ಆಯುರ್ವೇದ ಔಷಧವೇ ಶ್ರೇಷ್ಠವಾದದ್ದು: ಮೂರು ಸಾವಿರ ಮಠದ ಶ್ರೀಗಳು ಅಭಿಮತ

ವಿವಿಧ ಸಂಸ್ಥೆಗಳ ಸಹಯೋಗದಲ್ಲಿ ‘ಕಜೆ ಆಯುರ್ವೇದಿಕ್ ಫೌಂಡೇಶನ್’, ಅರಮನೆ ಮೈದಾನದಲ್ಲಿ ಆಯೋಜಿಸಿರುವ ‘ವಿಶ್ವ ಆಯುರ್ವೇದ ಸಮ್ಮೇಳನದ’ 3ನೇ ದಿನವಾದ ಶನಿವಾರ ಶ್ರೀಗಳು ಮಾತನಾಡಿದರು.

ಅನಾದಿಕಾಲದಿಂದ ದೇಶೀಯ ಆಯುರ್ವೇದ ಪದ್ಧತಿ ನಮ್ಮ ಸಂಸ್ಕೃತಿಯ ಭಾಗವಾಗಿದೆ. ಹಿಂದಿನ ಕಾಲದಲ್ಲಿ ಪುರಾತನ ಆರ್ಚಾಯರು ಗಿಡಮೂಲಿಕೆ ಔಷಧಗಳ ಕುರಿತು ಹೆಚ್ಚು ಪ್ರಚಾರ ಮಾಡಿದ್ದರು. ಇದೀಗ, ಆಧುನಿಕ ಕಾಲಕ್ಕೆ ತಕ್ಕಂತೆ ಆಯುರ್ವೇದ ಮಹತ್ವದ ಬಗ್ಗೆ ದೊಟ್ಟ ಮಟ್ಟದಲ್ಲಿ ಪ್ರಚಾರ ನಡೆಯುತ್ತಿರುವುದು ಶ್ಲಾಘನೀಯ. ನಿರಂತರವಾಗಿ ಆಯುರ್ವೇದ ಸಸ್ಯಗಳ ಅನ್ವೇಷಣೆವಾಗುತ್ತಿದೆ. ಕೋವಿಡ್ ಸಂದರ್ಭದಲ್ಲಿ ಸರ್ಕಾರಕ್ಕೆ ಡಾ.ಗಿರಿಧರ ಕಜೆ ಕೊಟ್ಟಿರುವ ಸಲಹೆಗಳು ಇವತ್ತಿಗೂ ಪ್ರಸ್ತುತವಾಗಿವೆ. ನಮ್ಮ ಬದುಕಿನ ಧ್ಯೇಯವಾಗಿಟ್ಟುಕೊಂಡು ಅವರು,ಆಯುರ್ವೇದ ಮಹತ್ವ ಕುರಿತು ಸಾರ್ವಜನಿಕರಿಗೆ ಅರಿವು ಮೂಡಿಸುವ ಕೆಲಸ ಮಾಡುತ್ತಿದ್ದಾರೆ ಎಂದು ಶ್ರೀಗಳು ಶ್ಲಾಘಿಸಿದ್ದಾರೆ.

ಹಿರಿಯ ಪತ್ರಕರ್ತ ರವಿ ಹೆಗಡೆ ಮಾತನಾಡಿ, ಪಾಶ್ಚಾತ್ಯ ಪ್ರಭಾವದಿಂದ ಹೊರದೇಶಗಳದ್ದು ಮಾತ್ರ ವಿಜ್ಞಾನ. ನಮ್ಮ ದೇಶದ ಜ್ಞಾನ,ವಿಜ್ಞಾನವಲ್ಲ ಎಂದು ನಂಬಿಸುವ ಕೆಲಸವಾಗುತ್ತಿದೆ. ಆಯುರ್ವೇದ ವಿಚಾರದಲ್ಲೂ ಇದನ್ನೇ ನೋಡುತ್ತಿದ್ದೇವೆ. ‘ಆಯುರ್ವೇದ ವೈದ್ಯ ವಿಜ್ಞಾನವೇ ಅಲ್ಲ’ ಎಂದು ಹೇಳುವ ಜನರು ಇಂದಿಗೂ ಇದ್ದಾರೆ. ಆಯುರ್ವೇದ ಸಂಶೋಧನೆಗಳಿಗೆ ವೈದ್ಯಕೀಯ ಅಂಕಿಅಂಶದ ಕೊರತೆ ಇದೆ. ಇದನ್ನು ನಿವಾರಿಸುವ ಸಲುವಾಗಿ ಸಮ್ಮೇಳನದಲ್ಲಿ ಸಾವಿರಕ್ಕೂ ಅಧಿಕ ವೈಜ್ಞಾನಿಕ ಪ್ರಬಂಧಗಳು ಮಂಡನೆಯಾಗುತ್ತಿದ್ದು, ಮುಂದಿನ ದಿನಗಳಲ್ಲಿ ಇದು ಆಯುರ್ವೇದ ಸಂಶೋಧನೆಗೆ ಅಗತ್ಯ ಅಂಕಿ ಅಂಶ ಒದಗಿಸಲಿದೆ ಎಂದು ಹಿರಿಯ ಪತ್ರಕರ್ತ ರವಿ ಹೆಗಡೆ ಹೇಳುತ್ತಾರೆ.

ಹೈಕೋರ್ಟ್‌ನ ವಿಶ್ರಾಂತ ನ್ಯಾಯಮೂರ್ತಿರಾದ ಬಿ.ಎ.ಪಾಟೀಲ್, ಮನೋಹರ್, ಕರ್ನಾಟಕ ಬ್ಯಾಂಕ್ ಸಿಒಒ ಬಿ. ಎಸ್. ರಾಜ ಮತ್ತಿತರರಿದ್ದರು.

3 ಸಾವಿರ ವರ್ಷಗಳ ಹಿಂದೆಯೇ ಮಿದುಳಿನಲ್ಲಿ 72 ಸಾವಿರ ನರತಂತುಗಳು ಇದೆ ಎಂದು ಆಯುರ್ವೇದದಲ್ಲಿ ಹೇಳಲಾಗಿದೆ. ಅಂದಿನ ಕಾಲದಲ್ಲಿ ಯಾವ ವೈದ್ಯಕೀಯ ಉಪಕರಣಗಳು ಇರಲಿಲ್ಲ. ಆದರೂ, ತಮ್ಮ ಜ್ಞಾನದ ಮೂಲಕ ಸೂಕ್ಷ್ಮ ವಿಚಾರಗಳನ್ನು ಆಯುರ್ವೇದ ಗ್ರಂಥಗಳಲ್ಲಿ ದಾಖಲಿಸಲಾಗಿದೆ. ಆಯುರ್ವೇದ ಗ್ರಂಥಗಳಲ್ಲಿ ದಾಖಲಾದ ಅಂಶ ಬಳಸಿಕೊಂಡು ಪಾಶ್ಚಾತ್ಯರು ಪೇಟೆಂಟ್’ ಪಡೆಯುತ್ತಿದ್ದಾರೆ ಎಂದು ಬಾರ್ಕೂರು ಮಹಾಸಂಸ್ಥಾನ ಪೀಠಾಧ್ಯಕ್ಷ ಶ್ರೀ ವಿಶ್ವ ಸಂತೋಷ ಭಾರತಿ ಸ್ವಾಮೀಜಿ ಹೇಳಿದರು.

ಆಯುರ್ವೇದದಲ್ಲಿ ಮಹತ್ತರ ಸ್ಥಾನಪಡೆದಿರುವ ’ಅಷ್ಟಾಂಗ ಹೃದಯ ಸಂಹಿತೆಯ ದಿನಚರ್ಯೆ’ ಅಧ್ಯಾಯವನ್ನು ಏಕಕಾಲಕ್ಕೆ ಸಹಸ್ರಾರು ಜನರು ಪಠಿಸಿದ್ದರು. ಇದು ಏಷ್ಯಾ ಬುಕ್ ಆಫ್​​ ರೆಕಾರ್ಡ್ಸ್ ದಾಖಲಾಯಿತು. ಅಲ್ಲದೆ, ಅಧ್ಯಾಯವನ್ನು ಪಠಿಸುವ ಮೂಲಕ ‘ಆಯುರ್ವೇದ ವಿಶ್ವ ಸಮ್ಮೇಳನ’ ದಾಖಲೆ ಬರೆದಿದೆ. ಮಹರ್ಷಿ ವಾಗ್ಭಟಾಚಾರ್ಯರಿಂದ ಅಷ್ಟಾಂಗ ಹೃದಯ ರಚಿತವಾಗಿದೆ. ದಿನಚರ್ಯೆ ಅಧ್ಯಾಯವು ಪ್ರತಿಯೊಬ್ಬ ಮನುಷ್ಯನು, ಕಾಲ ಮತ್ತು ದೇಶಗಳಿಗೆ ಅನುಗುಣವಾಗಿ ಯಾವರೀತಿಯಲ್ಲಿ ದಿನಚರಿ ರೂಪಿಸಿಕೊಳ್ಳಬೇಕು ಎಂಬುದನ್ನು ತಿಳಿಸಲಿದೆ. ಆರೋಗ್ಯಪೂರ್ಣ ಜೀವನ ನಿರ್ವಹಣೆಗೆ ಇದು ಸಹಕಾರಿಯಾಗಿದೆ.

ಹಲವು ದಶಕಗಳಿಂದ ಇತಿಹಾಸದಲ್ಲಿ ಸುಳ್ಳು ಸೇರಿಸುವುದು, ಸುಳ್ಳನ್ನೇ ಸತ್ಯವೆಂದು ಬಿಂಬಿಸುವ ಕಾರ್ಯ ನಡೆಯುತ್ತಿದೆ. ನಮ್ಮ ಭಾರತೀಯ ಪರಂಪರೆಯನ್ನು ವಿನಾಶಗೊಳಿಸುವ ಪಿತೂರಿ ಇದರ ಹಿಂದಿದೆ. ಇದರ ಬಗ್ಗೆ ನಾವೆಲ್ಲರೂ ಎಚ್ಚೆತ್ತುಗೊಂಡು ನಮ್ಮ ದೇಶದ ಜ್ಞಾನಪರಂಪರೆ ಉಳಿಸಬೇಕು.

ಆಯುರ್ವೇದ ಔಷಧಗಳಿಂದ ಮಾತ್ರ ಸಾವಿರಕ್ಕೂ ಅಧಿಕ ರೋಗಗಳನ್ನು ವಾಸಿ ಮಾಡಬಹುದು. ಆಯುರ್ವೇದ ಮತ್ತು ಹೋಮಿಯೋಪತಿ ಔಷಧಗಳ ನಡುವೆ ಸಾಕಷ್ಟು ವ್ಯತ್ಯಾಸವಿದೆ. ನೈಸರ್ಗಿಕವಾಗಿ ಗಿಡಮೂಲಿಕೆಗಳಿಂದ ಸಿಗುವ ಔಷಧ ಆಯುರ್ವೇದ. ಕೋವಿಡ್ ಸಂದರ್ಭದಲ್ಲಿ ಅತಿ ಹೆಚ್ಚಾಗಿ ಇದು ಬಳಕೆಯಾಗಿತ್ತು.ಅನಾದಿಕಾಲದಿಂದಲೂ ಇದಕ್ಕೆ ಹೆಚ್ಚು ಪ್ರಾಶಸ್ತ್ಯ ಸಿಗುತ್ತಿದೆ. ಈ ಕ್ಷೇತ್ರದಲ್ಲಿ ಹೊಸ ಹೊಸ ಪ್ರಯೋಗಗಳು ನಡೆಯುತ್ತಿವೆ.