ಚುನಾವಣೆಗೆ ಮುನ್ನ ವಿವಿಧ ಪೂರ್ವತಯಾರಿ ಅಗತ್ಯವಿದೆ. ಜನಸಂಖ್ಯೆ ಆಧಾರದ ಮೇಲೆ ಪಂಚಾಯಿತಿ ವ್ಯಾಪ್ತಿಯ ವಾರ್ಡ್ಗಳ ಗಡಿ ಗುರುತಿಸುವ/ ಮರುಹಂಚಿಕೆಯ ಪ್ರಕ್ರಿಯೆ ಈಗಾಗಲೇ ಮುಗಿದಿದೆ. ಮೀಸಲಾತಿ ನಿಗದಿಮಾಡುವ ಕೆಲಸ ಪ್ರಗತಿಯಲ್ಲಿದ್ದು, ಇದು ಸಿದ್ಧವಾದ ನಂತರ, ಕರಡು ಯಾದಿ ಪ್ರಕಟಿಸಿ, ಸಾರ್ವಜನಿಕರಿಂದ ಆಕ್ಷೇಪಣೆ ಆಹ್ವಾನಿಸಬೇಕಾಗುತ್ತದೆ. ಸಾಮಾನ್ಯವಾಗಿ ಮೀಸಲಾತಿ ಅಂತಿಮವಾದ ಬಳಿಕ ಕನಿಷ್ಠ 45 ದಿನಗಳ ಬಳಿಕ ಚುನಾವಣಾ ಆಯೋಗವು ಚುನಾವಣಾ ದಿನಾಂಕದ ಅಧಿಸೂಚನೆ ಹೊರಡಿಸುತ್ತದೆ. ಸ್ಥಳೀಯ ಸಂಸ್ಥೆಗಳ ಚುನಾವಣೆ ನಡೆಸಲು ಆಯೋಗ ಈಗಾಗಲೇ ಸಿದ್ಧತೆ ಕೈಗೊಂಡಿದೆ. ಈ ಎಲ್ಲ ಬೆಳವಣಿಗೆಗಳನ್ನು ಗಮನಿಸಿದಾಗ, ಪಂಚಾಯಿತಿ ಚುನಾವಣೆ ಹತ್ತಿರದಲ್ಲಿದೆಯೆಂದು ಭಾವಿಸಬಹುದು. ರಾಜ್ಯದಲ್ಲಿ 31 ಜಿಪಂಗಳಿದ್ದು, ಒಟ್ಟು 1,083 ಸ್ಥಾನಗಳಿವೆ. 229 ತಾಪಂಗಳಿದ್ದು, 3,903 ಸದಸ್ಯ ಸ್ಥಾನಗಳಿವೆ. ಒಟ್ಟು 5,950 ಗ್ರಾಮ ಪಂಚಾಯಿತಿಗಳಿದ್ದು, 96 ಸಾವಿರ ಸದಸ್ಯರಾಗುತ್ತಾರೆ. ಅಂದರೆ ಒಂದು ಲಕ್ಷಕ್ಕಿಂತ ತುಸು ಹೆಚ್ಚು ಸ್ಥಳೀಯ ಜನಪ್ರತಿನಿಧಿಗಳಾಗುತ್ತಾರೆ. ಈ ಪೈಕಿ ಸರಿಸುಮಾರು ಶೇ.50 ಸೀಟುಗಳು ಮಹಿಳೆಯರಿಗೆ ಮೀಸಲಾಗಿರುತ್ತವೆ. ಇದಲ್ಲದೆ, ರಾಜಕೀಯದಲ್ಲಿ ಆಸಕ್ತಿಯುಳ್ಳ ಯುವಜನರು ಸಹ ಅವಕಾಶ ಪಡೆಯುವ ಸಂಭವ ಇರುತ್ತದೆ. ಸ್ಥಳೀಯ ಆಡಳಿತವು ಜನರಿಗೆ ಅತಿ ನಿಕಟವಾಗಿ ಕಾರ್ಯನಿರ್ವಹಿಸಲು ವೇದಿಕೆ ಒದಗಿಸುವುದರಿಂದಾಗಿ, ಭವಿಷ್ಯದಲ್ಲಿ ಆಡಳಿತದ ಮುಂದಿನ ಹಂತಗಳಿಗೆ ತೆರಳಲು ಯುವಜನರಿಗೆ ಇದು ಉತ್ತಮ ಅನುಭವವನ್ನು ನೀಡುತ್ತದೆ. ಗ್ರಾಮ ಪಂಚಾಯಿತಿ ಚುನಾವಣೆ ಪಕ್ಷಚಿಹ್ನೆಗಳಿಲ್ಲದೆ ನಡೆದರೆ, ತಾಲೂಕು ಮತ್ತು ಜಿಲ್ಲಾ ಪಂಚಾಯಿತಿ ಚುನಾವಣೆ ಪಕ್ಷಸಹಿತವಾಗಿರುತ್ತದೆ. ಈ ಅವಕಾಶವನ್ನು ಸದುಪಯೋಗಪಡಿಸಿಕೊಳ್ಳುವ ವಿವೇಚನೆ ಮತ್ತು ಪ್ರಬುದ್ಧತೆಯನ್ನು ಪ್ರದರ್ಶಿಸುವುದು ಮುಖ್ಯ. ಇದರಲ್ಲಿ ರಾಜಕೀಯ ಪಕ್ಷಗಳ ಹೊಣೆಗಾರಿಕೆಯೂ ಇದೆ.
