ರಾಜ್ಯ

ಸವಾರರ ನಶೆ ಇಳಿಸಿದ ಟ್ರಾಫಿಕ್ ಪೊಲೀಸರ ದಂಡಾಸ್ತ್ರ

ಟ್ರಾಫಿಕ್ ಪೊಲೀಸರ ದಂಡಾಸ್ತ್ರ
ಟ್ರಾಫಿಕ್ ಪೊಲೀಸರ ದಂಡಾಸ್ತ್ರ
ಮಂಜುನಾಥ ಅಂಗಡಿ
Published on: 
ಧಾರವಾಡ: ಮದ್ಯಪಾನ ಮಾಡಿ ವಾಹನ ಚಲಾಯಿಸಿ ಪೊಲೀಸರ ಕೈಗೆ ಸಿಕ್ಕಿಬಿದ್ದರೆ 10,000 ರೂ. ದಂಡ ತೆರಬೇಕು. ವಾಹನ ಸವಾರರ ಹಿತದೃಷ್ಟಿಯಿಂದ ದಂಡದ ಮೊತ್ತವನ್ನು ವಿಪರೀತ ಏರಿಕೆ ಮಾಡಿದ್ದರೂ ಪ್ರಕರಣಗಳ ಸಂಖ್ಯೆ ಮಾತ್ರ ಕಡಿಮೆಯಾಗುತ್ತಿಲ್ಲ. ಹುಬ್ಬಳ್ಳಿ- ಧಾರವಾಡದ 4 ಸಂಚಾರ ಠಾಣೆಗಳಲ್ಲಿ 2025ರಲ್ಲಿ 2,425 ಜನರಿಗೆ ದಂಡ ವಿಧಿಸಲಾಗಿದ್ದು, ಆಕರಣೆಯಾದ ದಂಡದ ಮೊತ್ತ 2,52,48,500 ರೂಪಾಯಿ.
2025ರಲ್ಲಿ ಡಿಡಿ ಕೇಸ್ ವಿಧಿಸುವಲ್ಲಿ ಧಾರವಾಡ ಸಂಚಾರ ಠಾಣೆ ಪೊಲೀಸರು ಮೊದಲ ಸ್ಥಾನದಲ್ಲಿದ್ದಾರೆ. ಠಾಣೆ ವ್ಯಾಪ್ತಿಯಲ್ಲಿ 1,032 ಪ್ರಕರಣ ದಾಖಲಾಗಿದ್ದು, 1,12,56,000 ರೂ. ದಂಡ ವಸೂಲಾತಿಯಾಗಿದೆ. ಹುಬ್ಬಳ್ಳಿಯ ಉತ್ತರ ಸಂಚಾರ ಠಾಣೆಯಲ್ಲಿ 630 ಪ್ರಕರಣ ದಾಖಲಾಗಿದ್ದು, 63,67,500 ರೂ. ದಂಡ, ಪೂರ್ವ ಸಂಚಾರ ಠಾಣೆಯಲ್ಲಿ 385 ಪ್ರಕರಣ ದಾಖಲಾಗಿದ್ದು, 38,50,000 ದಂಡ ಹಾಗೂ ದಕ್ಷಿಣ ಸಂಚಾರ ಠಾಣೆಯಲ್ಲಿ 378 ಪ್ರಕರಣ ದಾಖಲಾಗಿದ್ದು 37,75,000 ರೂ. ದಂಡ ಆಕರಣೆ ಮಾಡಲಾಗಿದೆ.
* ಬ್ರೆಥಲೈಸರ್ ಬಳಸಿ ಕುಡುಕರ ಪತ್ತೆ:
ಸಂಚಾರ ಠಾಣೆ ಪೊಲೀಸರು ನಿಯಮಿತವಾಗಿ ವಾಹನ ತಪಾಸಣೆ ಮಾಡುತ್ತಿರುತ್ತಾರೆ. ಕೆಲ ಬಾರಿ ನಗರದ ಆಯ್ದ ಪ್ರದೇಶಗಳಲ್ಲಿ ವಿಶೇಷ ಅಭಿಯಾನ ಮಾಡಿ ಕುಡುಕ ವಾಹನ ಸವಾರರನ್ನು ಪತ್ತೆ ಮಾಡುತ್ತಾರೆ. ಸಂಶಯ ಬಂದರೆ ಬ್ರೆಥಲೈಸರ್ ಬಳಸಿ ಊದಲು ಹೇಳುತ್ತಾರೆ. ಬ್ರೆಥಲೈಸರ್‌ನಲ್ಲಿ ಆ್ಯಕ್ಟಿವ್ ಮತ್ತು ಪ್ಯಾಸಿವ್ ಮೋಡ್‌ಗಳಿರುತ್ತವೆ. ಆ್ಯಕ್ಟಿವ್ ಮೋಡ್ ಇರುವ ಬ್ರೆಥಲೈಸರ್ ಅನ್ನು ಅತಿಯಾಗಿ ಮದ್ಯ ಸೇವಿಸಿದವರ ಬಾಯಿಯ ಬಳಿ ಒಯ್ಯುತ್ತಲೇ ಮದ್ಯದ ಪ್ರಮಾಣ ತೋರಿಸುತ್ತದೆ. ಕಡಿಮೆ ಮದ್ಯ ಸೇವಿಸಿದವರಿಗೆ ಬ್ರೆಥಲೈಸರ್ ಬಾಯಿಗೆ ಇಟ್ಟು ಊದಲು ಹೇಳಿ ಪ್ರಮಾಣ ದಾಖಲಿಸಿಕೊಳ್ಳಲಾಗುತ್ತದೆ.
* ದಂಡ ಪಾವತಿ ಕಡ್ಡಾಯ:
ಕುಡಿದು ವಾಹನ ಚಲಾಯಿಸುವವರು ಪೊಲೀಸರ ಕೈಗೆ ಸಿಕ್ಕಿ ಬಿದ್ದರೆ 10,000 ರೂ. ದಂಡ ಕಟ್ಟಲೇಬೇಕು. ದಂಡದ ಮೊತ್ತ ವಾಹನ ನೋಂದಣಿ ಸಂಖ್ಯೆಗೆ ನಮೂದಾಗುತ್ತದೆ. ಮುಂಜಾಗ್ರತಾ ಕ್ರಮವಾಗಿ ವಾಹನವನ್ನು ತಮ್ಮ ಸುಪರ್ದಿಗೆ ಪಡೆಯುವ ಪೊಲೀಸರು, ಸವಾರನ ಮೊಬೈಲ್ ಸಂಖ್ಯೆಗೆ ಲಿಂಕ್ ಮೂಲದ ದಂಡದ ನೋಟಿಸ್ ಕಳಿಸುತ್ತಾರೆ. ಸವಾರ ಆನ್‌ಲೈನ್ ಮೂಲಕ ದಂಡದ ಮೊತ್ತ ಪಾವತಿಸಿ ವಾಹನ ಒಯ್ಯಬೇಕು. ಕೆಲ ಪ್ರಕರಣಗಳಲ್ಲಿ ನಿಷ್ಕಾಳಜಿಯಿಂದ ವಾಹನ ಚಾಲನೆ, ಚಾಲನಾ ಪರವಾನಗಿ ಇಲ್ಲದಿರುವುದು, ದಾಖಲೆಗಳು ಇಲ್ಲದಿರುವುದು, ಬೈಕ್‌ನಲ್ಲಿ ಮೂವರ ಸವಾರಿ, ಹೆಲ್ಮೆಟ್ ಇಲ್ಲದಿದ್ದರೆ ಡಿಡಿ ಕೇಸ್ ಜತೆ ದಂಡದ ಮೊತ್ತವೂ ಏರುತ್ತದೆ.
* ಕುಡಿದು ವಾಹನ ಚಾಲನೆ ಶಿಕ್ಷಾರ್ಹ:
ರಸ್ತೆ ಅಪಘಾತ ಮತ್ತು ಸಾವು- ನೋವಿನ ಪ್ರಮಾಣ ತಡೆಯಲು 2019ರ ಮೋಟಾರು ವಾಹನ (ತಿದ್ದುಪಡಿ) ಕಾಯ್ದೆಯಡಿ 2019ರ ಸೆಪ್ಟೆಂಬರ್‌ನಿ0ದ ದೇಶಾದ್ಯಂತ ಪರಿಷ್ಕೃತ ದಂಡಗಳನ್ನು ಜಾರಿಗೊಳಿಸಲಾಗಿದೆ. ರಾಜ್ಯ ಸರ್ಕಾರ 2019ರ ಸೆ. 4ರಿಂದ ಕಾಯ್ದೆ ಜಾರಿಗೊಳಿಸಿದೆ. ಮೊದಲ ಬಾರಿ ಕುಡಿದು ವಾಹನ ಚಾಲನೆ ಮಾಡಿ ಸಿಕ್ಕಿಬಿದ್ದರೆ 10,000 ರೂ. ದಂಡ ಅಥವಾ 6 ತಿಂಗಳವರೆಗೆ ಜೈಲುಶಿಕ್ಷೆ ವಿಽಸಲಾಗುತ್ತದೆ. ದಂಡ ಭರಿಸಿದ ವ್ಯಕ್ತಿ 2ನೇ ಬಾರಿ ಕುಡಿದು ವಾಹನ ಚಾಲನೆ ಮಾಡಿ ಸಿಕ್ಕಿಬಿದ್ದರೆ 15,000 ರೂ. ದಂಡ ಅಥವಾ 2 ವರ್ಷದವರೆಗೆ ಜೈಲುಶಿಕ್ಷೆ ವಿಧಿಸಲಾಗುತ್ತದೆ.
Drink and Drive
dharwad traffic police
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net