ಅಥಣಿ, ಚಿಕ್ಕೋಡಿ, ನಿಪ್ಪಾಣಿ ಪಟ್ಟಣದ ಶಾಲೆ-ಕಾಲೇಜುಗಳಿಗೆ 10 ಸಾವಿರಕ್ಕೂ ಅಧಿಕ ವಿದ್ಯಾರ್ಥಿಗಳು ಓದುತ್ತಿದ್ದಾರೆ. ಅಥಣಿ ಸಮೀಪದ ಕೊಕಟನೂರ ಗ್ರಾಮದಲ್ಲಿ, ನಿಪ್ಪಾಣಿ ಪಟ್ಟಣದ ಹೊರವಲಯದಲ್ಲಿರುವ ಸ್ತವನಿಧಿ ಬಳಿ ಶಾಲೆ-ಕಾಲೇಜುಗಳಿವೆ. ಆದರೆ, ಹೊರವಲಯದ ಈ ಬಡಾವಣೆಗಳಿಗೆ ತೆರಳಲು ನಗರ ಸಾರಿಗೆ ಬಸ್ ವ್ಯವಸ್ಥೆ ಇಲ್ಲ. ಇದರಿಂದ ಕಾಲ್ನಡಿಗೆ, ಆಟೋ ಅಥವಾ ಸ್ವಂತ ವಾಹನ ಅವಲಂಬಿಸುವುದು ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿಗೆ ಅನಿವಾರ್ಯವಾಗಿದೆ. ಇದೇ ರೀತಿ ಚಿಕ್ಕೋಡಿ ಹೊರವಲಯದಲ್ಲಿರುವ ಸರ್ಕಾರಿ ಜಿಟಿಸಿ ಕಾಲೇಜು, ಪದವಿ ಕಾಲೇಜು, ವಿದ್ಯಾರ್ಥಿನಿಲಯ, ಡಿಡಿಪಿಐ, ಡಿಡಿಪಿಯು ಕಚೇರಿಗಳಿಗೆ ತೆರಳಲು ನಗರ ಸಾರಿಗೆ ಬಸಗಳಿಲ್ಲ. ಪಟ್ಟಣದ ಬಾಣಂತಿಖೋಡಿಯಲ್ಲಿರುವ ತಾಯಿ ಮಕ್ಕಳ ಆಸ್ಪತ್ರೆಗೆ ತಲುಪಲು ಆಟೋ ಅಥವಾ ಸ್ವಂತ ವಾಹನ ಅನಿವಾರ್ಯವಾಗಿದೆ.
