ಅಪರಿಚಿತ ರೋಗಿಗೆ ಕಿಡ್ನಿ ದಾನಕ್ಕೆ ಮುಂದಾದ ಡಾಕ್ಟರ್| High court ಅನುಮತಿ

ತಾನು ಕಿಡ್ನಿ ದಾನಕ್ಕೆ ಮುಂದಾಗಿದ್ದು, ಅದನ್ನು ಅಗತ್ಯವಿರುವ ರೋಗಿಗೆ ನೀಡಬೇಕು ಎಂದು ಬೆಂಗಳೂರಿನ ಮಣಿಪಾಲ್​ ಆಸ್ಪತ್ರೆಯ ಮಾನವ ಅಂಗ ಮತ್ತು ಅಂಗಾಂಶ ವರ್ಗಾವಣೆ ಸಮಿತಿಗೆ ಮನವಿ ಮಾಡಿಕೊಳ್ಳಲಾಗಿತ್ತು. ಆದರೆ, ಅದನ್ನು ಸಮಿತಿ ಪರಿಗಣಿಸಿಲ್ಲ. ಆದ್ದರಿಂದ ಸೂಕ್ತ ನಿರ್ದೇಶನ ನೀಡಬೇಕು ಎಂದು 58 ವರ್ಷ ವಯಸ್ಸಿನ ವೈದ್ಯೆ ಹೈಕೋರ್ಟ್​ಗೆ ಅರ್ಜಿ ಸಲ್ಲಿಸಿದ್ದರು.

ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಸೂರಜ್​ ಗೋವಿಂದರಾಜ್​ ಅವರಿದ್ದ ಏಕಸದಸ್ಯ ನ್ಯಾಯಪೀಠ, ವೈದ್ಯೆಯ ಕಿಡ್ನಿ ದಾನದ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವಂತೆ ಮಣಿಪಾಲ್​ ಆಸ್ಪತ್ರೆಗೆ ನಿರ್ದೇಶನ ನೀಡಿದೆ. ರೋಗಿ ಮತ್ತು ವೈದ್ಯೆಯ ನಡುವೆ ಹಣಕಾಸಿನ ವ್ಯವಹಾರ ನಡೆದಿರಬಹುದು ಎಂಬ ಅನುಮಾನದ ಕಾರಣ ಆಸ್ಪತ್ರೆಯ ಸಮಿತಿಯು ವೈದ್ಯೆಯ ಮನವಿಯನ್ನು ಪರಿಗಣಿಸದೆ ಇದ್ದಿರಬಹುದು ಎಂದು ವಿಚಾರಣೆ ವೇಳೆ ನ್ಯಾಯಪೀಠ ಅಭಿಪ್ರಾಯಪಟ್ಟಿತು. 

ಮಹಿಳೆಯ ವಾದಾಂಶಗಳನ್ನು ಆಲಿಸಿದ ನ್ಯಾಯಪೀಠ, ಪರೋಪಕಾರಿ ಚಿಂತನೆಯಿಂದ ಕಿಡ್ನಿ ದಾನ ಮಾಡಲು ಮುಂದಾಗಿರುವುದು ಅಪರೂಪದ ಪ್ರಕರಣ ಎಂದು ಅಭಿಪ್ರಾಯಪಟ್ಟಿದೆ. ಅರ್ಜಿದಾರರು ಸ್ವತಃ ವೈದ್ಯರಾಗಿದ್ದು, ಕಿಡ್ನಿ ದಾನದಿಂದ ಆಗಬಹುದಾದ ಎಲ್ಲ ಪರಿಣಾಮಗಳನ್ನು ತಿಳಿದಿದ್ದಾರೆ. ಆದ್ದರಿಂದ ವೈದ್ಯೆಯ ಮನವಿಯನ್ನು ಪರಿಗಣಿಸಿ ಕಿಡ್ನಿ ಅಗತ್ಯವಿರುವ ರೋಗಿಗಳನ್ನು ಗುರುತಿಸಬೇಕು. ಅವರಲ್ಲಿ ವೈದ್ಯೆಯ ಕಿಡ್ನಿ ಯಾರಿಗೆ ಹೊಂದಿಕೆಯಾಗುತ್ತದೆ ಎಂದು ಪರಿಶೀಲಿಸಿ ಮುಂದಿನ ಕ್ರಮವನ್ನು ಕಾನೂನು ಪ್ರಕಾರ ಕೈಗೊಳ್ಳಬೇಕು ಎಂದು ನ್ಯಾಯಾಲಯ, ಮಣಿಪಾಲ್​ ಆಸ್ಪತ್ರೆಗೆ ನಿರ್ದೇಶನ ನೀಡಿದೆ.