ಹತ್ತು ನಿಮಿಷ ಮಳೆ, ಜೋರು ಗಾಳಿಗೆ ಬೆಂಗಳೂರಿನ ರಸ್ತೆಗಳಲ್ಲಿರುವ ಮರಗಳು ಬುಡಮೇಲು; ಕಾರಣ, ಪರಿಹಾರವೇನು?

ಗುರುನಂದನ್ ರಾವ್ ಎಂ ಕಳೆದ ಕೆಲವು ವರ್ಷದಿಂದ ಕೆರೆ ಕಟ್ಟುವುದು, ಎನ್​ಜಿಒಗಳ ಮುಖಾಂತರ ಮರಗಳನ್ನು ನೆಡುವ ಮಹತ್ತರ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಬೆಂಗಳೂರಿನಲ್ಲಿ ಸುರಿಯುವ ಮಳೆಗೆ, ಬೀಸುವ ಗಾಳಿಗೆ ಮರಗಳ ಕೊಂಬೆ ಉರುಳೋದ್ಯಾಕೆ ಹಾಗೂ ಬುಡಮೇಲಾಗಿ ನೆಲ್ಲಕ್ಕುರುಳೋದ್ಯಾಕೆ ಎಂದು ತಮ್ಮ ಇನ್​ಸ್ಟಾಗ್ರಾಮ್​​ ಖಾತೆಯಲ್ಲಿ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ.

'ಬ್ರಿಟಿಷರು ಮಾಡಿರುವ ಅವಾಂತರ ಎಂದರೆ, ಬೆಂಗಳೂರು ಸುಂದರವಾಗಿ ಕಾಣಲೆಂದು ಸಾಫ್ಟ್​ವುಡ್​ ಮರಗಳನ್ನ ತಂದು ಬೆಂಗಳೂರಿನಲ್ಲಿ ನೆಟ್ಟಿದ್ದಾರೆ. ಈ ಮರಗಳು ಬೇಗನೆ ಬೆಳೆಯುತ್ತವೆ. ಆದ್ರೆ ಸಮಸ್ಯೆ ಏನಂದ್ರೆ, ಈ ಮರದ ರೆಂಬೆ ಕೊಂಬೆ ಕಾಂಡದಲ್ಲಿ ಶಕ್ತಿಯೇ ಇರೋದಿಲ್ಲ. ಇವುಗಳ ಬೇರುಗಳು ಮೇಲ್ಮಟ್ಟದಲ್ಲೇ ಹರಡಿಕೊಳ್ಳುವುದರಿಂದ ವಯಸ್ಸಾದಂತೆ ಒಳಭಾಗದಲ್ಲಿ ಟೊಳ್ಳಾಗುವುದರಿಂದ ಒಂದು ಜೋರು ಗಾಳಿ ಬೀಸಿದರೆ ಮನುಷ್ಯನ ತಲೆ ಮೇಲೆ ಅಥವಾ ಕಾರಿನ ಮೇಲೆ ಬೀಳ್ತವೆ' ಎಂದರು.

'ಮರಗಳ ಸುತ್ತಲಿನ ನೆಲಕ್ಕೆ ಪಾದಚಾರಿ ಮಾರ್ಗ ಅಥವಾ ಡಾಂಬರು ಹಾಕುವಾಗ ಮರದ ಬುಡದವರೆಗೂ ಪೂರ್ತಿಯಾಗಿ ಮುಚ್ಚಿಬಿಡಲಾಗುತ್ತದೆ. ಇದರಿಂದ ಬೇರುಗಳಿಗೆ ಉಸಿರಾಡಲು ಜಾಗ ಇರುವುದಿಲ್ಲ ಮತ್ತು ಮಳೆ ನೀರು ಬೇರುಗಳ ಆಳಕ್ಕೆ ಇಳಿಯಲು ಸಾಧ್ಯವಾಗುವುದಿಲ್ಲ. ಮೆಟ್ರೋ ಕಾಮಗಾರಿ, ಬಿಬಿಎಂಪಿ ಅಥವಾ ಬೆಸ್ಕಾಂತಂತಿಗಳಿಗಾಗಿ ಮರಗಳ ಕೊಂಬೆಗಳನ್ನು ಕೇವಲ ಒಂದು ಬದಿಗೆ ಮಾತ್ರ ಅಸಮರ್ಪಕವಾಗಿ ಕತ್ತರಿಸಲಾಗುತ್ತದೆ. ಇದರಿಂದ ಮರದ ಸಮತೋಲನ ತಪ್ಪಿ, ಗಾಳಿ ಬಂದಾಗ ಅದು ಸುಲಭವಾಗಿ ಉರುಳುತ್ತದೆ.

ಮುಂದುವರೆದು, 'ಈ ಮರಗಳು ಚೆಂದವಾಗಿ ಕಾಣ್ತವೆ. ಆದರೆ ಇವನ್ನು ರಸ್ತೆ ಬದಿಯಲ್ಲಿ ನೆಡುವುದು ಸೂಕ್ತವಲ್ಲ. ಒಂದೊಂದು ದೇಶ ರಾಜ್ಯ ಜಿಲ್ಲೆಯ ಹವಾಮಾನ ಒಂದೊಂದು ರೀತಿಯಲ್ಲಿ ಇರುತ್ತದೆ.ಅದರ ಅನುಗುಣವಾಗಿ ಮರ ಗಿಡಗಳನ್ನು ಬೆಳೆಯಬೇಕು. ಇಲ್ಲಿ ಹೊಂಗೆ ಹಾಗೂ ಹಲಸಿನ ಮರ, ಆಲದ ಮರ, ಬೇವಿನ ಮರದಂತಹ ದೇಶಿ ತಳಿಗಳು ಹೆಚ್ಚು ಗಟ್ಟಿಯಾಗಿರುತ್ತವೆ. ಇಂತಹ ಮರಗಳನ್ನು ನೆಟ್ಟರೆ ಇಲ್ಲಿನ ವಾತಾವರಣಕ್ಕೆ ಒಗ್ಗಿಕೊಳ್ಳುತ್ತದೆ. ನಮ್ಮ ವಾತಾವರಣಕ್ಕೆ ಯಾವ ಗಿಡ-ಮರ ಒಗ್ಗಿಕೊಳ್ಳುತ್ತದೆ ಎಂದು ತಿಳಿದುಕೊಳ್ಳದ ಬ್ರಿಟಿಷರು ಇಂತಹ ಮರಗಳನ್ನು ನೆಟ್ಟು ಬೆಂಗಳೂರನ್ನು ನರಕ ಮಾಡಿಬಿಟ್ಟಿದ್ದಾರೆ' ಎಂದು ಹೇಳಿದರು.

'ಬ್ರಿಟಿಷರು ನೆಟ್ಟ ಈ ಮರಗಳು ಇನ್ನು ಒಂದು ಆರು ಅಥವಾ ಹನ್ನೆರಡು ವರ್ಷ ಭೂಮಿ ಮೇಲೆ ಬದುಕಿರಬಹುದು. ಆ ನಂತರ ತನ್ನಷ್ಟಕ್ಕೆ ಅವೇ ಬಿದ್ದು ಬಿಡುತ್ತದೆ. ಆಗ ನಮ್ಮ ಪ್ರಾದೇಶಿಕ ತಳಿಯ ಸಸಿಗಳನ್ನು ರಸ್ತೆ ಬದಿಯಲ್ಲಿ ನೆಡುವುದು ಸೂಕ್ತ ಎನ್ನುತ್ತಾರೆ' ಗುರುನಂದನ್​ ರಾವ್​.

ಬೇಸಿಗೆ ಕಾಲಕ್ಕೆ ಸುಂದರವಾಗಿ ಕಾಣುವ ಟಬೂಬಿಯಾ ರೋಸಿಯಾ ಮರವು ದಕ್ಚಿಣಾ ಅಮೆರಿದ್ದು. ಇದನ್ನು 1980ರಲ್ಲಿ ಬ್ರಿಟಿಷರು ಭಾರತಕ್ಕೆ ಪರಿಚಯಿಸಿದರು. ಜಕರಾಂಡ ಮಿಮೋಸಿಫೋಲಿಯಾ ಎನ್ನುವ ಮರದ ತಳಿಯು ಸಹ ದಕ್ಷಿಣ ಅಮೆರಿಕಾಕ್ಕೆ ಸೇರಿದ್ದಾಗಿದೆ. ಅದರಲ್ಲಿ ಬಿಡುವ ನೇರಳೆ ಹೂವುಗಳು ಬಹಳ ಚಂದವಾಗಿ ಕಾಣುತ್ತದೆ ಪ್ರಶಂಸಿಸಲ್ಪಡುತ್ತವೆ. ಅವು ಹಗುರವಾದ, ಮೃದುವಾದ ರೆಂಬೆ, ಕಾಂಡವನ್ನು ಹೊಂದಿರುತ್ತದೆ

ಆಲ್ಸ್ಟೋನಿಯಾ ಸ್ಕಾಲರಿಸ್ ಎನ್ನುವ ಮರವು ಏಷ್ಯಾ ಮತ್ತು ಆಸ್ಟ್ರೇಲಿಯಾದ ಕೆಲವು ಭಾಗಗಳಿಗೆ ಸ್ಥಳೀಯವಾಗಿ ವೇಗವಾಗಿ ಬೆಳೆಯುವ ನಿತ್ಯಹರಿದ್ವರ್ಣ ಮರ, ಇದನ್ನು ಹಲಗೆಗಳು, ಪೆನ್ಸಿಲ್‌ಗಳು ಮತ್ತು ಕ್ರೇಟ್‌ಗಳನ್ನು ತಯಾರಿಸಲು ಬಳಸಲಾಗುತ್ತದೆ. ಗುಲ್​ ಮೊಹರ್​, ತಾಮ್ರದ ಶಂಕು ಇವೆಲ್ಲವು ಬ್ರಿಟಿಷರು ನೆಟ್ಟ ಮರಗಳಾಗಿದೆ, (ಏಜೆನ್ಸೀಸ್).