲಾಖೆ


ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net