ರಾಜ್ಯ

ಪ್ರಜಾಸೌಧಕ್ಕಾಗಿ ಆಗ್ರಹಿಸಿ ಬನಹಟ್ಟಿ ಬಂದ್

ಬನಹಟ್ಟಿಯಲ್ಲಿ ಪ್ರಜಾಸೌಧ ನಿರ್ಮಾಣಕ್ಕೆ ಶನಿವಾರದಿಂದ ಪ್ರಾರಂಭಗೊಂಡ ಸರದಿ ಉಪವಾಸ ಸತ್ಯಾಗ್ರಹದಲ್ಲಿ ಸಮಿತಿ ಅಧ್ಯಕ್ಷ ಶಂಕರ ಸೊರಗಾಂವಿ ಮಾತನಾಡಿದರು. ಹರ್ಷವರ್ಧನ ಪಟವರ್ಧನ, ಸಿದ್ಧನಗೌಡ ಪಾಟೀಲ, ಶ್ರೀಶೈಲ ದಭಾಡಿ, ಪ್ರಶಾಂತ ಕೊಳಕಿ, ಮಲ್ಲಣ್ಣ ಕಕಮರಿ ಇತರರಿದ್ದರು.
ಬನಹಟ್ಟಿಯಲ್ಲಿ ಪ್ರಜಾಸೌಧ ನಿರ್ಮಾಣಕ್ಕೆ ಶನಿವಾರದಿಂದ ಪ್ರಾರಂಭಗೊಂಡ ಸರದಿ ಉಪವಾಸ ಸತ್ಯಾಗ್ರಹದಲ್ಲಿ ಸಮಿತಿ ಅಧ್ಯಕ್ಷ ಶಂಕರ ಸೊರಗಾಂವಿ ಮಾತನಾಡಿದರು. ಹರ್ಷವರ್ಧನ ಪಟವರ್ಧನ, ಸಿದ್ಧನಗೌಡ ಪಾಟೀಲ, ಶ್ರೀಶೈಲ ದಭಾಡಿ, ಪ್ರಶಾಂತ ಕೊಳಕಿ, ಮಲ್ಲಣ್ಣ ಕಕಮರಿ ಇತರರಿದ್ದರು.
Published on: 

ಪ್ರಮುಖ ಮುಖ್ಯಾಂಶಗಳು

  • ಸರ್ಕಾರದ ವಿರುದ್ಧ ಪ್ರತಿಭಟನಾಕಾರರ ಆಕ್ರೋಶ
  • ಸ್ಪಂದಿಸದಿದ್ದರೆ ಹೋರಾಟದ ಸ್ವರೂಪ ಬದಲಾವಣೆ

ರಬಕವಿ/ಬನಹಟ್ಟಿ: ತಾಲೂಕಿನ ಪ್ರಜಾಸೌಧವನ್ನು ಬನಹಟ್ಟಿಯಲ್ಲಿಯೇ ನಿರ್ಮಿಸಬೇಕೆಂಬ ಬೇಡಿಕೆ ಇದೀಗ ಮತ್ತಷ್ಟು ಪ್ರಖರಗೊಂಡಿದ್ದು, ಶನಿವಾರ ಬನಹಟ್ಟಿಯಲ್ಲಿ ನಡೆದ ಬೃಹತ್ ಮೆರವಣಿಗೆ ಹಾಗೂ ಸಂಪೂರ್ಣ ಬಂದ್ ಮೂಲಕ ಸರ್ಕಾರಕ್ಕೆ ಜನರು ತಮ್ಮ ಒಗ್ಗಟ್ಟಿನ ಶಕ್ತಿ ಪ್ರದರ್ಶಿಸಿದರಲ್ಲದೇ, ಬಸ್ ನಿಲ್ದಾಣದ ಹತ್ತಿರ ಸರದಿ ಸತ್ಯಾಗ್ರಹ ಪ್ರಾರಂಭಿಸಿದರು.

ಸಮಿತಿ ಅಧ್ಯಕ್ಷ ಶಂಕರ ಸೊರಗಾಂವಿ ಮಾತನಾಡಿ, ಪ್ರಜಾಸೌಧದ ವಿಚಾರದಲ್ಲಿ ಸರ್ಕಾರ ಕೈಗೊಂಡಿರುವ ಕ್ರಮ ಸಂಪೂರ್ಣ ತಪ್ಪಾಗಿದೆ. ಈಗಾಗಲೇ ಬನಹಟ್ಟಿಯಲ್ಲಿ ಪ್ರಜಾಸೌಧ ನಿರ್ಮಾಣಕ್ಕೆ ಗುರ್ತಿಸಿರುವ ಜಾಗದಲ್ಲಿಯೇ ಕೂಡಲೇ ಕಾಮಗಾರಿ ಕೈಗೊಳ್ಳಬೇಕು. ಜನರ ಬೇಡಿಕೆ ಕಡೆಗಣಿಸಿ ಬೇರೆ ರೀತಿಯ ನಿರ್ಧಾರ ಕೈಗೊಳ್ಳುವುದು ಸರಿಯಲ್ಲ. ಸರ್ಕಾರ ತಕ್ಷಣ ತನ್ನ ನಿಲುವನ್ನು ಸ್ಪಷ್ಟಪಡಿಸಿ, ಬನಹಟ್ಟಿಯಲ್ಲಿಯೇ ಪ್ರಜಾಸೌಧ ನಿರ್ಮಾಣಕ್ಕೆ ಮುಂದಾಗಬೇಕೆಂದು ಒತ್ತಾಯಿಸಿದರು.
ಸಮಿತಿ ಕಾರ್ಯದರ್ಶಿ ರಾಜು ಭದ್ರನ್ನವರ ಮಾತನಾಡಿ, ಪ್ರಜಾಸೌಧದ ಬೇಡಿಕೆಯಿಂದ ಹಿಂದೆ ಸರಿಯುವ ಪ್ರಶ್ನೆಯೇ ಇಲ್ಲ. ಹೋರಾಟ ನಿರಂತರವಾಗಿ ಮುಂದುವರಿಯಲಿದೆ. ಬಂದ್ ಮಾಡುವ ಮೂಲಕ ನಮ್ಮ ಶಕ್ತಿ ತೋರಿಸಿದ್ದೇವೆ. ಇದರ ನಂತರ ಸರದಿ ಉಪವಾಸ ಸತ್ಯಾಗ್ರಹ ನಡೆಸಲಾಗುವುದು. ಇದಕ್ಕೂ ಸರ್ಕಾರ ಸ್ಪಂದಿಸದಿದ್ದರೆ ಆಮರಣ ಉಪವಾಸದಂತಹ ತೀವ್ರ ಹೋರಾಟಕ್ಕೆ ಮುಂದಾಗಬೇಕಾಗುತ್ತದೆ. ಅಗತ್ಯ ಬಿದ್ದರೆ ಅನಿರ್ದಿಷ್ಟಾವಧಿ ರಸ್ತೆ ಬಂದ್ ಸೇರಿ ಹೋರಾಟದ ಸ್ವರೂಪವನ್ನು ಮತ್ತಷ್ಟು ತೀವ್ರಗೊಳಿಸಲಾಗುವುದೆಂದು ಹೇಳಿದರು.
ಹಿರಿಯ ಹೋರಾಟಗಾರ ಭೀಮಶಿ ಮಗದುಮ್ ಮಾತನಾಡಿ, ಪ್ರಜಾಸೌಧದ ಹೋರಾಟ ಯಾವುದೇ ರಾಜಕೀಯ ಪಕ್ಷ ಅಥವಾ ಜಾತಿಯ ಪರವಾದ ಹೋರಾಟವಲ್ಲ. ಇದು ಬನಹಟ್ಟಿಯ ಜನರ ಹಕ್ಕು ಮತ್ತು ಅಭಿವೃದ್ಧಿಗಾಗಿ ನಡೆಯುತ್ತಿರುವ ಹೋರಾಟವೆಂದು ಸ್ಪಷ್ಟ ಪಡಿಸಿದರು.
ಹರ್ಷವರ್ಧನ ಪಟವರ್ಧನ, ಸಿದ್ಧನಗೌಡ ಪಾಟೀಲ, ಶ್ರೀಶೈಲ ದಭಾಡಿ, ಪ್ರಶಾಂತ ಕೊಳಕಿ, ಮಲ್ಲಣ್ಣ ಕಕಮರಿ, ಮಲ್ಲಿಕಾರ್ಜುನ ಬಾನಕಾರ, ಬ್ರಿಜ್‌ಮೋಹನ ಡಾಗಾ, ನಂದು ಗಾಯಕವಾಡ, ಶ್ರೀಶೈಲ ಬೀಳಗಿ, ಬುಡಾನ್‌ಸಾಬ ಜಮಾದಾರ, ಬಸವರಾಜ ಗಿಡದಾನಪ್ಪಗೋಳ, ಇರ್ಷಾದ ಮೋಮಿನ್, ಅಶೋಕ ರಾವಳ, ಸುರೇಶ ಚಿಂಡಕ, ಬಸವರಾಜ ಬೆಳಗಲಿ, ಮಾಳು ಹಿಪ್ಪರಗಿ, ಸಿದ್ರಾಮಪ್ಪ ಸವದತ್ತಿ, ಅಕ್ಬರ್ ತಾಂಬೋಳಿ ಸೇರಿ ಅನೇಕರಿದ್ದರು.
ಬನಹಟ್ಟಿಯ ಹಿರೇಮಠದ ಶರಣಬಸವ ಶಿಚಾವಾರ್ಯರು, ಮಹಾಂತಯ್ಯ ಹಿರೇಮಠಶ್ರೀ ಸೇರಿ ಎಲ್ಲ ಸಂಘ-ಸಂಸ್ಥೆ, ಮಹಿಳಾ ಸಂಘಟನೆ, ಯುವಕ ಪಡೆ ಪಕ್ಷಾತೀತ ಬೆಂಬಲ ನೀಡಿದರು. ಸುತ್ತಲಿನ ಗ್ರಾಮಗಳಾದ ಯಲ್ಲಟ್ಟಿ, ಕುಲಹಳ್ಳಿ, ಆಸಂಗಿ, ಅಸ್ಕಿ, ಬಂಡಿಗಣಿ, ನಾವಲಗಿ, ಜಗದಾಳ, ರಾಮಪೂರ ಹೊಸೂರಿನ ಹಲವಾರು ಮುಖಂಡರು ಸತ್ಯಾಗ್ರಹದಲ್ಲಿ ಭಾಗವಹಿಸಿದ್ದರು. ಬೆಳಗಿನ ಜಾವದಿಂದ ರಾತ್ರಿಯವರೆಗೆ ಕುಡಚಿ-ಜಮಖಂಡಿ ರಾಜ್ಯ ಹೆದ್ದಾರಿ ಸಂಪೂರ್ಣ ಬಂದ್ ಆಗಿತ್ತು.
"

ಸಾವಿರಾರು ಜನರಿಂದ ವ್ಯಾಪಕ ಬೆಂಬಲ

ಬನಹಟ್ಟಿ ನಗರದಲ್ಲಿ ಪ್ರಜಾಸೌಧ ನಿರ್ಮಾಣ ಮಾಡಬೇಕು ಎಂದು ಆಗ್ರಹಿಸಿ ವಿವಿಧ ಸಂಘಟನೆಗಳು ಕರೆ ನೀಡಿದ್ದ ಬನಹಟ್ಟಿ ನಗರದ ಬಂದ್‌ಗೆ ಶನಿವಾರ ಉತ್ತಮ ಬೆಂಬಲ ವ್ಯಕ್ತವಾಯಿತು. ಬೃಹತ್ ಮೆರವಣಿಗೆ ಮೂಲಕ ಸಾವಿರಾರು ಜನ ಸರ್ಕಾರಕ್ಕೆ ಬಿಸಿ ಮುಟ್ಟಿಸಿದರು. ಬೆಳಗ್ಗೆಯಿಂದಲೇ ಶಾಲಾ-ಕಾಲೇಜು, ಅಂಗಡಿ ಮುಂಗಟ್ಟು, ಸಂತೆ, ಬಸ್ ಸೇರಿ ಎಲ್ಲವೂ ಸ್ವಯಂ ಪ್ರೇರಿತ ಬಂದ್ ಆಗಿದ್ದವು. ವಿವಿಧ ಸಂಘಟನೆಗಳ ಮುಖಂಡರು, ಗಣ್ಯರು, ಮಠಾಧೀಶರು, ವ್ಯಾಪಾರಸ್ಥರು, ನೇಕಾರರು, ಯುವಕರು, ಮಹಿಳೆಯರು ಸೇರಿ ತಾಲೂಕಿನ ವಿವಿಧ ಭಾಗಗಳಿಂದ ಆಗಮಿಸಿದ್ದ ಸಾರ್ವಜನಿಕರು ಮೆರವಣಿಗೆಯಲ್ಲಿ ಭಾಗವಹಿಸಿದ್ದರು. ಕಾಡಸಿದ್ಧೇಶ್ವರ ದೇವಸ್ಥಾನದಿಂದ ಆರಂಭವಾದ ಮೆರವಣಿಗೆ ನಗರದ ಪ್ರಮುಖ ಬೀದಿಗಳ ಮೂಲಕ ಸಾಗಿತು. ಮೆರವಣಿಗೆಯುದ್ಧಕ್ಕೂ ಪ್ರಜಾಸೌಧ ಬನಹಟ್ಟಿಯಲ್ಲಿಯೇ ನಿರ್ಮಾಣವಾಗಬೇಕು ಎಂದು ಘೋಷಣೆಗಳು ಮೊಳಗಿದವು. ಮೆರವಣಿಗೆ ಪ್ರಮುಖ ಮಾರ್ಗಗಳಲ್ಲಿ ಸಂಚರಿಸಿ ಬನಹಟ್ಟಿ ಬಸ್ ನಿಲ್ದಾಣ ಸಮೀಪದ ಚನ್ನಮ್ಮ ವೃತ್ತದಲ್ಲಿರುವ ಸತ್ಯಾಗ್ರಹ ಸ್ಥಳ ತಲುಪಿತು.

ರಬಕವಿ/ಬನಹಟ್ಟಿ
ಪ್ರಜಾಸೌಧ
ಸರದಿ ಸತ್ಯಾಗ್ರಹ
ಸಮಿತಿ ಅಧ್ಯಕ್ಷ ಶಂಕರ ಸೊರಗಾಂವಿ
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net