ಸಾರ್ಥಕ್ಯ ಭಾವ ಮೂಡಿಸಿದ ಗುರುವಂದನೆ

ಕಾಲೇಜು ಮೈದಾನದಲ್ಲಿ ಭಾನುವಾರ ಆಯೋಜಿಸಿದ್ದ ಗುರುವಂದನಾ ಹಾಗೂ ಸ್ನೇಹ ಮಿಲನ ಕಾರ್ಯಕ್ರಮ ಹಳೆಯ ವಿದ್ಯಾರ್ಥಿಗಳಿಗೆ ಅಕ್ಷರಶಃ ಮರೆಯಲಾಗದ ವೇದಿಕೆಯಾಯಿತು. ತಾವು ಕಲಿತ ಕಾಲೇಜು ಈಗ ಕೆಪಿಎಸ್ ಕಾಲೇಜಾಗಿ ನಾಮಕರಣಗೊಂಡಿರುವುದನ್ನು ನೋಡಿ ಹಿರಿಯ ವಿದ್ಯಾರ್ಥಿಗಳಲ್ಲಿ ಸಂತೋಷ ಪಟ್ಟರು. ಶಿಷ್ಯ ವೃಂದವನ್ನು ಕಂಡ ಗುರುಗಳ ಮುಖದಲ್ಲಿ ಸಾರ್ಥಕತೆಯ ಭಾವನೆ ಕಂಡಿತು.

ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ನಿವೃತ್ತ ಪ್ರಾಂಶುಪಾಲ ನಾಗರಾಜು, 21 ವರ್ಷ ಉಪನ್ಯಾಸಕನಾಗಿ ಸೇವೆ ಸಲ್ಲಿಸಿದ್ದು, ನನ್ನ ಸೇವಾವಧಿಯಲ್ಲಿ ಕಲಿಕೆಯತ್ತ ಹೆಚ್ಚು ಗಮನ ನೀಡಲಾಗಿತ್ತು. ಇದರ ಪರಿಣಾಮ ಭಾರತೀಯ ಸೇನೆ, ಶಿಕ್ಷಕರು, ಉಪನ್ಯಾಸಕರು, ಇಂಜಿನಿಯರ್ ಮತ್ತು ಖಾಸಗಿ ಐಟಿ ಬಿಟಿ ಕಂಪನಿಗಳಲ್ಲಿ ಉದ್ಯೋಗಿಗಳಾಗಿ ಸೇವೆ ಸಲ್ಲಿಸುತ್ತಿರುವುದು ಉತ್ತಮ ಬೆಳವಣಿಗೆ ಎಂದರು.

ದಿನ ನಿತ್ಯ ತಪ್ಪದೆ ದಿನಪತ್ರಿಕೆ, ಪುಸ್ತಕಗಳನ್ನು ಮಕ್ಕಳು ಓದುವಂತಾಗಬೇಕು. ಇಂದಿನ ತಂತ್ರಜ್ಞಾನ ಎಷ್ಟು ಅನುಕೂಲವೋ ಅಷ್ಟೇ ಅಪಾಯಕಾರಿ ಎಂದರು.

ನಿವೃತ್ತ ಪ್ರಾಂಶುಪಾಲರಾದ ನಂಜುಂಡಪ್ಪ, ಲಕ್ಷ್ಮೀ ನರಸಿಂಹಯ್ಯ, ನಾಗರಾಜು ಕಾಲೇಜಿನ ಎಸ್‌ಡಿಎಂಸಿ ಉಪಾಧ್ಯಕ್ಷ ನಾಗರಹಳ್ಳಿ ಕೃಷ್ಣೇಗೌಡ, ಪ್ರಾಂಶುಪಾಲ ಹನುಮಂತಯ್ಯ, ಉಪನ್ಯಾಸಕರಾದ ಒಡೆಯರ್, ಓಂಕಾರಮ್ಮ, ಸನಾವುಲ್ಲ, ಅಮ್ಮಯಮ್ಮ, ಚಂದ್ರಕಾಂತ್, ಪ್ರೌಢಶಾಲಾ ವಿಭಾಗದ ಮುಖ್ಯ ಶಿಕ್ಷಕ ಪ್ರಸನ್ನ ಕುಮಾರ್ ಅವರನ್ನು ಸನ್ಮಾನಿಸಲಾಯಿತು.

ವಿದ್ಯೆ ಕಲಿಸಿದ ಬೋಧಕರ ಮೇಲೆ ಪುಷ್ಪವೃಷ್ಟಿಗೈದು ವಾದ್ಯಗೋಷ್ಠಿಯೊಂದಿಗೆ ಹ್ಯಾಂಡ್ ಪೋಸ್ಟ್ ಸರ್ಕಲ್ ಬಳಿಯಿಂದ ವೇದಿಕೆ ಸ್ಥಳಕ್ಕೆ ಕರೆತರಲಾಯಿತು.