ಡಿ.ದೇವರಾಜ ಅರಸು ದಾಖಲೆ ಬ್ರೇಕ್, ಸಿದ್ದರಾಮಯ್ಯ ಆಡಳಿತಕ್ಕೆ ಸಚಿವ ಎಂ.ಬಿ. ಪಾಟೀಲ ನೀಡಿದ ಅಂಕಗಳೆಷ್ಟು ಗೊತ್ತಾ?

ಡಿ.ದೇವರಾಜ ಅರಸು ಹಿಂದುಳಿದವರ ನಾಯಕ ಎಂದೇ ಖ್ಯಾತಿ ಪಡೆದವರು. ಅದೇ ರೀತಿ ಸಿದ್ದರಾಮಯ್ಯ ಕೂಡ ಅಲ್ಪಸಂಖ್ಯಾತರು, ಹಿಂದುಳಿದವರು, ದಲಿತರು ಹಾಗೂ ಬಡವರ ಪರವಾದ ನಾಯಕರಾಗಿದ್ದು, ಇಬ್ಬರ ಕೊಡುಗೆಯೂ ಅಪಾರ. ಈ ಹೊತ್ತಿನಲ್ಲಿ ಆ ಇಬ್ಬರನ್ನೂ ಸ್ಮರಿಸುವುದಾಗಿ ಮಂಗಳವಾರ ಸುದ್ದಿಗಾರರ ಪ್ರಶ್ನೆಗೆ ಅವರು ಪ್ರತಿಕ್ರಿಯಿಸಿದರು.

ಸಿದ್ಧರಾಮಯ್ಯ ಅವರ ದಾಖಲೆಗೆ ಸಂಬಂಧಿಸಿದಂತೆ ಬಿಜೆಪಿಗರ ಟೀಕೆಗೆ ತಿರುಗೇಟು ನೀಡಿದ ಎಂ.ಬಿ. ಪಾಟೀಲರು, ಈ ಹಿಂದೆ ಬಿಜೆಪಿಗರು ನಾಲ್ಕು ವರ್ಷ ಏನು ಸಾಧನೆ ಮಾಡಿದರು? ಯಡಿಯೂರಪ್ಪ ಅವರನ್ನು ಒಂದೇ ಅವಧಿ ಪೂರ್ಣಗೊಳಿಸಲು ಬಿಡಲಿಲ್ಲ. ಯಡಿಯೂರಪ್ಪ ಅವರನ್ನು ಪೂರ್ಣಾವಧಿ ಮುಖ್ಯಮಂತ್ರಿಯನ್ನಾಗಿಸದಿರುವುದೇ ಬಿಜೆಪಿ ಸಾಧನೆ ಎಂದರು.

ಆದರೆ, ಕಾಂಗ್ರೆಸ್ ಅವಧಿಯಲ್ಲಿ ಹಾಗಾಗಲಿಲ್ಲ. ಸಿದ್ದರಾಮಯ್ಯ ಅವರು ಈ ಹಿಂದೆ ಐದು ವರ್ಷ ಪೂರ್ಣಾವಧಿ ಆಡಳಿತ ನಡೆಸಿದ್ದು, ಇದೀಗ ಎರಡನೇ ಅವಧಿಯಲ್ಲಿ ಅರಸು ಅವರ ದಾಖಲೆ ಹಿಂದಿಕ್ಕಿದ್ದಾರೆ. ಸಿದ್ದರಾಮಯ್ಯ ಅವರು ಸೈದ್ದಾಂತಿಕ ಹೋರಾಟ ನಡೆಸಿಕೊಂಡು ಬಂದವರು. ವಿಶೇಷವಾಗಿ ಅನ್ನಭಾಗ್ಯ, ಕ್ಷೀರ ಭಾಗ್ಯ, ಕೃಷಿ ಭಾಗ್ಯ ಸೇರಿದಂತೆ ಇದೀಗ ಗ್ಯಾರಂಟಿ ಯೋಜನೆ ಜಾರಿ ಮೂಲಕ ಜನರ ಮನ ಗೆದ್ದಿದ್ದಾರೆ. ಹೀಗಾಗಿ ಅರಸು ಅವರಾಗಲಿ ಸಿದ್ದರಾಮಯ್ಯ ಅವರಾಗಲಿ ಇಬ್ಬರೂ ಶ್ರೇಷ್ಠ ನಾಯಕರು ಎಂದರು.