ಅರಣ್ಯ ಕೃಷಿಯಿಂದ ಸಮೃದ್ಧ ಜೀವನ

ವಿಕ್ರಮ್ ಬೆಂಗಳೂರಿಗೆ ಹೋಗಿ ಟ್ಯಾಕ್ಸಿ ಚಾಲಕನಾಗಿ ದುಡಿದು ಜೀವನ ಮಾಡುತ್ತಿದ್ದರು. ಆದರೆ ಅಲ್ಲಿನ ಜಂಜಾಟದ ಬದುಕಿನಿಂದ ನೊಂದು ತನ್ನ ಊರಿಗೆ ವಾಪಸ್ ಬಂದು ನೆಲೆಸಿದ್ದಾರೆ. ತಂದೆಯಿಂದ ಬಂದ ಪಿತ್ರಾರ್ಜಿತ ಆಸ್ತಿಯನ್ನು ಉಳಿಸಿ ಬೆಳೆಸುವ ನಿಟ್ಟಿನಲ್ಲಿ ಕೆಲಸ ಮಾಡುತ್ತಿದ್ದಾರೆ. ಅತ್ಯಂತ ಸಂಭ್ರಮದಿಂದ ಅರಣ್ಯ ಕೃಷಿ ಮಾಡುತ್ತಿದ್ದು, ಜಮೀನಿನ ಸುತ್ತ ವಿಶೇಷ ಪ್ರಭೇದದ ಕಾಡು ಜಾತಿಯ ಮರಗಳನ್ನು ಬೆಳೆಸಿದ್ದಾರೆ. ಪೂರ್ಣಚಂದ್ರ ತೇಜಸ್ವಿ ಸೇರಿದಂತೆ ಹಲವರಿಂದ ಪರಿಸರ ಸ್ನೇಹ ಮನೋಭಾವವನ್ನು ರೂಢಸಿಕೊಂಡು, ಅದನ್ನು ಪ್ರಾಯೋಗಿಕವಾಗಿ ತಂದು ಆಸ್ವಾದನೆ ಮಾಡಲಾಗುತ್ತಿದೆ ಎನ್ನುತ್ತಾರೆ ಅವರು.

ಕೆಂಚಮ್ಮನ ಹೊಸಕೋಟೆ ಹೋಬಳಿಯ ಮಲ್ಲಮ್ಮ ಬಸವಗೌಡ ವಿದ್ಯಶಾಲೆಯಲ್ಲಿ ಶಿಕ್ಷಣ ಪಡೆದ ವಿಕ್ರಮ್ ನಾಲ್ಕು ಎಕರೆ ಜಮೀನಿನಲ್ಲಿ ಉಳುಮೆ ಮಾಡುತ್ತಿದ್ದು ಕಾಫಿ, ಏಲಕ್ಕಿ, ಕಾಳುಮೆಣಸು, ಭತ್ತದ ಬೆಳೆಯೊಂದಿಗೆ ಜಮೀನಿನ ಸುತ್ತಲೂ ಕಾಡು ಜಾತಿಯ ಮರಗಳು, ಹಣ್ಣಿನ ಮರಗಳನ್ನು ಬೆಳೆಸಿದ್ದಾರೆ. ಉಳಿದ ಜಮೀನನ್ನು ಸಂಪೂರ್ಣವಾಗಿ ಅರಣ್ಯ ಕೃಷಿ (ಕಾಡು ಜಾತಿ ಮರ ಬೆಳೆಸುವುದು)ಗೆ ಮೀಸಲಿಟ್ಟಿದ್ದು, ಸಾವಿರಾರು ಮರಗಳನ್ನು ಬೆಳೆಸಿದ್ದಾರೆ.

ಜಮೀನಿನಲ್ಲಿ ವಿವಿಧ ಬಗೆಯ ಕಾಡು ಹಣ್ಣಿನ ಮರಗಳನ್ನು ಬೆಳೆಸಲಾಗಿದೆ. ಹೀಗಾಗಿ, ಸಿವೆಟ್ ಕ್ಯಾಟ್ ಸೇರಿದಂತೆ ಹಲವು ಪಕ್ಷಿಗಳು ಇದನ್ನು ಆವಾಸ ತಾಣವಾಗಿಸಿಕೊಂಡಿವೆ. ಅಲ್ಲದೆ ನಂದಿ, ನೇರಳೆ, ಬೈನೆ, ಹೆಬ್ಬೇವು, ತೇಗ, ಮಾವು ಸೇರಿದಂತೆ ನೂರಾರು ಬಗೆಯ ಮರಗಳೂ ಬೆಳೆದಿವೆ. ಆದರೆ, ಇದ್ಯಾವುದನ್ನೂ ಅವರು ತಮ್ಮ ವೈಯಕ್ತಿಕ ಲಾಭಕ್ಕಾಗಿ ಬಳಕೆ ಮಾಡುತಿಲ್ಲ. ಕಾಫಿ, ಏಲಕ್ಕಿ, ಮೆಣಸು ಹಾಗೂ ಭತ್ತದ ಬೆಳೆಯಿಂದ ವಾರ್ಷಿಕ 4 ರಿಂದ 5 ಲಕ್ಷ ರೂ.ವರೆಗೆ ಆದಾಯ ಬರುತ್ತಿದೆ. ಇನ್ನುಳಿದಂತೆ ತೆಂಗು, ತರಕಾರಿ ಬೆಳೆಯುತ್ತಿದ್ದು ಅವುಗಳನ್ನು ತಮಗಾಗಿ ಬಳಕೆ ಮಾಡುತ್ತಾರೆ.

ಕಾಡಿನ ಮಧ್ಯದಲ್ಲಿ ಜಮೀನು ಇರುವುದರಿಂದ ನಿತ್ಯ ಕಾಡಾನೆ, ನವಿಲು, ಮೊಲ ಸೇರಿದಂತೆ ವಿವಿಧ ಜಾತಿಯ ಪಕ್ಷಿಗಳು ಇಲ್ಲಿಗೆ ಬರುತ್ತವೆ. ಬೇಸಿಗೆ ಸಮಯದಲ್ಲಿ ಕಾಡಾನೆಗಳ ಉಪಟಳ ಇಲ್ಲಿ ಹೆಚ್ಚು. ಹಾಗಾಗಿ ಅವುಗಳಿಂದ ಆಗುವ ಹಾನಿ ತಡೆಗಟ್ಟಲು ತಂತಿಬೇಲಿ ಅಳವಡಿಸಲಾಗಿದೆ. ಜಮೀನಿನಲ್ಲಿ ಕಾಡುಪ್ರಾಣಿ, ಪಕ್ಷಿಗಳು ಕುಡಿಯುವುದಕ್ಕೆ ನೀರು ಇಡಲಾಗಿದೆ. ಇದರಿಂದ ಬಾನಾಡಿಗಳು ಮತ್ತು ಪ್ರಾಣಿಗಳಿಗೆ ಅನುಕೂಲವಾಗಿದೆ. ಅಲ್ಲದೆ ಪರಿಸರ ಮಾಲಿನ್ಯ ಆಗದಂತೆ ವಿಶೇಷ ಗಮನಹರಿಸಲಾಗಿದೆ.