ರೈತನಿಗೆ ಬರೆ ಗ್ರಾಹಕನಿಗೂ ಹೊರೆ

ಕಲಬುರಗಿ: ಮುಂಗಾರು ಮಳೆ ಅಭಾವದಿಂದಾಗಿ ಲಕ್ಷಾಂತರ ಹೆಕ್ಟೇರ್​ ಉದ್ದು, ಹೆಸರು, ಸೋಯಾ ಸೇರಿ ಪ್ರಮುಖ ವಾಣಿಜ್ಯ ಬೆಳೆಗಳು ಮಣ್ಣುಪಾಲಾಗಿದ್ದು, ರೈತನ ಬದುಕು ಬೀದಿಗೆ ಬಂದಿದೆ. ಇನ್ನೊಂದೆಡೆ ಈ ಉತ್ಪನ್ನ ಕೊರತೆಯುಂಟಾಗಿ ಮಾರುಕಟ್ಟೆಯಲ್ಲಿ ದರ ದುಪ್ಪಟ್ಟು ಕಂಡು ಸಾಮಾನ್ಯ ಗ್ರಾಹಕರ ಮೇಲೂ ಭಾರಿ ಹೊರೆ ಬೀಳುವ ಸಾಧ್ಯತೆ ದಟ್ಟವಾಗಿದೆ.

ಜಿಲ್ಲೆಯಲ್ಲಿ ಹೆಸರು 54 ಸಾವಿರ ಹೆಕ್ಟೇರ್​ ಗುರಿಗೆ 34753 ಹೆಕ್ಟೇರ್​ ಬಿತ್ತನೆ (ಶೇ.64)ಯಾಗಿದೆ. ಉದ್ದು ಗುರಿ 25 ಸಾವಿರ ಹೆಕ್ಟೇರ್​ನಲ್ಲಿ 12631 ಹೆಕ್ಟೇರ್​ ಬಿತ್ತನೆ (ಶೇ.51), ಸೋಯಾಬೀನ್​ 23 ಸಾವಿರ ಹೆಕ್ಟೇರ್​ ಗುರಿ ಪೈಕಿ 15040 ಹೆಕ್ಟೇರ್​ ಬಿತ್ತನೆ (ಶೇ.65), ಹತ್ತಿ ಒಂದು ಲಕ್ಷ ಹೆಕ್ಟೇರ್​ನಲ್ಲಿ 62792 ಹೆಕ್ಟೇರ್​(ಶೇ.63), ಸಜ್ಜೆ 600 ಹೆಕ್ಟೇರ್​ನಲ್ಲಿ ಕೇವಲ 80, ಕಬ್ಬು 45000 ಹೆಕ್ಟೇರ್​ನಲ್ಲಿ 35007 ಹೆಕ್ಟೇರ್​ (ಶೇ.78) ಬಿತ್ತನೆಯಾಗಿದೆ.

ಉದ್ದು, ಹೆಸರು ಮತ್ತು ಸೋಯಾ ರಾಶಿ ಹಂತಕ್ಕೆ ತಲುಪಬೇಕಿತ್ತು. ಉದ್ದು, ಹೆಸರು ಆಗಸ್ಟ್​ನಲ್ಲಿ, ಸೋಯಾ ಸೆಪ್ಟೆಂಬರ್​ನಲ್ಲಿ ರಾಶಿ ಮಾಡಲಾಗುತ್ತಿದೆ. ಆದರೆ ಜಮೀನಿನಲ್ಲಿ ಈ ಬೆಳೆ ಕಂಡು ರೈತ ಕಣ್ಣೀರಿಡುತ್ತಿದ್ದಾನೆ. ಜತೆಗೆ ಹತ್ತಿಯೂ ಸಂಪೂರ್ಣ ಮಣ್ಣು ಪಾಲಾಗಿದ್ದು, ಸಜ್ಜೆ ಬಿತ್ತಿದಷ್ಟೂ ಢಮಾರ್​ ಎಂದಿದೆ.

ಜಿಲ್ಲೆಯಲ್ಲಿ ಸಮೃದ್ಧಿ ಮಳೆಯಾಗಿದ್ದರೆ 3.5 ಲಕ್ಷ ಕ್ಟಿಂಟಾಲ್​ ಹೆಸರು, 1.50&2 ಲಕ್ಷ ಕ್ವಿಂ. ಉದ್ದು, ಸೋಯಾಬೀನ್​ ಸುಮಾರು 3.50 ಲಕ್ಷ ಕ್ಟಿಂ. ಹಾಗೂ ಹತ್ತಿ 8&10 ಲಕ್ಷ ಕ್ಟಿಂ. ಉತ್ಪಾದನೆ ಆಗಬಹುದಾಗಿತ್ತು. ಆದರೆ ಪ್ರಸಕ್ತ ಈ ಬೆಳೆಗಳು ಉತ್ಪಾದನೆ ಶೂನ್ಯ ಎಂಬಷ್ಟರ ಮಟ್ಟಿಗೆ ಒಣಗಿದ್ದು, ಮಳೆಯಾದರೂ ಮೇಲೇಳದಂಥ ಸ್ಥಿತಿಗೆ ತಲುಪಿವೆ.

ಮಾರುಕಟ್ಟೆಯಲ್ಲಿ ಹೆಸರು ಕ್ವಿಂಟಾಲ್​ಗೆ 6000&7700, ಉದ್ದು 6500&7200, ಸೋಯಾಬೀನ್​ 6900&7200 ರೂ. ದರದಲ್ಲಿ ಮಾರಾಟವಾಗುತ್ತಿದೆ. ಹಾಗೊಂದು ವೇಳೆ ಸಮೃದ್ಧವಾಗಿ ಬೆಳೆದಿದ್ದರೆ ದರದಲ್ಲಿ ಯಥಾಸ್ಥಿತಿ ಕಾಯ್ದುಕೊಳ್ಳುತ್ತಿತ್ತು. ಮಣ್ಣು ಪಾಲಾಗಿದ್ದರಿಂದ ದರದಲ್ಲಿ ದಿಢೀರ್​ ಏರಿಕೆ ಕಾಣುವ ಲಕ್ಷಣ ಗೋಚರಿಸಿದ್ದು, ರೈತರ ಜತೆಗೆ ಗ್ರಾಹಕರ ಜೇಬಿಗೂ ದೊಡ್ಡ ಕತ್ತರಿ ಬೀಳಲಿದೆ.

2024&25 ಮತ್ತು 2025&26ಲ್ಲಿ ಕಲಬುರಗಿ ಎಪಿಎಂಸಿಗೆ ಹೆಸರು 74261 ಕ್ವಿಂ. ಬಂದರೆ, ದರ 6300 ರೂ. ಇತ್ತು. ಉದ್ದು 35774 ಕ್ವಿಂ. ದರ 5400, ಸೋಯಾಬೀನ್​ 11754 ಕ್ವಿಂ., ದರ 4200 ರೂ. ಇತ್ತು.

ಮಧ್ಯಂತರ ಪರಿಹಾರ ಶಿಫಾರಸು: ಉದ್ದು, ಹೆಸರು ಮತ್ತು ಸೋಯಾಬೀನ್​ ಬೆಳೆ ಹಾಳಾಗಿದೆ ಎಂಬ ಕಾರಣಕ್ಕೆ ಅಧ್ಯಯನ ನಡೆಸುತ್ತಿರುವ ಕೃಷಿ ಇಲಾಖೆ ಬೆಳೆವಿಮೆಯ ಮಧ್ಯಂತರ ಪರಿಹಾರಕ್ಕೆ ಕೇಂದ್ರ ಕಚೇರಿಗೆ ಶಿಫಾರಸು ಮಾಡಲು ಸಿದ್ಧತೆ ನಡೆಸಿದೆ. ಹೆಸರು 16924.5 ಹೆಕ್ಟೇರ್​ಗೆ 19774 ರೈತರು ನೋಂದಾಯಿಸಿದ್ದಾರೆ. ಉದ್ದು 4844.70 ಹೆಕ್ಟೇರ್​ಗೆ 7099 ರೈತರು, ಸೋಯಾಬೀನ್​ 4351.21 ಹೆಕ್ಟೇರ್​ಗೆ 7391 ರೈತರ ನೋಂದಣಿಯಾಗಿದೆ. ಕೃಷಿ ಅಧಿಕಾರಿ ಮತ್ತು ಸಿಬ್ಬಂದಿ ಈ ಬೆಳೆಯ ಜಮೀನುಗಳಿಗೆ ಭೇಟಿ ನೀಟಿ ವಾಸ್ತವಾಂಶ ಕಲೆ ಹಾಕುತ್ತಿದ್ದು, ಮಧ್ಯಂತರ ಪರಿಹಾರಕ್ಕಾಗಿ ರಾಜ್ಯ ಸರ್ಕಾರಕ್ಕೆ ಶಿಫಾರಸು ಮಾಡಲಿದೆ.

ಇದೀಗ ಮಳೆಯಾದರೂ ದೀರ್ಘಾವಧಿ ತೊಗರಿಗೆ ಮಾತ್ರ ಅನುಕೂಲವಾಗಲಿದೆ. ಹಾನಿಗೊಳಗಾದ ಹೆಸರು, ಉದ್ದು, ಸೋಯಾಬೀನ್​ ರೈತರು ಮತ್ತೆ ತೊಗರಿ ಬಿತ್ತನೆ ಮಾಡಿ ಹಾನಿ ಕೊಂಚ ಕಡಿಮೆ ಮಾಡಿಕೊಳ್ಳಬಹುದಾಗಿದೆ. ಆದರೆ ಇದೆಲ್ಲವೂ ಮಳೆರಾಯನ ಕೃಪೆ ಆಧರಿಸಿದೆ. ತೊಗರಿ 6.30 ಲಕ್ಷ ಹೆಕ್ಟೇರ್​ ಗುರಿ ಪೈಕಿ 2.08 ಲಕ್ಷ ಹೆಕ್ಟೇರ್​ ಬಿತ್ತನೆ(ಶೇ.33) ಮಾತ್ರ ಪೂರ್ಣಗೊಂಡಿದೆ.

ಬೆಳೆ ವಿಮೆ: ಜು.29ರವರೆಗೆ ಜಿಲ್ಲೆಯಲ್ಲಿ 4.51 ಲಕ್ಷ ಹೆಕ್ಟೇರ್​ ಬೆಳೆಗೆ 3.85 ಲಕ್ಷ ರೈತರು ಬೆಳೆ ವಿಮೆಗೆ ನೋಂದಣಿ ಮಾಡಿದ್ದಾರೆ. ಕಳೆದ ವರ್ಷ 3.61 ಲಕ್ಷ ಹೆಕ್ಟೇರ್​ಕ್ಕೆ 3.01 ಲಕ್ಷ ರೈತರು ವಿಮೆಗೆ ನೋಂದಾಯಿಸಿದ್ದರು. ಹೀಗಾಗಿ ರಾಜ್ಯದಲ್ಲಿ ಕಲಬುರಗಿ ಜಿಲ್ಲೆ ಮೊದಲ ಸ್ಥಾನದಲ್ಲಿದೆ. ನೋಂದಣಿಗೆ ಜು.31 ಕೊನೆಯ ದಿನ. ರೈತರು ಆದ್ಯತೆ ಮೇರೆಗೆ ಬೆಳೆವಿಮೆ ನೋಂದಣಿ ಮಾಡಿ ಆಗಿರುವ ಹಾನಿ ಕೊಂಚ ಕಡಿಮೆ ಮಾಡಿಕೊಳ್ಳಬಹುದಾಗಿದೆ.

ಜುಲೈನಲ್ಲಿ 133.8 ಮಿಮೀ ವಾಡಿಕೆ ಮಳೆಯಲ್ಲಿ 87.6 ಮಿಮೀ ಸುರಿದಿದೆ. ಜೂನ್​ನಲ್ಲಿ 107.3 ಮಿಮೀ ವಾಡಿಕೆಯಲ್ಲಿ 69.2 ಮಿಮೀ, ಕಳೆದ 24 ಗಂಟೆ ಅವಧಿಯಲ್ಲಿ 4.9 ಮಿಮೀ ವಾಡಿಕೆ ಪೈಕಿ 26.9 ಮಿಮೀ ಮಳೆಯಾಗಿದೆ. ಕಳೆದೊಂದು ವಾರದಲ್ಲಿ 38.2 ಮಿಮೀ ವಾಡಿಕೆಯಲ್ಲಿ 38.1 ಮಿಮೀ ಮಳೆ ಬಂದಿದೆ. ಜೂನ್​&ಜುಲೈ ಸೇರಿ 241.1 ಮಿಮೀನಲ್ಲಿ 156.8 ಮಿಮೀ ಮಳೆ ಬಂದಿದೆ. ಹೀಗಾಗಿ ಜಿಲ್ಲೆಯಲ್ಲಿ ಮಳೆ ಕೊರತೆ ಉಂಟಾಗಿದೆ. ಇಳುವರಿ ಮತ್ತು ಉತ್ಪಾದನೆ ಕುಂಠಿತ, ಜನ&ಜಾನುವಾರುಗಳಿಗೆ ಕುಡಿಯುವ ನೀರು, ದನಕರುಗಳಿಗೆ ಮೇವು ಅಭಾವ ಹೀಗೆ ಸಮಸ್ಯೆಗಳ ಪಟ್ಟಿ ಬೆಳೆಯುತ್ತಲೇ ಇದೆ.

"

ಇನ್​ಪುಟ್​ ದರ ಹೆಚ್ಚಾಗಿದೆ. ವಲಸೆಯಿಂದಾಗಿ ದುಡಿಯುವ ಕಾರ್ಮಿಕರ ಸಂಖ್ಯೆ ಕ್ಷೀಣಿಸಿದೆ. ಕೂಲಿದರ ಬೇಕಾಬಿಟ್ಟಿ ಏರಿಕೆಯಾಗಿದೆ. ಹೀಗಾಗಿ ಸರ್ಕಾರ ರೈತರ ಆದಾಯ ಇಕ್ವಿಟೇಬಲ್​ ಆಗುವವರೆಗೆ ಕೈಹಿಡಿಯಬೇಕು.

— > ಬಸವರಾಜ ಇಂಗಿನ್​ ಅಧ್ಯಕ್ಷ, ರಾಜ್ಯ ತೊಗರಿ ಬೆಳೆಗಾರರ ಸಂಘ