ಕಿತ್ತಾಡುತ್ತಿದ್ದ ಪಾಲಕರಿಗೆ ನಿಮ್ಹಾನ್ಸ್​ನಲ್ಲಿ ಕೌನ್ಸೆಲಿಂಗ್​| High court

ತಾಯಿಯ ವಿಷಮಯ ಮಾತಿನಿಂದ ನಕಾರಾತ್ಮಕ ಪ್ರಭಾವಕ್ಕೊಳಗಾಗಿರುವ ಮಕ್ಕಳನ್ನು ಮಾನೋವೈದ್ಯಕಿಯ ಮೌಲ್ಯಮಾಪನಕ್ಕೆ ಒಳಪಡಿಸಬೇಕು ಎಂದು ಕೋರಿ ಬೆಂಗಳೂರು ಮೂಲದ ವ್ಯಕ್ತಿಯೊಬ್ಬರು ಸಲ್ಲಿಸಿದ್ದ ಅರ್ಜಿ ವಜಾಗೊಳಿಸಿರುವ ನ್ಯಾಯಮೂರ್ತಿ ಡಾ. ಚಿಲ್ಲಕೂರು ಸುಮಲತಾ ಅವರಿದ್ದ ಏಕಸದಸ್ಯ ನ್ಯಾಯಪೀಠ ಈ ಆದೇಶ ನೀಡಿದೆ. ಮಕ್ಕಳ ಮಾನಸಿಕ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತಿರುವ ಪಾಲಕರಿಗೆ ಮಾನಸಿಕ ಚಿಕಿತ್ಸೆ ಮತ್ತು ಮಕ್ಕಳ ಆರೈಕೆಯ ಬಗ್ಗೆ ಮಾರ್ಗದರ್ಶನ ನೀಡುವುದು ಅಗತ್ಯ ಎಂದು ಅಭಿಪ್ರಾಯಪಟ್ಟಿದೆ.

ವಿಚಾರಣೆ ವೇಳೆ ನ್ಯಾಯಪೀಠವು ಪಾಲಕರ ಧೋರಣೆಯ ಬಗ್ಗೆ ಕಟುವಾಗಿ ತರಾಟೆಗೆ ತೆಗೆದುಕೊಂಡಿತು. ಆಟವಾಡುತ್ತ, ಕಲಿಯುತ್ತ ಸಂತೋಷದಿಂದ ಇರಬೇಕಾದ ಮಕ್ಕಳನ್ನು ಈ ವಯಸ್ಸಿನಲ್ಲಿಯೇ ಪಾಲಕರು ತಮ್ಮ ಅಹಂ ಮತ್ತು ಸ್ವಾರ್ಥಸಾಧನೆಗಾಗಿ ಕೋರ್ಟ್​ನಲ್ಲಿ ಸಾಗಳಾಗಿ ಬಳಸಿಕೊಳ್ಳುತ್ತಿರುವುದು ದುರದೃಷ್ಟಕರ ಎಂದು ಬೇಸರ ವ್ಯಕ್ತಪಡಿಸಿದೆ. ಮಕ್ಕಳ ಮಾತುಗಳನ್ನು ಧ್ವನಿಮುದ್ರಣ ಮಾಡಿಕೊಂಡು ಅದನ್ನು ಸಾಯಾಗಿ ಬಳಸಲು ಯತ್ನಿಸಿದ ತಂದೆಯ ವರ್ತನೆಗೆ ಅಸಮಾಧಾನ ವ್ಯಕ್ತಪಡಿಸಿದೆ. 

2015ರಲ್ಲಿ ವಿವಾಹವಾಗಿದ್ದ ದಂಪತಿಗೆ 2020ರಲ್ಲಿ ಸೇರಿ ಅವಳಿ ಮಕ್ಕಳು (ಹೆಣ್ಣು ಮತ್ತು ಗಂಡು) ಜನಿಸಿದ್ದರು. ಆದರೆ, ಕೌಟುಂಬಿಕ ಕಲಹದಿಂದಾಗಿ ದಂಪತಿಯು 2024ರಿಂದ ಬೇರೆ ಬೇರೆಯಾಗಿ ವಾಸಿಸುತ್ತಿದ್ದಾರೆ. ಮಕ್ಕಳು ತಾಯಿಯ ಆಶ್ರಯದಲ್ಲಿದ್ದು, ವಾರಕ್ಕೊಮ್ಮೆ ತಂದೆಯನ್ನು ಬೇಟಿಯಾಗಲು ಅವಕಾಶ ಮಾಡಿಕೊಡಲಾಗಿತ್ತು.

ಆದರೆ, ಮಕ್ಕಳ ಭೇಟಿಯ ಸಂದರ್ಭದಲ್ಲಿ ತಂದೆಯು ರಹಸ್ಯವಾಗಿ ಮಕ್ಕಳ ಮಾತುಗಳನ್ನು ಧ್ವನಿಮುದ್ರಣ ಮಾಡಿಕೊಂಡಿದ್ದರು. ತಂದೆಯ ಮನೆಯಲ್ಲಿ ದೆವ್ವದ ಕಾಟವಿದೆ, ಅಲ್ಲದೆ ಅಜ್ಜ&ಅಜ್ಜಿಯ ಬಗ್ಗೆ (ತಂದೆಯ ಪಾಲಕರು) ನಕಾರಾತ್ಮಕವಾಗಿ ಮಕ್ಕಳಿಗೆ ತಾಯಿಯು ಹೇಳಿಕೊಟ್ಟಿದ್ದಾರೆ ಎಂದು ಆ ಧ್ವನಿ ಮುದ್ರಣದಿಂದ ತಿಳಿದಿದೆ. ಇದು ತಂದೆ ಮತ್ತು ಮನೆಯ ಬಗ್ಗೆ ಮಕ್ಕಳ ಮನಸ್ಸಿನಲ್ಲಿ ವಿಷ ತುಂಬುವ ತಾಯಿಯ ಪ್ರಯತ್ನವಾಗಿದೆ. ಆದ್ದರಿಂದ ಮಕ್ಕಳ ಮಾನಸಿಕ ಆರೋಗ್ಯದ ಮೌಲ್ಯಮಾಪನಕ್ಕೆ ಆದೇಶಿಸಬೇಕು ಎಂದು ತಂದೆಯು ಕೌಟುಂಬಿಕ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿದ್ದರು. ಅಲ್ಲಿ ಅರ್ಜಿ ವಜಾಗೊಂಡಿದ್ದ ಕಾರಣ ಹೈಕೋರ್ಟ್​ ಮೆಟ್ಟಿಲೇರಿದ್ದರು.