ಬೆಂಗಳೂರು: ಶೌಚಾಲಯದಲ್ಲೇ ಮಗುವಿಗೆ ಜನ್ಮ ನೀಡಿ ಗಂಟಲು ಸೀಳಿದ 19ರ ಹರೆಯದ ಯುವತಿ!

ದೇವನಹಳ್ಳಿ ಸಮೀಪವಿರುವ ಕಾರ್ಖಾನೆಯಲ್ಲಿ ರೇಣುಕಾ ಎಂಬ 19 ವರ್ಷದ ಯುವತಿ ಉದ್ಯೋಗಿಯಾಗಿದ್ದಳು. ಬುಧವಾರ ಆಕೆ ಶೌಚಾಲಯಕ್ಕೆ ಹೋದ ಸಮಯದಲ್ಲಿ ಮಗುವಿಗೆ ಜನ್ಮ ನೀಡಿದ್ದಾಳೆ. ಹೆರಿಗೆಯಾದ ಬೆನ್ನಲ್ಲೇ ಮಗುವಿನ ಗಂಟಲು ಸೀಳಿದ ರೇಣುಕಾ, ನವಜಾತ ಶಿಶುವಿನ ಮೃತದೇಹವನ್ನು ಬ್ಯಾಗ್ ಒಂದರಲ್ಲಿ ಹಾಕಿ ಅಲ್ಲಿಯೇ ಬಿಟ್ಟು ಹೋಗಿದ್ದಾಳೆ.

ರೇಣುಕಾ ಹೋದ ನಂತರ ಅದೇ ಶೌಚಾಲಯಕ್ಕೆ ಹೋದ ಮತ್ತೊಬ್ಬ ಮಹಿಳಾ ಉದ್ಯೋಗಿ, ರಕ್ತಸಿಕ್ತ ಬ್ಯಾಗ್ ಕಂಡು ಬೆಚ್ಚಿಬಿದ್ದಿದ್ದಾರೆ. ಕೂಡಲೇ ಅವರು ಕಂಪನಿಯ ಭದ್ರತಾ ಸಿಬ್ಬಂದಿ ಮತ್ತು ಮ್ಯಾನೇಜ್‌ಮೆಂಟ್‌ಗೆ ಮಾಹಿತಿ ನೀಡಿದ್ದಾರೆ. ತಕ್ಷಣ ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಪರಿಶೀಲನೆ ನಡೆಸಿದಾಗ, ನವಜಾತ ಶಿಶುವನ್ನು ಕೊಲೆ ಮಾಡಿರುವುದು ದೃಢಪಟ್ಟಿದೆ. ಸಿಸಿಟಿವಿ ಕ್ಯಾಮೆರಾ ಹಾಗೂ ಕಂಪನಿಯ ದಾಖಲೆಗಳ ಆಧಾರದ ಮೇಲೆ ತನಿಖೆ ನಡೆಸಿದಾಗ ಕೃತ್ಯ ಎಸಗಿದ್ದು ರೇಣುಕಾ ಎಂದು ತಿಳಿದುಬಂದಿದೆ.

ಪೊಲೀಸರ ಪ್ರಾಥಮಿಕ ತನಿಖೆಯ ಪ್ರಕಾರ, ರೇಣುಕಾ ಇನ್ನೂ ಅವಿವಾಹಿತೆಯಾಗಿದ್ದಳು. ಮದುವೆಗೂ ಮುನ್ನ ತಾಯಿಯಾಗಿದ್ದಕ್ಕೆ ಸಮಾಜದಲ್ಲಿ ಅವಮಾನವಾಗಬಹುದು ಎಂಬ ಭಯ ಮತ್ತು ಮುಜುಗರದಿಂದ ಆಕೆ ಈ ದಾರುಣ ಕೃತ್ಯ ಎಸಗಿರಬಹುದು ಎಂದು ಶಂಕಿಸಲಾಗಿದೆ. ಶೌಚಾಲಯಕ್ಕೆ ಹೋದಾಗ ಅನಿರೀಕ್ಷಿತವಾಗಿ ಹೆರಿಗೆಯಾಗಿದ್ದು, ಕೂಡಲೇ ಗಾಬರಿಗೊಂಡ ಯುವತಿ ಈ ನಿರ್ಧಾರ ತೆಗೆದುಕೊಂಡಿದ್ದಾಳೆ ಎನ್ನಲಾಗಿದೆ.

ಸದ್ಯ ಆರೋಪಿ ರೇಣುಕಾ ಹೆರಿಗೆಯ ನಂತರದ ಅಸ್ವಸ್ಥತೆಯಿಂದಾಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾಳೆ. ಆಕೆಯ ವಿರುದ್ಧ ಹತ್ಯೆ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ. ಕಂಪನಿಯ ಆವರಣದಲ್ಲಿ ನಡೆದ ಈ ಘಟನೆಯಿಂದಾಗಿ ಸಹೋದ್ಯೋಗಿಗಳು ಆಘಾತಕ್ಕೆ ಒಳಗಾಗಿದ್ದಾರೆ,(ಏಜೆನ್ಸೀಸ್​).